Gunu mai na iVurevure

Mai vei Aaron L. West

Edita, Veiqaravi Vakatabaivola ni Lotu

O Jisu Karisito na ivurevure ni wai ni bula.

Ni da veitalanoataka na totoka ni valetabu, eda dau vakawa na dudukilagi, iloilo, kei na droini e lalaga. Eda veivosakitaka ena vakarokoroko na tobu ni veipapitaisotaki, rumu ni edaumeni, rumu ni veivauci, kei na rumu vakasilesitieli.

Ia ni vakatabuya e dua na parofita e dua na valetabu vua na Turaga, e vakatabuya okoya na veika kece me baleta na valetabu ka sega ni veika totoka ga e dau vakawai. Ena masu ni veivakatabui ni Valetabu e Kansas City Missouri, a tukuna kina o Peresitedi Thomas S. Monson: “Keimami vakatabuya na qele ka duri tu kina na valetabu oqo. Keimami vakatabuya na veitikina ni kena vale totoka oqo, mai na kena duru tawaraici ki na ivakatakarakara vakasakiti i Moronai ka tutuvaka na ucuna cecere sara.”¹ Ena vosa ni masu ni veivakatabui i Peresitedi Joseph Fielding Smith me baleta na Valetabu e Ogden Utah, e vakatabuya okoya “na yavu, na lalaga, na vuloa, na lalaga ecake, na tawa, kei na veitiki ni vale,” ka qai masulaka na veitaqomaki ni “veika vakamisini taucoko, na veisala kei na ituvaki ni cina, na sala ni cagi kei na liva, kei na vei gacagaca kece ni vale oqo.”²

Au vakavinavinaka ni dau vakauqeti ira na Nona parofita na Turaga mera vakatabuya na veitikina yadua ni valetabu yadua. Me vaka ni na lailai beka na inaki ni dua na iji ni katuba se mataqali cina mai na icabocabo ena rumu ni veivauci, na veika lalai oya era vukea na kena vakataucokotaki na inaki lagilagi ni valetabu.

E dua vei ira na tikina lailai oqo e sa vukei au meu vulica e dua na lesoni veivakadeitaki. Au a tiko ena Valetabu e Salt Lake ena dua na siga, ka vakavakarau tiko meu biuta na rumu ni veisau ni oti na noqu vakaitavi ena dua na cakacaka tabu vakalotu me baleti ira na mate. Ena noqu raica rawa e dua na ivurevure ni gunu, au vakila sara niu karamaca, kau mani cuva sobu meu gunu totolo. A gole mai noqu vakasama e dua na itukutuku:

O sa gunuva na wai oqo ena valetabu, ia o sa dau gunuva vakaidina tiko li na wai ni bula ka tiko eke?

E a sega ni dua na veibeitaki waromisa—e dua la na veivunauci malumu kei na dua na taro e tara uto vakaidina.

Na noqu isaunitaro ki na taro oya na sega. A sega ni taucoko tiko na noqu gunuva na wai ni bula ena valetabu. Au na kaya vakadodonu eke ni a veiciriyaki tu na noqu vakasama ena vica na miniti sa oti niu a ciqoma tiko na cakacaka tabu vakalotu me baleti ira na mate. E dina ga niu sa vakayacora tiko e dua na cakacaka vinaka me baleti ira na tamata era gadreva na noqu veivuke, au a se sega tiko ni vakatarai au meu ciqoma na veivuke taucoko au gadreva tu.

Ena gauna oqo niu dau lako ki na valetabu, au na vakaraica e dua na ivurevure ni gunu ka tu vakadua meu gunu. Au vakatarogi au se vakacava na titobu ni noqu gunu tiko mai na ivurevure ni wai ni bula. Dau noqu isaunitaro: E se sega ni titobu sara. Ia na noqu karamaca e toso cake tikoga.