Amiosao O Le Faavae o se Olaga FaaKeriso
Mai se lauga i le sauniga lotu na tuuina atu i le aso 6 o Tesema, 2011, i le Iunivesite o Polika Iaga.Mo le tusiga atoa i le gagana Peretania, alu i le speeches.byu.edu.
O le amiosao o le lototoa lea e fai le mea sao e tusa lava po o a ni taunuuga ma ni faigata.
O le tala masani a Robert Bolt, A Man for All Seasons o se tala e uiga ia Sir Thomas More. Sa faaaloalogia o ia o se sikola, loia, amepasa, ma i le iuga, o se Lord Chancellor o Egelani.O ia o se tagata o le amiosao atoatoa.E tatalaina le tala faatino i upu nei a Sir Richard Rich: “E tofu tagata uma ma lona tau! … E oo foi i tupe. … Po o mea faafiafia. Tofiga, tamaitai, o meatotino, e i ai lava se mea i taimi uma.”1
O le autu lena o le tala faatino. O le autu foi lena o le olaga. Pe i ai se alii po o se tamaitai i lenei lalolagi e le mafai ona faatauina, o lana amiosao e le mafaatauina?
A o faagasolo le tala faatino, sa manao le Tupu o Henry VIII e tatala le la faaipoipoga ma Masiofo Catherine ae faaipoipo atu ia Anne Boleyn. Ae o loo i ai se faafitauli: o le tatalaina o faaipoipoga e faasa e le Ekalesia Katoliko. Ma o lea sa le liliuese ai le Tupu o Henry VIII, mai ona manao, ma poloaiina ana faufautua e faia se tautoga o le a lagolagoina ai o ia i le tatalaga o lana faaipoipoga. Ae sa i ai foi le isi faafitauli.
O Sir Thomas More, o le sa alofa ma faamemelo i ai ia tagata lautele, sa le lagolagoina lea tautoga—sa le faatagaina e lona mafaufau o ia e saini le tautoga. E le o naunau o ia e gauai atu i ai, e ui lava o le talosaga patino a le tupu. Ona oo mai lea o tofotofoga. Ua faaaoga e ana uo o latou uiga faagauloto ma le faifaamalosi, ae na te lei gauai lava. Ua aveesea mai ia te ia lona tamaoaiga, lona tofiga, ma lona aiga, ae na te le sainia lava. Na iu lava ina molia sese o ia mo lona ola, ae na te lei gauai atu lava.
Sa latou aveesea mai ia te ia ana tupe, lona malosiaga faaupufai, ana uo, ma lona aiga—ma o le a aveesea foi ma lona ola—ae e le mafai ona latou aveesea mai ia te ia lana amiosao. E le faatauina atua i soo se tau.
I le taunuuga o le tala faatino, sa molia sese ai Sir Thomas More mo le taufaalata. Ua solia e Sir Richard Rich le tulafono o le molimau pepelo ina ia mafai ai ona molia [Sir Thomas More]. A o savali atu i fafo ia Sir Richard mai le potu faamasino, sa fesili atu i ai Sir Thomas More, “O se filifili lena o se tofiga o loo e asoaina. … O le a [lena tofiga]?”
Na tali mai ia Faamasino Thomas Cromwell, “O Sir Richard ua tofia e avea ma Loia Sili mo Uelese.”
Ona tepa atu lea o More i foliga o Rich i le le fiafia ma fai atu ma le ita tele, “Mo Uelese? Aisea Richard, e le faamanuiaina ea se tagata e tuu atu lona agaga mo le lalolagi atoa. … Ae mo Uelese!”2
I le olaga a sau, e le masalomia lava e toatele o le a toe tepa i tua i le lotolotoi o auega le mataofiofia ma toe fai foi pea lava pea, “Aisea na ou faatau atu ai lo’u agaga mo Uelese po o ni mea faafiafia faaletino le tumau po o le lauiloa po o se tulaga maualuga po o le faamaoniga a a’u uo? Aisea na ou faatau atu ai la’u amiosao mo se tau?”
O Mataupu Faavae o le Amiosao
Ou te fia talanoa atu i mataupu faavae e fitu o le amiosao lea ou te faamoemoe o le a musuia ai i tatou ina ia faia lenei uiga paia faa-Keriso e avea o se faavae o uiga faaletagata i o tatou lava olaga patino.
1. O le amiosao o le faavae o o tatou uiga faaletagata ma isi uma uiga mama. I le 1853 sa amata ai ona fausia e le Au Paia le Malumalu o Sate Leki. Mo le vaega tele o le lua tausaga uumi ma le faigata sa eliina ai e le Au Paia ni lua e faataatia ai le faavae: e silia ma le valu futu (2.4 m) le loloto, sa faia i maa sima. O se tasi aso sa sau ai le taitai kamuta ia Peresitene Polika Iaga ma le tala faanoanoa tele lenei: o loo i ai ni ta’eta’ei i poloka o maa sima. Sa feagai Polika Iaga ma lenei faafitauli. (1) fai le mea sili latou te mafaia e fonofono ai mea ua ta’eta’ei ma fausia se malumalu e matua itiiti ifo lona mamafa ma le ofoofogia nai lo le malumalu sa muai fuafuaina po o le (2) toe sua ese uma mea sa galulue ai mo le lua tausaga ma suia i se faavae maamora e mafai ona lagolagoina le malumalu matagofie o le Atua sa muai faaalia mo i latou. O le mea e lelei ai, sa filifili e Peresitene Iaga le fuafuaga mulimuli.3
O le amiosao o le faavae lea o loo fausia ai i luga ia uiga faaletagata ma se olaga faa-Keriso. Afai o loo i ai ni mea o ta’eta’ei i lena faavae, o lona uiga o le a le mafai ona lagolagoina le mamafa o isi uiga faa-Keriso ia e tatau ona fausia ai i luga. E mafai faapefea ona tatou lotomaualalo pe afai e leai so tatou amiosao e faailoa ai o tatou lava vaivaiga? E mafai faapefea ona tatou atiina ae le alofa mama mo isi pe afai tatou te le faamaoni atoatoa i a tatou fegalegaleaiga ma i latou? E mafai faapefea ona tatou salamo ma faamamaina pe afai e na o ni nai vaega o le mea moni tatou te ta’u atu i o tatou epikopo? I le faavae o amioga mama uma, o loo i ai le amiosao.
Sa matauina e le tusitala Kerisiano o C. S. Lewis e faapea o le taimi lava tatou te faia ai se mea sese i se fesili faamatematika, e le mafai ona tatou faaauau pea: “Pe a ou amata faaopoopo i se ala sese, o le vave lava ona iloaina ma toe foi i tua ma toe amata atoa, o le vave foi lena ona ou toe faaauau.”4
E faapena foi, e le mafai ona faaauau ona tatou mauaina atoa isi amio mama faa-Keriso seiloga tatou te aveina faamuamua le amiosao e fai ma faavae maamora o o tatou olaga. I nisi tulaga e ono manaomia ai lo tatou asa atu i le faagasologa tiga o le aveesea o se faavae o loo i ai o loo fausia i luga o le taufaa’ole’ole ma suia lea maa ma lea maa i se faavae o le amiosao. Ae e mafai ona fai.
2. O le amiosao e le na o le faia o le mea ua faatulafonoina ae faapena foi ma mea e mama pe faa-Keriso. Atonu e faatagaina faaletulafono le mulilua, atonu e faatagaina faaletulafono le fai o ni mafutaga faaleulugalii e le faaipoipoina, atonu e faatagaina faaletulafono le faitatala, ae e leai ma se tasi o na amioga e mama pe faa-Keriso. O le amiosao e le na o le tausisia o le tulafono; ae o le tausisia foi o le tulaga maualuga atu o le amio mama. O le tulaga lava lea e pei ona fautua mai le peresitene o le Iunaite Setete o Aperaamo Linikone: ola faatasi ma “agelu sili atu o o tatou natura.”5
Ua tofu alii talavou uma ma se tiute o le amio mama e puipui ma faasaoina le mama o lana uo o loo la tafafao faamasani, ma o loo i ai foi i tamaitai talavou uma lena lava tiute e tasi o le amio mama mo lana uo o loo la tafafao faamasani. O se tofotofoga o le amiosao a le alii po o le tamaitai. O le alii po o le tamaitai o loo tauivi mo le amiosao o le a atiina ae se naunautaiga ma se amiopulea lea e malosi atu e oo lava i manaoga malolosi o lagona faaletino. O lena lava amiosao i le Atua ma i le tagata lava ia ma i isi lea e lagolagoina i latou ma faamalolosia i latou e tusa lava pe tatala mai e Satani ana auupega o faaosoosoga o le amio mama i o latou luga. Sa fetalai mai le Alii i lenei tupulaga, “O le a Ou faatu mai mo au se nuu mama” (MF&F 100:16). Ua faatuatuaina i tatou e le Alii e avea ma lena tupulaga.
I ni nai tausaga ua tuanai sa ma manaomia ai ma la’u paaga faapisinisi e faate’a se tagata faigaluega. Ina ua maea ni nai talanoaga sa maua ai se faaiuga ina ia tauia o ia mo ana auaunaga. Sa ou lagonaina o le faaiuga sa sili atu ma le tulaga talafeagai, ae peitai o lea faaiuga sa faaleagaina ai le ma mafutaga. O lena po sa ou lagonaina le ufitia ai o au i le faanoanoa. Sa ou taumafai e aveesea e ala i lou mafaufau o au lava ia faapea sa talafeagai lava le mea sa ou faia, ae sa lei aluese ai le lagona. Ona oo mai lea o le uunaiga lenei: “E le lava le tau ina talafeagai; e tatau foi ona e taumafai ia avea e faapei o Keriso.” O le tausisi i le tulaga aupito sili ona maualuga o le amio mama o se uiga tulaga ese lea o se alii po o se tamaitai o le amiosao.
3. O le amiosao o le faia lea o faaiuga e faavae i faatinoga e faavavau. O se tasi o tamaitai talavou o le matou uarota sa sue i se suega i le aoga maualuga i le lotoifale. A o ia tepa ae i luga, sa ia vaaia se tasi o ana uo o loo kopi. Sa faataupupula atu le tasi i le isi. I le maasiasi, sa faamimigi mai tauau o lana uo ma memu mai upu “Ou te manaomia ia togi.” Mo se mafuaaga e le mailoa ua le iloa ai e lenei tamaitai talavou lana vaai mamao e faavavau—e le o togi ae o le faaleatua o lo tatou taunuuga lena. O le a se lelei na te faia ina ia taliaina i le iunivesite aupito sili ona lauiloa ae le maua ai lo tatou faaeaga i le faagasologa? Soo se taimi lava e faa’ole’ole ai se tasi, ua ia faatau atu lona tofi faaleagaga mo se meaai (tagai i le Kenese 25:29–34). I lana vaai latalata sa ia filifili ai le tālā i le asō nai lo le tamaoaiga le gata i le olaga a sau.
Sa tau mai e se tama le fiafia ia te au e faapea sa manao lona afafine talavou e “ola le mama e tusa ma lona manao” ma a oo loa pe toe tolu masina fai lana faaipoipoga ua faamoemoeina, ona salamo lea ma faamama ina ia mafai ai ona maua sana pepa faataga o le malumalu. Ou te le iloa lava pe i ai se peresitene o se siteki o le a ia tuu atua se pepa faataga i lalo o na tulaga faapena. Ae e tusa lava foi pe tuu atu, o le a avea ma malaia, ae le o se faamanuiaga. O le amiosao e le vaai latalata—e le na o se suiga o le amio mo na o sina taimi; o se suiga tumau o le natura.
Sa tau mai e le Tupu o Peniamina ia i tatou le auala e mafai ai ona suia o tatou natura mai se tagata natura i se tagata faaleagaga: “Ona o le tagata natura o se fili i le Atua, ma sa faapea lava mai le pa’u o Atamu, ma o le a faapea lava, e faavavau faavavau lava, vagana ai ua gauai atu o ia i uunaiga a le Agaga Paia, ma tuu ese le tagata natura ma avea ma tagata paia e ala i le togiola a Keriso le Alii, ma avea e pei o se tamaitiiti, e usiusitai, agamalu, lotomaualalo, onosai, ma tumu i le alofa, loto ina usitai uma ua silafia e le Alii e tatau ona faaoo mai i ona luga, e pei ona usitai atu se tamaitiiti i lona tama” (Mosaea 3:19; faaopoopo le faamamafa).
O le suia o o tatou natura, e le na o a tatou amioga, e faafaigofieina e se vaaiga e faavavau e faapea o i tatou o fanau a le Atua, lea ua tatou maua Lona aloiafi o le paia i totonu o i tatou, ma e ala i le Togiola o le a mafai ai ona avea i tatou e faapei o Ia—le faataitaiga atoatoa o le amiosao.
4. O le amiosao o le ta’uta’u atu lea o le mea moni atoa ma e leai lava se isi mea na o le mea moni lava. Ou te talitonu e mafai ona taliaina e le Alii o tatou vaivaiga ma mea sese, pe afai lena tatou te faailoa atu se manao ma se taumafaiga ia salamo. O le uiga atoa lava lena o le Togiola. Ae ou te le talitonu e faigofie ona Ia onosaia se loto faa’ole’ole po o se laulaufaiva pepelo.
I ni nai tausaga ua tuanai sa ou faatautaia ai se malaga taamilo a le misiona. O nisi o faifeautalai sa tauivi ma le usiusitai. I lena afiafi sa ma faatautaia ai ma le peresitene o le misiona ni faatalanoaga ma nisi o faifeautalai. O le taeao na sosoo ai na amata ai e le peresitene o le misiona la matou konafesi faalesone e ala i le tuuina atu o se lauga o i ai tomai faaletaitai e uiga i le amiosao. Sa ou lagona le uunaiga e talanoa atili i lena mataupu. Sa ma matauina i ni nai minute e sosoo ai o le a ma faatautaia ai nisi faatalanoaga. Sa ma talosagaina ina ia aua nei manatu mama ia faifeautalai ma faatoa ta’u mai e se tasi le mea moni pe afai e fai atu i ai le fesili tuusao atoatoa.
Sa i ai le Agaga iina, ma o faifeautalai e toafa mai le po ua mavae na laa i luma ma faapea mai ma le le faalauaiteleina, “E i ai nisi mea matou te fia tau atu.” Sa faapea mai se tasi o i latou, “Ou te fia manao e avea ma se tagata faamaoni.” O lena aso sa ia suia ai lona faavae o le oneone i se faavae maamora o le amiosao.
5. E le iloa e le amiosao ni sisi’o po o ni ‘alofaga. E i ai lava se uiga tamalii e uiga i alii ma tamaitai e tautino mai ona vaivaiga ma tuuaia atoa o ia lava e aunoa ma se ‘alofaga po o se sisi’o. I le tele o taimi sa faamaumau ai e Iosefa Samita ona vaivaiga i le Mataupu Faavae ma Feagaiga mo tagata uma ina ia faitau i ai. Ua tau mai ia i tatou e lenei mea e le o ia o se tagata atoatoa, ae ua tau mai ai foi ia i tatou e leai se mea na ia nanaina—o ia o se tagata o le amiosao. O le a le mea o fai e lenei mea mo lona faamaoni ina ua ia faamatala mai le tala o le Uluai Faaaliga po o le tala i asiasiga a Moronae? O loo tau mai ia i tatou e mafai lava ona tatou faatuatuaina o ia, ma e mafai ona tatou talitonuina ana upu uma ona o ia moni lava o se tamalii e amiosao.
6. O le amiosao o le tausia lea o a tatou feagaiga ma a tatou tautinoga, e oo lava i taimi o faigata. O le amiosao o le lototoa lea e fai le mea sao e tusa lava po o a ni taunuuga ma ni faigata. Sa faamatala e Peresitene N. Eldon Tanner (1898–1982), le sa avea muamua ma Fesoasoani Muamua i le Au Peresitene Sili, le aafiaga lenei:
“Sa sau se alii talavou ia te au i se taimi e lei mamao atu ma faapea mai, ‘Ua ou faia se maliega ma se alii lea e manaomia ai ona ou totogi atua ni tupe patino i tausaga taitasi. Ua ou nofo aitalafu nei, ma e le mafai ona ou totogiina na tupe, aua a ou totogia, o le a oo ai ina maimau atu ai lo’u fale. O le a se mea e tatau ona ou faia?
“Na ou tilotilo atu ia te ia ma fai atu, ‘Tausi le lua maliega.’
“‘E tusa lava pe aveesea ai lo’u fale?’
“Sa ou fai atu, ‘Ou te le o talanoa atu e uiga i lou fale. O loo ou talanoa atu i le lua maliega; ma ou te manatu e sili atu i lou toalua le i ai o sana tane e tausi i lana upu, faafetaiaia ana matafaioi, e tausi i ana tautoga po o ana feagaiga, ma nofo mautotogi i se fale nai lo le nofo i se fale e i ai se tane o le a le tausia ana feagaiga ma ana tautoga.6
Sa faigata lana filifiliga: lona fale po o lana amiosao. O se alii po o se tamaitai o le amiosao e le tau ina na ona gauai atu pe lolo atu ona ua faigata pe taugata pe ua le talafeagai foi. I lenei tulaga ua i ai i le Alii se lagona atoatoa o le amiosao. Sa ia fetalai mai, “O ai A’u … ua Ou folafola atu ae Ou te le faataunuuina?” (MF&F 58:31).
O se tasi o tofotofoga aupito sili ona faigata o lo tatou amiosao, o le filifili lea pe tatou te tausia tautinoga ma folafolaga na tatou osia po o le tausisi i a tatou upu i nisi taimi pe leai.
7. O le amiosao e le puleaina pe a i ai isi tagata. O se mea e uunaia mai totonu o le loto, e le mai se vaaiga i fafo. Sa faamatala e Elder Marion D. Hanks (1921–2011) o le Fitugafulu se tama ma sona atalii laitiiti sa “tutu i se faatoaga sana i se auala i se nuu maotua lava” ma vaavaai atu i le matagofie mai o sana i totonu o le pa. Ina ua uma ona tepa le tama lea i ona luma, i ona tua, i lona itu agavale, ma i lona itu taumatau, sa “amata loa ona ae i luga o le pa” e aumai ni sana. Sa tilotilo atu lona atalii ia te ia ma fai atu ma lona le malie, “Tama, ua galo ona e tepa i luga.”7
I le tala a Shakespeare o le Hamlet, na fai atu ai Polonius i lona atalii o Laertes:
Ia e faamaoni ia te oe lava ia,
Ma e ao lava ona mulimulitaia, e pei o le po [ona mulimuli] i le ao,
E le mafai ona e pepelo i soo se tagata.8
E maeu lea fautuaga! E i ai sa tatou filifiliga. E mafai ona tatou uumauina le taimi ma pulea o tatou olaga, ia po o le avea o i tatou na o ni meataalo e faatonutonuina e o tatou siosiomaga ma a tatou uo.
Pe e te matamata i ponokalafi i luma o lou tina, lau uo o lua tafafao faamasani, lou toalua, po o lou epikopo? Afai e sese pe a i ai isi, e sese foi pe a latou le o i ai. O le tagata o le amiosao e faamaoni ia te ia lava ma le Atua o le a filifili le mea sao e tusa lava pe o tilotilo mai se tasi ona o loo uunaia o ia e ia lava, e le o puleaina e se vaaiga mai fafo.
Tau ina ia avea le amiosao o o tatou loto ma se faailoga e faitauina i mataitusi matamataola lanu uliuli “E LE FAATAUINA ATU I SOO SE TAU” ina ia mafai ona faamatalaina ai i tatou, e pei o Ailama Samita, “Amuia lava la’u auauna o Ailama Samita; aua o A’u, o le Alii, ua alofa ia te ia ona o le faamaoni o lona loto” (MF&F 124:15).
Tau ina ia avea i tatou uma ma alii ma tamaitai o le amiosao—e le faapea ona e tatau ai ae ona ua tatou mananao i ai. Na faailoa mai e le Alii le taui mo i latou e faia lea mea: “E moni Ou te fai atu ia te outou, o i latou uma o i totonu o i latou o e ua latou iloa ua faamaoni o latou loto … ma ua loto e tausi a latou feagaiga e ala i le taulaga … e taliaina i latou e a’u” (MF&F 97:8; faaopoopo le faamamafa).
Tau ina ia taliaina i tatou uma e le Atua ona o loo tatou taumafai ina ia avea i tatou o ni alii ma ni tamaitai o le amiosao.
Ata na tusia e Robert Casey