Evei na Vanua Meu na Taura Mai Kina e Dua na Mekasini Vakaoqo?
Sharon Rather, Nevada, Amerika.
Ena neitou a lako tiko vakamatavuvale mai Nevada, Amerika ki Alaska e Amerika, keirau a veivosaki rawa kina kei na dua na marama balavu, totoka, ka yalovinaka e toka basai au.
A taroga seu gole tiko kivei, kau kaya sara ni keitou gole tiko ki Juneau, e Alaska, me keitou laki sikovi luvei keirau tagane kei na nona matavuvale. A kaya sara mai ni o koya mai Las Vegas. A luluvu sara kina, ka tomana ni gole tiko o koya ki Juneau me laki sikovi iratou na vugona me laki vakayaco soqo ivakananumi nei watina, a vakamau tu vua me 20 na yabaki. Se qai mate oti ga ena kenisa.
Au rai yani e yasana kau vakasamataka niu kalougatata cake ena noqu kila tu na yavu ni veivakabulai ka meu dua na daucakacaka e valetabu ena Valetabu e Las vegas Nevada. Au sa mani vakasamataka na ka meu cakava vua na marama oqo meu vakayaloqaqataki koya kina.
Vakasauri ga, me vaka na rogo matata ni lali, au nanuma rawa e dua na vosa nei Parofita Josefa Simici au a veisoliyaka ena iSoqosoqo ni Veivukei. Ena gauna sa tauyavutaka kina na iSoqosoqo ni Veivukei, e raica sara o koya ni o ira na marama “era na maqusa yani mera laki vakaceguya na tamata; era na laki vakania ka vakamarautaka e dua na yalo e tiko rarawa ka nuiqawaqawa voli; era na laki vakadula na tagi ni dua na gone sa tu luveniyali ka vakamarautaka na yalona e dua na yada” (Nodra iVakavuvuli na Peresitedi ni Lotu: Josefa Simici [2007], 521).
Au rai tale vakadua e yasana kadua. Au sa raica tu e dua sa nuiqawaqawa tiko, e dua na yada e mosi tiko na yalona. Au mani nanuma sara niu a wilika na Ensign ni Julai 2011 ena mataka lailai o ya. Era umani tu kina eso na itukutuku veilaveti au nanuma ni na rawa ni vakayaloqaqataki koya ka veivakacegui.
Au sa mani yaloqaqa, cega na noqu mekasini ki na dua na itukutuku, ka kerei koya me wilika. Au vakaraici koya matua sara toka kau kurabui ni wilika yadudua sara ga na yatuvosa—e yalona dina. Ni sa wilika oti, a wilika tale o koya e dua tale na itukutuku.
E kilai sara ga ni sa tara na yalona e dua na ka a wilika. Sa mani vakabira matua toka e serena na mekasini ka qusia na wai ni matana.
“Evei na vanua meu na taura mai kina e dua na mekasini vakaoqo?” a tarogi au. Au a kaya vua ni sa rawa me nona. A qai mai wiliwili tale yani.
Ni keitou sa yaco yani e Juneau, a qumia na ligaqu o koya, raica vakadodonu mai na mataqu, ka kaya, “Vinaka vakalevu.”
Au vulica e dua na lesoni cecere mai na ka oqo. Eda sa wavoliti tu mai vei ira na tamata era yalobibi voli ka ra gadreva tu e dua na vosa ni veivakayaloqaqataki ka ra gadreva mera kila na veika eda sa kila tiko na Yalododonu Edaidai.