Macawa ni Siga ni Mate

Sa mai vakayacora na noda iVakabula o Jisu Karisito na Veisorovaki—ka oka kina na Nona vakararawataki mai Kecisemani, Nona Rube ena Kauveilatai mai Kolikoca, kei na Nona Tucaketale mai na ibulubulu—ena iotioti tiko ni macawa ni Nona bula.

Ena Matabose mai Lomalagi ni bera ni buli ko vuravura, a vakaraitaka na Tamada Vakalomalagi na Nona ituvatuva baleti keda, na Luvena. Eda a kaila ena reki ena gauna sa digitaki Jisu Karisito kina na Tamada Vakalomalagi me mai vakayacora na ituvatuva ni veivakabulai (raica na Jope 38:7 kei na Eparama 3:27). A sucu mai vei Meri e Peceliema, ka bula voli o Jisu ena bula sega ni cala. Ena vuku ni Nona Veisorovaki, sa rawa kina vei keda meda laki bula vata tale kei na Tamada Vakalomalagi ka ciqoma na bula tawamudu. Ena lesu tale mai o Jisu Karisito ena kaukauwa kei na lagilagi me mai bula voli e vuravura ena gauna ni Mileniumi, ka na tu o Koya me Turaga ni Lewa ni tamata kecega ena iotioti ni siga.

Oqo na iyaloyalo mai na vidio ni iVola Tabu e vakatakarakarataka tiko na iotioti ni macawa ni Nona bula na iVakabula. Sa rawa mo wilika na tiki ni ivolanikalou era sa volai tiko me baleta na iyaloyalo yadua. Me baleta na itukutuku taucoko ni veika a yaco, mo rai ki na ituvatuva ni va na Kosipeli ena Bible Dictionary se iDusidusi ki na iVolanikalou. Era sa vakarautaki tu na vidio ni iVola Tabu ena biblevideos.lds.org.

Ena ikalima ni siga ni bera na Lako Sivia, a vodoka yani o Jisu e dua na asa me vaka sa parofisaitaki tu mai. Era sa kilai Koya na tamata ni sa nodra Tui, ka ra kailavaka “Osana,” ka ra tevuka na nodra isulu kei na drauniniu ena qele ena mata ni asa. (Raica na Maciu 21:1–11; Marika 11:1–11; Sakaraia 9:9.)

Images © IRI

Ena ikarua ni gauna ena Nona cakacaka vakalotu e vuravura, a vakasavasavataka kina o Jisu na loma ni valetabu. “A noqu vale ena vakatokai me vale ni masu; ia dou sa cakava me nodra qara na daubutako,” a kaya vei ira na dauveisau ilavo (Maciu 21:13). Era sa qai lako mai Vua ena valetabu e so na tamata mataboko kei na lokiloki, ka sa vakabulai ira. Ia ni ra sa raica ko ira na bete levu kei ira na vunivola na Nona cakamana, era sa cudru sara ka saga mera vakamatei Koya. (Raica na Maciu 21:12–17; Marika 11:15–19.)

Images © IRI

A lomasoli o Jisu Karisito, na Luvena e Duabau Ga na Tamana, me gole mai ki vuravura me vakabulai ira na tamata kecega mai na Lutu. (Raica na 1 Nifai 11:16–22, 26–33; Alama 7:10–13.)

Images © IRI

Ena loma ni macawa taucoko, a cauraka kina na iVakabula eso na Nona vunau taleitaki duadua, oka kina na Nona veivakavulici baleta na nona ilavo lailai na vada. (Raica na Marika 12:41–44; Luke 21:1–4.)

Images © IRI

Ena Were o Kecisemani, a tekiduru na iVakabula ka masu, na Nona rarawataka na ivalavala ca kei vuravura a vakavuna me “sautaninini e na mosi ni veivakararawataki ko ya, ka bunotaka na dra, ka sa yaluma sara kina na yago[na] kei na yalo[na]” (V&V 19:18). Era sa totolo mai o Jutasa Isikaritoi kei na ilawalawa vakaiyaragi mera mai vesuki Jisu, era sa qai lako tani taucoko na tisaipeli mai vua na Turaga ka dro yani. (Raica na Maciu 26:36–56; Marika 14:32–50; Luke 22:39–53.)

Images © IRI

Ena gauna ni iotioti ni vakayakavi, a yalataka kina o Jisu vei iratou na Nona iapositolo ni ratou na ciqoma na Dauveivakacegui, se Yalo Tabu, ena gauna sa gole kina o Koya. A vakavulica me ratou daunanumi Koya ni votai vei iratou na sakaramede. Ni sa yakavi mai, a laki cabora o Jisu na Masu ni Veinanumi, ena Nona masulaka me ratou na duavata na tisaipeli. (Raica na Maciu 26:17–30; Marika 14:12–26; Luke 22:14–32; Joni 13–17.)

Images © IRI

Ni oti na veilewai butobuto kei na kanakuita voravora, a soli Koya o Jisu Karisito me rube ena kauveilatai, me vakayacora kina na “ilutua ka iotioti ni soro” me rawa kina ni ra vakabulai taucoko na luve ni Kalou (raica na Alama 34:14–15). Ni bera ni lutu na karobo, era a tukuca sobu na yagoi Jisu o ira na Nona ilawalawa mai na kauveilatai, daramaka Vua na isulu lineni kei na ivakaboi, ka vakotori Koya ena ibulubulu. (Raica na Maciu 27; Luke 23; Marika 15; Joni 19.)

Images © IRI

Ni sa kida mai na mataka ni Sigatabu, era yaco yani ki na ibulubulu o Meri Makitala kei na so tale na marama yalodina mera laki lumuta na yagoi Jisu. E ra raica ni sa vaqiqici laivi tu na vatu ka rau tukuna mai e rua na agilosi na itukutuku rekitaki: “Sa sega eke ko koya: sa tu caketale” (Maciu 28:6). Sa mai valuta na iVakabula sa tucaketale na mate vakayago ka sa rawa kina vei keda yadudua meda na bula tale: “Ni sa qai mate kecega ena vukui Atama, ena vakabulai kece talega e na vukui Karisito” (1 Korinica 15:22.) (Raica na Maciu 28; Marika 16; Luke 24; Joni 20).

Images © IRI