Avea Taaloga Vitio ma Vaisu
Ata na tusia e Stephen Sitton
Ina ua 13 o’u tausaga, sa aumai ai e lo’u tina ia te a’u se taaloga vitio mo lo’u aso fanau. O taaloga vitio sa fai lava si fou ia te a’u, ma o le taaloga vitio lenei sa i ai ni ata mananaia ma sa matuai malie lava. Sa malolo aoga, ma o lea sa tonu ai o le a ou vave faaumaina le taaloga i le vave e mafai ai ina ia lava ai se taimi matou te taaalo ai ma a’u uo i fafo.
I se tasi aoauli o le Aso Lua sa amata ai ona ou taalo i la’u taaloga vitio fou. Na ou faatoa iloa ane, ua te’a le vaeluaga o le po, ma e le’i faia sa’u tatalo o le afiafi. Ae sa faaauau lava ona ou taalo.
Na atili faaletonu ia mea. Ina ua ou ala ae i le aso na sosoo ai, o le mea muamua lava sa ou faia o le ki o le taaloga ma amata ona ou toe taalo ai. Sa ou tau le malolo e ai pe moe, ma na pau lava le mea sa ou mafaufau i ai o le pe faapefea ona ou oo i le isi vaega o la’u taaloga.
I le afiafi o le Aso Toonai sa lapataia ai a’u e lo’u tina afai ou te le vave moe, o le a faigata ona ou nofo i luga i le taeao e sosoo ai ou te alu i le lotu. Ae sa faaauau lava ona ou taalo ma ou te le’i moe seia oo i le 3:00 i le vaveao. Ina ua ou taunuu atu i le lotu, sa ou lagonaina le matuai vaivai lava ma sa faigata ona taulai atu lo’u mafaufau i le [sauniga]. Sa le mafai ona ou tufaina le faamanatuga, o lea sa ou toe foi ai i le fale ou te moe, sa matuai ou vaivai lava.
Sa ou moe i le Aso Sa atoa ma ana le oo lava i le taeao o le Aso Gafua ou te le ala i luga, sa na ona ou ala ae ina ia ou toe taalo foi. O lena vaiaso sa ou iloaina na tatau ona ou maua se moe lelei i le po ma taumafai ia ou vave moe, ae na oo lava foi i lena taimi sa faaauau pea ona ou faamaumauina lo’u taimi i taaloga vitio. Sa amata ona ou faaaluina se taimi tele e taalo ai i taaloga vitio nai lo le faitauina o tusitusiga paia. O le mea moni, sa oo lava ina ou le toe faitau mo le tele o aso. Ina ua toe a’e le aoga, sa faasa a’u e lo’u tina ona ou taalo i aso o le vaiaso, o lea sa ou faaaogaina ai le avanoa i faaiuga o le vaiaso e taalo ai, e aofia ai ma Aso Sa.
O lo’u le toe auai i sauniga o le Aso Sa, sa taofia ai lo’u faia o mea sa sili atu ona taua mo se mea sa leai se taua e pei o se taaloga vitio. Sa ou le mulimuli i le fautuaga a lo’u tamamatua, o le sa fai mai i se tasi aso, “Ia aua lava nei e lafoaia mea e sili atu ona taua mo se mea e masani ona tupu.” O lenei fautuaga sa ta mau ia te a’u i taimi uma.
Sa ou iloaina sa ou manaomia ona faapaleni lo’u olaga. O le mea e tasi sa fesoasoani ia te a’u o la’u vasega seminare. I la’u aoga tulagalua, o le seminare sa faia o se vaega o mataupu aoaoina i aso uma, ma sa fesoasoani tele ia te a’u. Sa ou maua ai le avanoa e aoao ai e faatulaga tatau mea e tatau ona ave i ai la’u faamuamua ma faamuamua le Alii i lo isi mea uma. Afai tatou te faalagolago ia te Ia ma afai tatou te ole atu ia te Ia mai le taele o o tatou loto e fesoasoani ia i tatou i nisi o tulaga o o tatou olaga, o le a faafofoga mai le Alii ia i tatou. Afai tatou te manao moni lava e sui, e mafai ona tatou faia.
O le mea e laki ai, ou te le’i oo i se faafitauli ogaoga ina ia ou lafoaia ai ia taaloga. O le faatulagaina sa’o o mea e ave i ai la’u faamuamua ma le faatapulaaina o le taimi ou te faaaluina i taaloga sa lava lava lena. Ae peitai, sa le’i tupu lena mea seia oo ina ou ole atu i le Alii i le tatalo mo se fesoasoani, ma sa fesoasoani mai o Ia ia te a’u.