Na Kedra Bibi na iTokani Vinaka

Era na dauveivakauqeti sara vakaukauwa na itokani ki na noda itovo, vakabibi vei ira na noda itabagone. Era na vakauqeta na ivakarau ni nomu vakasama kei na nomu itovo, ka rawa sara ga mera vakadeitaka na ituvaki mo na laki yacova. Ia ena gauna o digitaki ira kina na itokani vinaka, “era na yaco mera veivaqaqacotaki cecere ka veivakalougatataki vei iko. Era na vukea mo tamata vinaka cake ka ra na vakarawarawataka vei iko mo bulataka na kosipeli i Jisu Karisito.²

Ena tabana (52–53) ni ilavelave oqo, e vakavulica kina o Elaine S. Dalton, na peresitedi raraba ni Goneyalewa, na bibi ni nodra vakaqarai na itokani vinaka ka meda vakakina. E kaya o koya “ni noda saga meda vakavinakataka cake e dua sa dua na ivakarau ni veitokani dina.”

Ni tarai cake na veitokani ena ivakavuvuli oqo ena vukei ira na itabagone mera bulia kina e dua na veimaliwai tudei vata kei na iwalewale ni veivinakati e uasivita yani na noda “vakaveitokani” wale tu ga ena veituvaki ni veikilai vakatamata. Sa rawa vei kemuni na itubutubu mo ni vukei ira na luvemuni mera kila vakavinaka na bibi mera sa dau itokani vinaka ka digitaka na itokani vinaka era na vakayaloqaqataki ira mera bulataka tiko na kosipeli. Ena rawa ni veivuke na vakatutu eso oqo.

Vakatutu ni Nodra Tuberi na iTabagone

Vakasaqara vakamatavuvale, ena ivolanikalou na kedra ivakaraitaki eso na itokani vinaka. Me veivosakitaki na yavuyaga cava a qaqaco kina na veitokani oqori. Raici rau mada o Tevita kei Jonacani (raica na 1 Samuela 18–23), Ruci kei Naomi (raica na Ruci 1–2), vata kei Alama kei iratou na luvei Mosaia (raica na Mosaia 27–28; Alama 17–20).³
Raicalesu na wase ni itokani ena Me iSakisaki ni iTabagone. Wasea vei ira na gone na kena a veivakauqeti ki na nomu bula na veitokani. Sureti ira mera wasea na nodra sa veivakauqeti se vakauqeti ira na itokani.
Wilika ena ilavelave oqo na vosa nei Sister Dalton. Veivosakitaka na inakinaki, a vakarautaka kina o luvena yalewa, o Emi me vakasaqarai ira na itokani vinaka. Vukei ira na luvemuni mera tuvanaka na mataqali itokani era vinakata mera vakasaqara ka vakataka.
Sa rawa mo dou lotu vakamatavuvale me wasei kina na vakasama ni kena tarai cake na veitokani, me vakataka na: “Meda vakaitokani vinaka, ka meda itokani vinaka. Vakaraitaka ni ko dauveikauwaitaki dina sara; mo matadredredre ka vakaraitaka vei ira ni ko kauwaitaki ira. Dau yalovinaka ka dokai ira na tamata kecega, ka tarovi iko mai na vakalelewa se vosavakacacani ira era tiko voliti iko.⁴

Vakatutu baleta Nodra Tuberi na Gonelalai

Ni ko sa itokani vinaka e oka kina mo vukei ira na tamata. Wilika na “Standing Up for Caleb” ena Liahona ni Maji 2009 ka veivosaki vata kei ira na luvemuni baleta na sala e rawa ni ra itovo vinaka kina vua e dua era na sotava.
Ena ituvaki kecega, eda na lewa me da sa na mataqali itokani cava. Lagata vata na “I’m Trying to Be Like Jesus”⁵ ka qai tukuna vei ira na luvemuni na sala e rawa ni ra digitaka mera itokani vakacava, vakataka na iVakabula, ena veimataqali ituvaki eso.

Yaloyalo ivakaraitaki mai vei Taia Morley