Vakamuri ni Veikacivi me Vuqa Tale na Daukaulotu: Susugi na Vakasama ni Kaulotu ena iTikotiko vakakina ena Lotu
E dabe tiko oqo o Bisopi Victor Nogales ena Tabanalevu o Parque Chacabuco, ena Iteki o Buenos Aires Argentina Congreso ena mata ni dua na vava ni itukutuku era tabaki tu kina na kedra iyaloyalo e 37 na cauravou kei na goneyalewa ni nona tabanalevu. Ni dua vei ira e biubiu me laki kaulotu, ena vola toka o koya e dua na ka e yasa ni iyaloyalo o ya.
“Era dau yalo mamarau na noqu itabagone ni ra dau curu mai ki na noqu valenivolavola ka ra raica na itaba kei na ka e volai tu kina,” a kaya. “E vakauqeti ira mera vakavakarau ki na nodra kaulotu.”
E vakaraitaki vinaka tiko na tabanalevu oqo e Buenos Aires ena yalo ni cakacaka ni kaulotu. Ena imatai ni ono na vula ni 2012, era a biuta na nodra itikotiko e lewe 19 na itabagone—ka 14 vei ira era saumaki mai—mera laki kaulotu tudei ki na walu na matanitu. Era sa vakadeitaka e sivia na 80 na pasede na itabagone era kilikili kaya mera laki kaulotu.
Ena veiyabaki sa oti era a kerekere kina vakavica na iliuliu ni Lotu kivei ira na itabagone mera laki kaulotu.
Ena gauna ni koniferedi raraba ni Epereli 2005, ni oti toka ga na kena tavoca na Lotu na Vunautaka na Noqu Kosipeli: iDusidusi ki na Veiqaravi ni Daukaulotu, a veivakasalataki kina vei ira na matavuvale kei ira na iliuliu o Elder M. Russell Ballard ena Kuoramu ni iApositolo Le Tinikarua mera susuga cake e dua na yalo ni kaulotu ka vakarautaki ira na cauravou kei na goneyalewa mera veiqaravi ena veidokai ena nodra vukei mera kila vakavinaka o cei o ira ka vakavulici ira ena ivunau (raica na “E Dua Tale” Liaona, Me 2005, 69).
Na itukutuku raraba nei Peresitedi Thomas S. Monson ena koniferedi raraba ni Okotova 2012 o ya me sa vakalailaitaki sobu na yabaki ni bula ni kaulotu sa veivakananumi tiko kina ni sa maqusataka tiko na Turaga na Nona cakacaka.
Nikua e vuqa na matavuvale kei na iliuliu ni Lotu era sa ciqoma e yalodra taucoko na itukutuku oqo ka ra sa tauyavutaka e dua na ivakarau tudei bulabula ni kaulotu ena nodra vanua.
Nodra Vukei na iTabagone Mera Kila Vakavinaka O cei O Ira
Me isau ni taro, “O sa veivuke tiko vakacava mera vakarautaki e vuqa na nomuni itabagone mera gadreva na laki kaulotu?” E sauma kina vakaoqo o Bisopi Nogales, “Na gauna au a kacivi kina meu bisopi, au a kauwai taumada vei ira na itabagone ni noqu tabanalevu, kau a vakamatatataka kina vei ira na iliuliu ni tabanalevu tale eso ni sa gadrevi meda tiki ni nodra bula.”
Me vakataka, o ira taucoko na daukaulotu e Chacabuco era a taura tu na veikacivi eso ena tabanalevu ni bera ni ra biubiu yani. Sa dau vakavuqa mera sureti o ira na saumaki vou mai kei ira na lewenilotu luluqa mera mai veiqaravi vaka-qasenivuli, ka vukei ira kina mera vakavakarau ki na nodra vakavulica na kosipeli.
A vakarautaki ira talega vakayalo na itabagone o Bisopi Nogales ki na dua na ilesilesi ena nodra cakacaka vata kei ira na daukaulotu tudei e kea.
Ena nodra sa veiqaravi vinaka na iliuliu ni Lotu e kea kei ira na lewenilotu kivei ira na itabagone ni tabanalevu, era sa dolei mai kina ena nodra raica na kena sa tubu cake sara na yalo ni kaulotu.
Na Matavuvale e Vakanananu Tiko Ki na Kaulotu
E rau kila vinaka tu o Garth kei Eloise Andrus mai Draper, Utah, e Amerika na ibalebale ni dua na matavuvale e vakanananu tiko ki na kaulotu. E 17 na makubudrau tagane era sa kaulotu oti, ka ono na vula na nodrau veiqaravi talega vakadaukaulotu.
Na kena susugi cake ena nomu matavuvale e dua na yalo ni veiqaravi ni kaulotu sai koya e dua na ka e tekivu mai na gauna era se lalai kina na gone, e kaya o Baraca Andrus.
E duavata kina o Sisita Andrus. A kaya, “Mo kua ni laiva na laki kaulotu me vaka e namaki lo tiko, ia mo vosa vei iratou na luvemu kei na makubumu me baleta na ka oqo me vaka ni sa sega tale na kena vakatataro me vaka oqo—na gauna o sa na laki kaulotu kina, ka sega ni kevaka”.
Sa ka bibi talega na nodra vakavulici na itabagone mera kilai ira tiko ena tuvanaki ni dua na ivakaraitaki ni veiqaravi ni kaulotu. Rau a ciqoma o Baraca kei Sisita Andrus na isevu ni nodrau veikacivi ena 1980, ena gauna sa biubiu tiko kina o luvedrau gone duadua me laki kaulotu.
A volavola vei rau o luvedrau tagane oqo ni oti na nona taura e dua na iloloma rau a vakauta yani me vukei koya me vakavakarau ki na nona kaulotu. “A vakavinavinakataka mai na [iloloma o ya], ia a kaya, ‘Sa ka bibi cake ga na ivakaraitaki drau a vakaraitaka tu mai,’ ” a kaya o Sisita Andrus.
Vakavulica na Vunau
“E tu vei ira na noda itabagone na dodonu mera na namaki ira na nodra itubutubu, iliuliu Vakalotu kei na qasenivuli me ra raica ni ra kila, ka kila vinaka tu na kosipeli i Jisu Karisito,” e kaya o Elder Ballard. “Ena vakadeitaka na dina ki na yalodra na Yalo Tabu ka na utura e lomadra na Rarama i Karisito. Ka ni na qai rawata kina e dua tale na daukaulotu sa taucoko tu na nona vakavakarau” (M. Russell Ballard, “E Dua Tale,” 71).
E rauta toka ni 6,000 na maile (9,600 na kilomita) vakatikitiki mai Buenos Aires, ena Tabana o Horseshoe Bend volekati Boise, Idaho, mai Amerika, sa vakavatukanataki tale tikoga kina na toro cake ni cakacaka ni kaulotu vaka-matavuvale kei ira na iliuliu mera vaqaqacotaka na sasaga ni kena vakavulici na kosipeli vei ira na nodra itabagone.
Mai na dua na tabana ni 75 na kena lewenilotu, era sa kaulotu tiko e lewe ciwa na kena itabagone.
E vakamatatataka kina o Elder Russell M. Nelson ena Kuramu ni iApositolo Le Tinikarua na inaki kei na kena yaga na kaulotu. “O ira kece na daukaulotu … era veiqaravi ena dua ga na inaki o ya me na vinaka cake na bula vei ira tale eso na tamata,” a kaya. “Na vakatulewa ni qaravi kaulotu ena tarā cake na nona icavacava vakayalo na daukaulotu, na watina, kei ira na nodrau kawa ena veitabatamata mai muri. Na gagadre ni veiqaravi sa ivatuka ni nona saumaki mai, bula kilikili, kei na tu vakavakarau e dua na tamata” (“Tarogi Ira na Daukaulotu! E Rawa ni ra Vukei Iko!” Liaona, Nove. 2012, 18).
E duavata kina o Martin Walker, na peresitedi ni iTeki o Emmett Idaho. “Na kaulotu ena tuvanaka e dua na itabagone ena dua na salatu ka na vakayaco-ka vei ira na itabatamata,” a kaya. “Na iteki, ena vakayacora na veika kece eda rawata meda vakarautaki ira na itabagone ki na veiqaravi ni kaulotu.”
E oka tiko me tiki tiko ni vakavakarau oqori o ya na nodra vakavulici na itabagone ena vunau. Era sa lewena tiko na itabagone ni Tabana o Horseshoe Bend e dua na kalasi ni vakavakarau kaulotu ena veimacawa ka veivakavulici tiko kina e dua na peresitedi vakacegu ni kaulotu—oqo na vuli sa ikuri tiko ni vuli ni daukaulotu era vakarautaka na soqoni vakavula ni vakavakarau ni kaulotu ni iteki vata kei na Keba ni Matabete i Eroni.
E dua vei iratou na lewe ono na luvei Baraca kei Sisita Andrus o ya o LaRene Adam—a veiqaravi vata kei watina, o Jim, ena Tabana ni Kaulotu e Copenhagen Denmark mai na 2007 ki na 2009. A vakadinadinataka na bibi ni nodra vakavulici na gone ena kosipeli ena itikotiko.
“E dua vei ira na ka cecere o rawa ni cakava mera vukei na luvemu mera tara cake e dua na ivakadinadina ni cakacaka ni kaulotu o ya mo ni vakayacora na nomuni lotu vakamatavuvale kei na vulici vakamatavuvale na ivolanikalou,” a kaya o koya. “Kevaka ko na solia vei ira na yavu kaukauwa o ya ni vulici ni kosipeli kei na kila na kosipeli, era na vakavakarau vakavinaka cake sara kina ka kila e levu tale na ka baleta na kosipeli.”
E tucake tu oqo o Bisopi Victor Nogales ena vava ni itukutuku kara tabaki tu kina o ira na itabagone ena nona tabanalevu, vakakina o ira era se kaulotu tiko.
E lolomataka mai na itaba o Paul L. Garvin