NA SALA E TINI MO KILA KINA NI KO SA Saumaki

Mai vei Tyler Orton

O Tyler Orton e vakaitikotiko mai Java, Indonesia.

Au a vulica ena soqoni ni matabete ni dua na inaki ni Matabete i Eroni oya me vukei keda “meda saumaki ki na kosipeli i Jisu Karisito ka bulataka na kena ivakavuvuli.”¹ A sega ni matata tiko vei au se cava na ibalebale ni “meda saumaki ki na kosipeli i Jisu Karisito.” Au a tarogi rau na noqu itubutubu kei ira na tuakaqu se cava era nanuma ni kena ibalebale, ka keimami veivosakitaka vata e vica na sala e rawa ni o raica kina ni o sa saumaki tiko.

Ena tiko tale beka eso, ia oqo e 10 na sala keitou a duavata kina. Me vaka ni saumaki e dua na cakacaka ni bula taucoko, e sega ni dodonu meda na vinaka sara ena dua na iwase oqo, ia e rawa ni ra vukei keda ni kila kevaka eda sa tosocake tiko.

Ni o sa saumaki, o sega walega ni kila na cava mo na cakava ia o na gadreva talega mo kitaka na veika dodonu. Ena sega ni na rauta kevaka meda na yawaka na cala baleta ni o rerevaka mo na tobo se totogitaki. Ni ko sa saumaki vakaidina, o sa vinakata saraga mo digitaka na dodonu.
E dua tale na ivakatakilakila ni saumaki mai oya ni sa sega tale ni tiko na gagadre mo na cakacala. O ira na Anitai-Nifai-Liai era sa ivakaraitaki vinaka ni ka oqo. Ni ra sa saumaki oti ki na kosipeli i Karisito, era sa “veiyalayalati kei na Kalou mera qaravi Koya ka muria na nona vunau” (Mosaia 21:31). Me vakataki ira na Nifai ka vakavulici mai vei Tui Penijamini, era sa “biuta tani na gagadre ca” (Mosaia 5:2). Sa yaco mera saumaki vakaidina ki na kosipeli i Karisito, ka sega ni rawai ira rawa na veitemaki i Setani.

Era buluta na nodra i yaragi o ira na Leimani era sa saumaki me vakaraitaka ni ra na dinata na nodra veiyalayalati mera muria na kosipeli (raica na Alama 24).
Ni ko sa saumaki, o sa na vakabibitaka cake na veika e nanuma na Kalou mai na veika era nanuma na tamata me baleti iko. Era dau gunu vakalevu na gonevuli ena noqu koronivuli e Indonesia. Eso na gauna e rawa ni veitemaki na ilakolako vakaveilasamaki ka ni ra gunu kece tiko ka vakalialiai iko ni o sega ni lako. A sureti ena vuqa na gauna na taciqu me gunu ka veilasamaki, ia a sega ni vakayacora—e a tutaka na veika e vakabauta. E a ka dredre dina, ka dau tiko taudua e vale ena levu na bogi. Ena nodra vakamoce vua na gonevuli ena nona tuvaitutu, e vica na tamata era a wasea vata kei koya na nodra kurabuitaka na nona rawa ni ravuta na veivakatotogani vakaicaba ka dinata na nona itagede. Era tukuna vua na levu ni nodra rai cake vua baleta na ka oya. E vakaraitaka okoya ni a saumaki ena nona vakatikitikitaka na veivakatotogani vakaicaba.
Ni o saumaki, o na tovolea ena nomu igu mo na bulataka tikoga na kosipeli—sega walega ena Sigatabu se gauna ga e ganita ia ena veigauna taucoko. Na nomu ivalavala me kua ni veisau ni ka tiko vei koya o tiko vata se okoya e rawa ni vakaraici iko tiko. Ni ra talanoataka na nomu icaba e dua na veiwali ca se vinakata na saravi ni iyaloyalo vakasisila, o na sega ni vakamuri ira baleta ga ni sega ni dua e vakararai tiko; ia ena nomu tutaka na ka o vakabauta.
Ni o sa saumaki, o na yalovinaka cake ka dauveikauwaitaki ena nomu veimaliwai kei ira tale eso. O na sega ni vakalelewa se veivakacacani se daukakase. O na kauwaitaka na lomadra tale eso, ka sa na matau mai na qarai ni veisala ni veiqaravi kei na veivuke. Kevaka o taubaletaka tiko na olo ni nomu koronivuli ka dua e vakalutuma na nona ivola, o na sega ni vakasamataka tale na ka mo na cakava. O na tuvakadua ka veivuke.
Ni o sa saumaki, na nomu gagadre ni masu ena vakaikuritaki ka o na vakila ni o sa veivosaki vakaidina tiko kei na Kalou ni o masu. Mo na dau vakagalalataki iko tikoga mo masu se vakacava na lomamu se cava ga e yaco tiko ena nomu bula. A tukuna vei keimami o Peresitedi Ezra Taft Benson (1899–1994), “Kevaka e sega ni lomada na masu, ia meda na masu me yacova sara ni sa lomada mai na masu.”²
Ni o sa saumaki oti, o na nanamaki ki na Sigatabu baleta ni Siga ni Vakacecegu. Ni yaco mai na Sigatabu, me kua ni vaqo na nomu vakasama, “oilei, qo na siga au na sega ni rawa ni gade vata kina kei ira na noqu itokani ka laki sara iyaloyalo,” ia me vaqo! “Wananavu, sa dua na siga au rawa ni lako kina i lotu ka vakanamata ki na veika vakayalo ka vota na gauna vata kei iratou na noqu matavuvale!”
Ni o sa saumaki, o na muria na ivakaro ka sega ni vaqara iulubale, veivakatauvatani tovo, se tovolea mo kunea eso na veitikina duidui. O na sega ni tovolea mo siova na iyalayala; o na muria ga vakamatau na ivakaro baleta ni o kila ni sa ikoya oya na sala vinaka cake.
Ni o sa saumaki, o na nanamaki ki na saumi ni nomu ikatini. O na raica me vaka e dua na dodonu ka vakila ni 10 na pasede e sega soti sara ni levu, vakabibi ni vakatauvatani kei na veivakalougatataki kei na yalovakacegu o rawata. Na veivakalougatataki oqo e ka vakaitamera sara mai na ilavo o sauma.
Ni ko sa saumaki, ena tiko vei iko na gagadre kaukauwa mo vukei ira tale eso mera kila na dina kei na bula marau ko sa mai kunea. E dua na ivakaraitaki vinaka mai na ivolanikalou na raivotu nei Liai, ka vakatakila na nona gagadre kaukauwa me wasea na vuanikau kamica ni vunikau ni bula kei ratou na nona matavuvale. Ena nona kania na vuanikau, e sega ni nanuma vakailiu okoya me taura vakalevu me baleti koya ia me vakaraici iratou na nona matavuvale me rawa ni ratou kania talega na vuanikau ka rawata vakatatauvata na bula marau (raica na 1 Nifai 8:12).

Me kena vakalekaleka, o na kila ni o sa saumaki tiko ena nomu sa tekivu muria na lawa cecere, na kosipeli i Jisu Karisito. O sa bulataka na yalo ni lawa vakatalega kina na vuna dina. O sa bulataka na kosipeli ena kena ivakatagedegede taucoko ni nomu bula. O sa bulataka na kosipeli ena kena taucoko, sega ni baleta ni sa dodonu ia baleta ni o vinakata. O sa tamata mamarau ka vinaka talega, ka o sa vinakata mo vakataka na tamata e vinakata na Tamada Vakalomalagi mo vaka. O vinakata mo vakataki Jisu Karisito ka muria na Nona ivakaraitaki. Ni o sa vakataka na tamata oya, o sa na saumaki vakaidina.

iCake: droini ni taba © IRI; coins © isStockphoto.com/Thinkstock; Raivotu nei Liai me baleta na Vunikau ni Bula mai vei Robin Luch © IRI