Veibulago ena Lotu

Gadrevi na iTaba ni iTabagone

Na ikau ni Muavata ena yabaki oqo “Ia mo dou tudei ena vanua tabu ka kakua ni yavalati rawa” (V&V 87:8). Kemuni na cauravou kei na goneyalewa, sa vakasaqara tiko na Liaona na kemuni itaba ni ko ni tucake tu ena vanua tabu eso. Na itaba eso ni nomuni kana vata tiko vakamatavuvale, veiqaravi, vakayacora tiko na cakacaka ni kaulotu, cakacaka ni liga, vulica tiko na kosipeli, vakadidike ni veika bula, kei na vuqa tale! Mo na vakauta yani vaqo na kemu itaba:

Me dua e tabaki iko ni ko tucake tu ena dua na vanua tabu.
Imeli taka na kemu itaba ituvaki cecere ki na liahona@ldschurch.org.
Vola e dua na kena ivakamacala na vuna e tabu kina vei iko na vanua oqo.
Ena nomu imeli, vola kina na yacamu taucoko, tikinisiga o sucu kina, tabanalevu kei na iteki (se tabana kei na tikina, kei na nodrau imeli na nomu itubutubu.

Ena tabaki tiko na kedra itaba na itabagone e veiyasai vuravura ena ilavelave ka tarava.

Siko Vanua ki Morocco na iApositolo

Ni oti na nona tauyavutaka ena Tiseba ni 2012, na ika 3,000 ni iteki ni Lotu mai Sierra Leone mai na Ra kei Aferika, a siko vanua yani o Elder Jeffrey R. Holland ena Kuoramu ni iApositolo Le Tinikarua ki na dua na tabana lailai ni Lotu ka tiko vakatikitiki mai Rabata, e Morocco.

Ena dua na lotu digitaki ena yakavi ni Sigatabu, a wasea kina o Elder Holland na nodra sa lomani ira tiko na lewe ni Lotu yadua e vuravura raraba o ira na iliuliu ni Lotu, se cava sara na lailai ni kedra iwiliwili se na yawa ni vanua era tiko kina.

“O ni sega ni guilecavi, ka ko ni sa tiki ni cakacaka veivakurabuitaki oqo ena nona sa kila ka maqusataka tiko na Turaga na nodra vakasokomuni na Isireli ena itabagauna cecere oqo,” a kaya o koya.

Vakatabui na Valetabu e Tegucigalpa Honduras

Ena Sigatabu, na ika 17 ni Maji, 2013, ni oti e dua na veivakamarautaki vakavanua kei na tolu na macawa ni siga dola raraba, a vakatabui kina na Valetabu e Tegucigalpa Honduras ena tolu na soqoni, ka kaburaki ki na taba ni Lotu taucoko mai Honduras vata kei Nicaragua.

Era sa rekitaka vakaidina na lewenilotu e Hondura, mera raica na kena sa vakatabui na isevu ni nodra valetabu, ni taumada e a dau vica toka na auwa na nodra gole ki na Valetabu e Guatemala City Guatemala. E ratou a vakaraitaki raraba taumada na Mataveiliutaki Taumada na tara ni valetabu oqo ena ivola ni ika 9 ni June, 2006, ka vakayacori na vakasobuduru ena vanua vata ga oqo ena ika 12 ni Sepiteba, 2009.

Siko Vanua o Peresitedi Monson ki Jamani

A siko vanua yani ki Jamani o Peresitedi Thomas S. Monson ena mua ni yabaki 2012 me laki sotavi ira na lewe ni Lotu mai Hamburg, Berlin, Munich, kei Frankfurt, e Jamani, ka vakasalataki ira mera muri Jisu Karisito.

“A vakavulica na veivosoti ena nona a veivosoti,” a kaya oqo vei ira na lewenilotu e Frankfurt. “A vakavulica na yalololoma ena nona a yalololoma. A vakavulica na dina ena nona soli Koya yani.”

Era sa vakaraitaka tu oqo na itabagone ena veiyasai vuravura na nodra sa tudei tu ena veivanua tabu.