Ua Silafia e le Atua a Tatou Meaalofa

Peresitene Henry B. Eyring, Fesoasoani Muamua i le Au Peresitene Sili, “Fesoasoani ia i Latou e Faatutu ni Sini Maualuluga,” Liahona, Nov. 2012, 67.

Ina ua ou tiakono i le 12 o ou tausaga, sa ou nofo ai i New Jersey, e 50 maila (80 km) mai le Aai o Niu Ioka. Sa ou moemiti e avea ma se tagata taalo pesipolo maoae. Sa malie lo’u tama e ave au e matamata i se taaloga sa faia i le Malae Taalo tuai ma le logologoa a le Yankee i le Bronx. O loo mafai pea ona ou vaaia le sasau o le pate ina ua ta e Joe DiMaggio se ta mamao na lelea atu i totonu o le falematamata ogatotonu o le malae sa nofo ai lo’u tama i ou talaane, na o le pau lea o le taimi na ma o faatasi ai i se liki pesipolo pito i luga [a le Iunaite Setete].

Ae o se isi aso faatasi ma lou tama na mamanu ai lou olaga e faavavau. Sa ia ave au mai New Jersey i le fale o se peteriaka faauuina i le Aai o Sate Leki. Ou te lei vaai muamua lava i lea alii. Sa tuu au e lou tama i le faitotoa. Sa taitai atu au e le peteriaka i se nofoa, tuu ona lima i luga o lou ulu, ma folafola mai se faamanuiaga lea sa aofia ai se tautinoga o le manao aupito sili o lou loto.

Sa ia fai mai o au o se tasi o i latou ia sa fai mai ai, “Amuia e faatupuina le filemu.” [Mataio 5:9.] Sa ou tei ona o loo mafai ona iloa e se tagata ese lou loto lea na pupula ai ou mata e vaai i le potu i le mea sa tupu ai se vavega. O lena faamanuiaga o mea e mafai ona ou faia na mamanuina lo’u olaga, la’u faaipoipoga, ma la’u auaunaga faaleperisitua.

Mai lena aafiaga atoa ai ma mea na mulimuli mai ai, e mafai ona ou molimau atu ai, “Aua ua le tuuina atu i tagata uma meaalofa uma; ona e tele meaalofa, ma e tuu atu e le Agaga o le Atua i tagata taitoatasi se meaalofa” (MF&F 46:11).

Sa faaali mai ia te au e le Alii se meaalofa, ua mafai ai ona ou iloaina ma saunia mo ni avanoa e faaaoga ai e faamanuia ai i latou ou te alofa ma auauna i ai.

Ua silafia e le Atua a tatou meaalofa. O lau lui ia te outou faapena foi ma au, o le tatalo lea ia iloa meaalofa ua tuuina mai ia i tatou, ia iloa le auala e atiae ai, ma ia iloa ia avanoa e auauna atu ai i isi ua tuuina mai e le Atua ia i tatou. Ae o le mea sili o mea uma, ou te tatalo ina ia musuia outou e fesoasoani i isi ia mauaina a latou meaalofa faapitoa mai le Atua e auauna atu ai.

Faaaogaina o Lenei Savali

A o e faitauina ma mafaufau loloto i le Mataupu Faavae ma Feagaiga 46:11–26, tatalo ia iloa po o a meaalofa faaleagaga atonu o loo ia te oe.
E mafai faapefea e le auauna atu i isi ona fesoasoani ia te oe e atiae au meaalofa faaleagaga?
Afai e te lei mauaina lava se faamanuiaga faapeteriaka, mafaufau nei ia maua.

Mafaufau e tusi ou mafaufauga i lau api talaaga pe talanoaina foi ma isi.