Na Yalo Tabu e Veivakacegui, Veivakauqeti, ka Vakadinadinataka

Na isolisoli ni Yalo Tabu sa dua na veivakalougatataki cecere eda rawa ni ciqoma ena bula oqo, ni Yalo Tabu sa dau veivakacegui, veivakauqeti, veivakaroti, veivakasavasavataki ka dusimaki keda. Sa rawa me vakasinaiti keda ena “inuinui kei na loloma levu sara” (Moronai 8:26). E vakavulica o koya na “dina ni veika kecega” (Moronai 10:5). Eda na ciqoma na ivakatakila kei na isolisoli vakayalo ni Kalou mai vua na Yalo Tabu. Na kena bibi duadua, eda na ciqoma na ivakadinadina baleta na Tamada Vakalomalagi kei Jisu Karisito mai vua na Yalo Tabu.

Ni se bera na nomuni papitaiso, ko ni na vakila na Yalo Tabu ena veigauna eso. Ia mai na ciqomi walega ni isolisoli ni Yalo Tabu ni oti na nomuni papitaiso ena rawa mo ni marautaka kina na itokani tudei ni yalo Tabu, ni ko bula kilikili tiko. Na isolisoli oqo e dau solia e dua na lewe ni Matabete i Melikiseteki ena veitabaki ni liga (raica na Cakacaka 19:6; V&V 33:15). Na vei Siga ni Vakacecegu e tarava, sa rawa mo vakavoutaka kina na nomu veiyalayalati ni papitaiso ena nomu kania na sakaramede ka ciqoma kina na veivakalougatataki ni Turaga me rawa kina ni “tiko ga kei [kemuni] na nona Yalo Tabu” (V&V 20:77).

Na Yalo Tabu e dau vakatokai talega me Yalotabu, na ikatolu ni Lewetolu Vakalou. E vakavulica o Parofita Josefa Simici: “Raica sa vakalewena ka vakasuina ko koya na Tamada; io sa vakayago me vaka na tamata; sa vakatale ga kina ko koya na Luvena; ia na Yalo Tabu sa sega ni vakalewena se vakasuina, raica sa yalo ga ka sa vaka na ibulibuli ni tamata. Kevaka me sega ni vakakina, ena sega ni rawa ni mai tiko vei keda na Yalo Tabu” (V&V 130:22).

“Io sa laivi ira na Yalo ni Turaga ni sa sega ni dautiko ko Koya e na vale dukadukali” (Ilamani 4:24), sa dodonu kina meda kilikili kaya me tiko kina vei keda o Koya. Eda na vakayacora oqo, mai na veika tale eso, o ya na vakasama savasava, bula voli ena dodonu, ka vakasaqara meda maroroya tiko na vunau.

Ni da sa ciqoma na isolisoli ni Yalo Tabu, eda na cakava rawa e vuqa na ka meda sureta kina na Nona veivakauqeti ki na noda bula:

Masu.
Vulica na ivolanikalou.
Kilikili mo votai ena sakaramede.
Sokalou e valetabu.
Raica na veimataqali itukutuku savasava, vosa kilikili, ka mo vakasama dodonu.

iTaba mai vei Christina Smith, Eve Tuft, Cody Bell, kei Matthew Reier