Na iQaraqaravi ni Veikacivi ni Matabete

Mai vei Peresitedi Thomas S. Monson

E dua na vosa mai na koniferedi raraba ni Epereli 1987.

O sa bau vakasamataka mada na yaga ni dua na bula? O sa bau dau vakananuma beka na veika eda rawa ni rawata saraga vakaikeda?

Au a tiko ena dua na koniferedi ni iteki ka a cega kina na noqu peresitedi ni iteki eliu o Paul C. Child na Vunau kei na Veiyalayalati 18 ka tekivu me wilika: “Raica sa ka talei ena mata ni Kalou na tamata kecega” (tikina e 10).

A qai taroga o Peresitedi Child, “E vakacava sara mada na yaga ni bula ni dua na tamata?” E a levea me kaciva e dua na bisopi, peresitedi ni iteki, se lewe ni matabose ecake me sauma mai. Ia, a mani digitaka na peresitedi ni dua na kuoramu ni italatala qase.

A veilecayaki na turaga oqo ka mai toka galugalu yani ena dua na gauna balavu ka qai tukuna cake yani, “Na yaga ni dua na bula ni tamata sa ikoya na nona rawata rawa me vakataka na Kalou.”

Era vakasamataka vakabibi o ira kece era a tiko na isaunitaro oya. A tomana o Peresitedi Child na nona vosa, ia au a vakananuma matua toka ga na isaunitaro veivakauqeti oya.

Me yacovi, me vakavulici, ka tarai na bula vakamareqeti ka sa vakarautaka tu na Tamada me baleta na Nona itukutuku e sa dua dina na itavi vakaitamera. Na rawa-ka e sega ni ka rawarawa. Sa dau kena ivakarau me dau liu taumada na wainimata, veivakatovolei, veidinadinati, kei na ivakadinadina.

O ira na italai ni Kalou era dau vakacegui ena veivakadeitaki oqo ni Vakavuvuli: “Au sa tiko vata kei kemudou ena veisiga kecega” (Maciu 28:20). Na yalayala vakasakiti oqo ena tokoni kemuni na veitacini ena Matabete i Eroni ko ni sa kacivi ki na itutu ni veiliutaki ena kuoramu ni dikoni, vakavuvuli, kei na bete. Ena vakayaloqaqataki iko ena nomu vakavakarau ni veiqaravi ena buturara ni kaulotu. Ena vakacegui iko ena veigauna o dau yalolailai kina, ka dau yacovi keda kece.

“Ia, dou kakua ni oca ena cakacaka vinaka,” a kaya na Turaga, “raica dou sa tura tiko na yavu ni dua na cakacaka levu. Ia ena tubu mai ena veika lalai na veika lelevu.

Raica, sa vinakata na Turaga na yalo sa malumalumu ka talairawarawa” (V&V 64:33–34). E dua na vakabauta e taukeni, dua na veidinadinati dei, kei na dua na gagadre qaqaco vinaka e sa dau vakatakilai ira tu ga era qarava na Turaga ena lomadra taucoko.

Ke dua na turaga ka rogoca rawa na domoqu e vakila ni sega ni vakavakarau tu, vakatalega kina ena nona sega ni rawata me muria na veikacivi me veiqaravi, me soli-bula, me vakalougatataka na nodra bula tale eso, me vakasamataka mada na dina: “O koya e kaciva na Kalou, e sa vakadeitaka na Kalou.”