Kilai Vakavinaka na Papitaiso

Mai Vei Marissa Widdison

Mekasini ni Lotu

O cei ena papitaisotaki au?

O koya mena papitaisotaki iko e dodonu me lewe ni matabete—na kaukauwa me cakacaka ena yaca ni Kalou. Ena gauna sa gadreva kina o Jisu me papitaisotaki, a gole vei Joni na Dauveipapitaisotaki, ni tiko vua na matabete (raica na Maciu 3:13).

O koya mena papitaisotaki iko ena kerea na veivakadonui mai vei nomudou bisopi se peresitedi ni tabana.

E dodonu beka meu na tabadromuci e wai meu papaitaiso kina?

A papitaiso o Jisu ni a tabadromuci, ka kena ibalebale ni a dromuci taucoko e loma ni wai ka lamata cake tale mai (raica na Maciu 3:16). Oqori na ivakarau mo na papitaiso kina. Na papitaiso vakaoqo e vakavotuya vei keda ni da sa biuta vakadua na noda bula makawa ka tekivuna e dua na bula vou e soli taucoko ki na qaravi Kalou kei ira na Luvena.

Na veika cava au na yalataka niu sa na papitaiso?

Ni ko sa papitaiso, ko sa vakayacora e dua na veiyalayalati, se iyalayala veidolei, kei Tamada Vakalomalagi. Ko sa na yalataka Vua ni ko na cakava na veika eso, ka sa yalataka kina o Koya me na vakalougatataki iko. Na veiyalayalati oqo e tukuni tiko ena masu ni sakaramede e dau cavuti tiko ena vei Sigatabu yadua (raica na V&V 20:77–79). O yalataka:

Mo daunanumi Jisu karisito.
Mo maroroya na Nona ivakaro.
Mo taura vei iko na yaca na Karisito, ka sa kena ibalebale mo vakaliuca kina nomu bula na Nona cakacaka ka cakava na veika e vinakata o Koya ka sega ni ka e vinakata o vuravura.

Ni ko maroroya tiko na yalayala oqo, sa yalataka tu na Tamada Vakalomalagi ni na tiko vata kei iko na Yalo Tabu ka na vosoti na nomu ivalavala ca.

Na cava na Yalo Tabu?

Na isolisoli ni Yalo Tabu sa dua vei ira na isolisoli talei dina nei Tamada Vakalomalagi. Ena sega ni taucoko sara na nomu papaitaiso e wai me yacova ni ra sa vakalougatataki iko o ira na lewe ni Matabete i Melikiseteki mo ciqoma kina na Yalo Tabu (raica na Joni 3:5).

Na Yalo Tabu e dua vei iratou na Lewetolu Vakalou. E vakadinadinataka na Tamada Vakalomalagi kei Jisu Karisito ka vukei keda meda kila na veika dina. E vukei keda meda kaukauwa vakayalo. E vakaroti keda baleta na veika rerevaki. E vukei keda meda vuli-ka. Sa rawa me vukei keda na Yalo Tabu me da vakila na loloma ni Kalou.

Ni ko sa vakadeitaki mo sa lewe ni Lotu, sa na rawa me tiko vata kei iko ena veigauna na Yalo Tabu kevaka o digitaka tiko na ka dodonu.

Na cava e dodonu kina meu qai papitaiso niu sa yabaki walu?

E vakavulica na Turaga ni sega ni dodonu mera papitaiso na gonelalai me yacova ni ra sa qase cake mera kila kina na vinaka mai na ca, o ya ni ra sa yabaki walu me vaka e tukuna na ivolanikalou (raica na Moronai 8:11–12; V&V 29:46–47; 68:27).