Veituberi ni Veiliutaki e Vuravura Raraba—e dua na Rai Vou

Ena veivula mai oqo, era na vakaitavi tiko na lewe ni Lotu e vuravura raraba ena dua na rai vou veivakauqeti ki na Veituberi ni Veiliutaki e Vuravura Raraba.

Na kena oqo ena duidui mai na kena era a vakayacori e liu, ni na sega ni kaburaki vakayadua yani na Veituberi ni Veiliutaki e Vuravura Raraba ni yabaki oqo kivei ira na iliuliu ena tabanalevu kei na iteki. Ia, sa na vidai oqo ki na ciwa na wase leleka—ena dua na DVD ka vakakina ena LDS.org—ka ra na vakauqeti mera veivosaki kina na iliuliu, lewenilotu, kei na matavuvale ena yabaki mai oqo kei na veiyabaki muri mai.

Ena vakatabakiduataki tiko ena vuli oqo na “Vaqaqacotaki ni Matavuvale kei na Lotu mai na Matabete.” Ena vuli oqo, era na veivakasalataki veivakauqeti tiko kina na lewe ni Mataveiliutaki Taumada kei na Kuoramu ni iApositolo Le Tinikarua kei ira na Vakaitutu Raraba kei ira na vakailesilesi raraba ena:

• Sala mera kune qaqaco kei na vakacegu kina na matavuvale ena kaukauwa ni matabete.

• Na sala mera sotava kina na matavuvale yadua na veivakalougatataki ni matabete.

• Na sala mera vaqaqacotaka kina na itikotiko kei na matavuvale o ira era taura tu na idola ni matabete.

• Na sala me vakayacori kina na veiqaravi Vakarisito.

• Na sala mera susugi cake kina na gone ena rarama kei na dina.

Era na taura na tabanilotu kece ni Lotu na nodra ilavelave ni DVD, ka ra sa kerei na matabose ni tabanalevu kei na iteki mera sarava na veika taucoko e tiko kina. Sa oti mera na qai veivosakitaka vata na sala me rawa ni yaga na ivakasala oqo vei ira na lewenilotu ena tabanalevu kei na iteki.

Sa rawa vei ira na na lewenilotu ena soqoni kei na kalasi, mera sarava ka veivosakitaka na wase yadua era tiko ena DVD oqo. Sa rawa ki na matavuvale kei na tamata yadua mera sarava na wase yadua, vata kei na ikuri ni ivurevure me vakarabailevutaki kina na nodra vuli, ena wwlt.lds.org.

Ena veigauna yadua, ena vakavatukana na tikina kaukauwa yadua ni vuli oqo ni sa oti e dua na wase ka tekivu na kena veivosakitaki. Na gauna era na vakasamataka vakatitobu, wasea, ka vakadinadinataka kina na iliuliu, kei na matavuvale na veika era sa rogoca ka vakila, ena yaco me vakauqeti ira na Yalo Tabu ka vakavulici ira ena sala mera bulataka kina na ivakasala oqo ena nodra dui ituvaki ni bula. Mai na veika sa sotavi oqo, ena veivuke na Veituberi ni Veiliutaki e Vuravura Raraba oqo me vaqaqacotaka na matavuvale kei na Lotu e vuravura raraba.

E ratou na liutaka tiko e dua na mataveivosaki o Elder L. Tom Perry, Elder Donald L. Hallstrom, kei Bisopi Dean M. Davies me baleta na bibi ni kena vakayagataki na idola ni matabete.

Era tucake tu oqo e tautuba ni vale nei Mary Fielding Smith ena This Is the Place Heritage Park, o Elder M. Russell Ballard, Linda K. Burton, Elder Ronald A. Rasband, Elaine S. Dalton, Rosemary M. Wixom, kei Bisopi Gary E. Stevenson ni veivosakitaki tiko na veivakalougatataki ni kena tiko na matabete ena itikotiko yadua.