Kune Reki ena Kaulotu na iTabagone Daukaulotu Veiqaravi ni Lotu
E dau daramaka tu o Elder Ernesto Sarabia na nona ivakatakilakila loaloa ni daukaulotu ena veisiga yadua ni nona kaulotu. Ia a cecere na nona ilesilesi ni kaulotu mai vei ira na vuqa tale eso—ka veiqaravi o Elder Sarabia vaka-itabagone daukaulotu veiqaravi ni Lotu (TDVL) ena valenivolavola ni Tabana ni Kaulotu e Mexico Hermosillo.
“Eda kila ni rairai sega toka ni vakasama vinaka mera laki sotava eso vei ira na noda cauravou kei na goneyalewa na kaukauwa kei na bolebole e tiko ena kaulotu tudei,” e kaya o Elder M. Russell Ballard ena Kuoramu ni iApositolo Le Tinikarua. Ia oqo, a kaya, ni sega ni kena ibalebale ni sega ni rawa mera vakaitavi ena veivakalougatataki ni cakacaka ni kaulotu (“E Dua Tale,” Liaona, Me 2005, 69).
E kaya o Elder Russell M. Nelson ena Kuoramu ni iApositolo Le Tinikarua. “Na kaulotu e dua na ivalavala ni veiqaravi tawasaumi vua na Kalou kei na kawatamata” (“Tarogi Ira na Daukaulotu! E Rawa ni ra Vukei Iko! Liaona, Nove. 2012, 18, ka vuqa sara tu na sala ni kena vakayacori na veiqaravi oqo.
Kivei ira era sa vagalalataki vakavinaka mai na veiqaravi ni kaulotu tudei, se kivei ira sa dodonu mera lesu koso mai vale, sa rawa ki na parokaramu TDVL me vakarautaka e dua na gauna vakaibalebale cake ni kaulotu.
Veika Lavaki ena Veiqaravi
E dodonu vei ira na lewe ni TDVL mera tu vinaka na yagodra, vakasama, vakayalo, kei na lomadra me rawa ni ra vakayacora kina na itavi ni nodra veikacivi, ka mera veisasa vinaka kina.
Na itavi ni TDVL e rauta ni 6 ki na 24 na vula ka rawa mera veiqaravi mai na vica na siga ena veimacawa ki na kaulotu tudei. Sa tu na veimadigi ni veiqaravi yani ena itikotiko raraba ka vakakina mai na itikotiko. Na veiqaravi eso era oka tiko ena TDVL o ya na vakadidike ni tuva kawa, itukutuku vakatekinolaji, ivukevuke ena valenivolavola ni kaulotu, lololo i bisopi, kei na vuqa tale.
Veitokoni ni Matavuvale kei na Matabete
Sa rawa vei ira na itubutubu, iliuliu ni matabete, kei ira na lewe ni Lotu mera vukei ira sa namaki tiko mera lewe ni TVDL mera vakavakarau ki na kaulotu.
E ratou sa veivuke sara tiko vakaukauwa vei Sisita Eliza Joy Young na nona matavuvale, ena nodratou a draivataki koya yani ka lesumai ena valenivolavola ni Lotu e Sydney, Ositerelia.
E cakacaka tiko o Elder Michael Hillam, ena Sitoa ni Lotu e Hong Kong, ka kaya kina “E ratou a vukei au meu vakavakarau o iratou na noqu qasenivuli ni semineri ni mataka lailai kei iratou na iliuliu ni Cauravou.”
Na Solibula e Kauta Mai na Veivakalougatataki
A solia wale o Sisita Young e vica na siga ni gade mai na nona cakacaka vagauna me laki kaulotu veiqaravi ni Lotu. A kaya, “Au vakila niu sa volekata na Tamaqu Vakalomalagi niu kila niu sa vukei Koya tiko.”
Me ikuri ni veivakalougatataki vakayalo, na veiqaravi ni kaulotu ena Lotu e solia vei ira na daukaulotu itabagone na madigi yaga vaka-tamata kei na kena vakacakacaka. “Sa vakatakila vei au na noqu a kaulotu niu rawa ni cakacaka ga vakaiau,” e kaya o SisitaYoung. (A cakacaka vukei taumada o koya.)
E dina ga ni sega ni rawa vei ira taucoko na itabagone qase cake mera laki veiqaravi, sa vakayacori tiko e dua na sasaga levu me ra kovuti taucoko kina o ira na itabagone qase cake kilikili. O ira na cauravou kei na goneyalewa era gadreva mera laki veiqaravi ena ivakarau oqo mera veitaratara ga yani vei nodra bisopi se peresitedi ni tabana, era rawa ni solia vei ira na nodra madigi oqo.
Wilika na kena ikuri ena news.lds.org ena nomu vakasaqara na “itabagone daukaulotu veiqaravi ni lotu.”