Tubu ena Qele Bulabula: iTabagone Yalodina e Uganda
A bula voli e Uganda o Cindy Smith ni a cakacaka tiko kina o watina, ka rau sa vakaitikotiko oqo e Utah, Amerika.
Ena nodrau vakadonuya ka bulataka na kosipeli i Jisu Karisito, era sa raica tiko na itabagone e Uganda ni sa tubu wavoliti ira tiko na vakabauta kei na inuinui.
Ena uto ni tokalau kei Aferika, e sa vakalougatataki tu na vanua o Uganda ena veibaba coqiqi ni vunidovu kei na vunijaina—kei ira na tamata gone ka ra sa vakarau tu mera ciqoma ka bulataka na kosipeli i Jisu Karisito.
A tauyavutaki na imatai ni iteki e Uganda ena 2010. Sa toso totolo tiko na lotu, ka levu sara na cauravou kei na goneyalewa ena tabana kei na tabanalevu yadua.
Vakaturi ni dua na Drotini, Mo dua na iVakaraitaki
Era a vakauqeti na goneyalewa ni dua na tabanalevu ena veivakavulici nei Sisita Elaine S. Dalton, na peresitedi ni Goneyalewa raraba, ena ivalavala dodonu: “Oqo na gauna vei keda yadua meda duri cake ka cekata e dua na drotini ki na vuravura ka kacivaki na vakalesui mai ni ivalavala dodonu.1 Era kabata e dua na baba na goneyalewa ka raibaleta na tauni ka vakaduria na veidrotini koula me ivakatakarakara ni nodra ibole mera ivakaraitaki ni ivalavala dodonu. Era qai lagata vata “E Ulunivanua” (Sere Ni Lotu, naba. 4).
O ira na goneyalewa oqo era sa laveta cake na nodra ituvaki ni bula ni cakadodonu.Na nodra talairawarawa e sa vaqaqacotaka na nodra ivakadinadina ka vakayarayarataki ira tale eso. A tukuna o Sisita Dalton, “Kakua ni vakawalena na kaukauwa ni nomu veivakayarayarataki dodonu.”2 Me vaka na drotini, e yaloyalo ni nodra ivakaraitaki na goneyalewa oqo ki vuravura taucoko.
Sandra
Me vakataki ira e vuqa na goneyalewa e Uganda, o Sandra e dau taubaletaka e sivia ni dua na maile ki valenilotu, veivuke ena samaki ni valenisoqoni ena Vakaraubuka, ka vakaitavi ena semineri ena Vakarauwai.Ena loma ni macawa, e dau yadra ni bera na 5 ena mataka me wili ivolanivuli, ka qai taubale ki koronivuli, ka lesu mai vale ni oti na 6 ena yakavi. A calata okoya e dua na yabaki ni vuli baleta na leqa vakailavo ia a sotavi na veibolebole ni nona bula ena rai rarama: “E sa vukei au vakaidina na kosipeli meu tudei ka sega ni yavalati rawa.”
O Sandra e lewenilotu duadua ga e nona vale, ia erau cuqeni koya na nona itubutubu ena veiqaravi vaka-Lotu, me vaka na veivuke ni tabanalevu ena samaki ni lomanibai ni dua na itikotiko ni luveniyali. E sa raica tiko na nona matavuvale na ka e sa cakava tiko na kosipeli me vukei koya me kaukauwa tiko, e dina ga ni dau sotava eso na dredre tawa wali rawa. Ni vakasamataki tiko na ivurevure ni kaukauwa oya, e kaya kina o Sandra, “Niu dau lako i lotu, au vakila me vaka au sa tokara tiko na iyaragi ni Kalou” (raica na Efeso 6:11–17).
O Susan, e dua ka qai curuvou walega oqo, e taleitaka sara na Lotu.Vaka e dua na lewenivanua mai na Ceva kei Sudan, a drotaka mai na veidredre eso na nona matavuvale ka mani vakalougatataki ena nodratou a ciqomi rau na daukaulotu e Uganda. Me vaka e dua ka tiko vakararavi, e a kunea okoya na vakacegu kei na veitaqomaki ni kosipeli. Ena Sigatabu ena dau kauti iratou na tacina ki lotu, ka vakakina e 10 tale na gone tani ka ra sega ni lewena na Lotu. Ni oti na leqa tawanamaki ni dua na lewe ni matavuvale, a lesu tale ki na Ceva i Sudan o koya, ka waraka kina na Lotu me tauyavutaki ena nona iwasewase. Rau sotava ruarua tiko na bolebole o Susan kei Sandra, ia e rau vakararavi vua na Kalou ka marautaka na vuanikau ni bulataki ni kosipeli i Jisu Karisito (raica na Alama 32:6–8, 43).
Solibula me Veiqaravi ena Kaulotu
Era tekivu qitotaka na soka na cauravou e Uganda ni ra se gone lalai, ena vakayagataki ni tabanikau ka vesuki wavoki sara vakaukauwa me polo. Mai na gauna e se gone sara kina, a tiko vei Dennis a dua na isolisoli ni qito oya, ka solia vua na nona koronivuli torocake e dua na sikolasivi me qito ena kena timi. Ni oti na nona vakacavara na koronivuli torocake, a vakarautaka na kena isau, rumu kei na kakana e dua na timi saumi. E a dua dina na tadra ka yaco vakaidina, ia e kila o Dennis ni oqo ena vakaseva na nona nakinaki me na lako malua ena kaulotu ena loma ni yabaki.
Dennis
E kaukauwa vakaidina na gagadre nei Dennis me kitaka na ka e vinakata na Tamana Vakalomalagi me cakava ka ni sega ni vinakata saraga me temaki me tiko ena timi ni yaco mai na gauna vua me laki kaulotu kina. E levu vei ira na tamata era qa-qa na nona digidigi, ia o Dennis e dei na lomana ni sa cakava na vakatulewa dodonu—me baleti koya kei ira tale eso.“Eratou se qai papitaiso ga e rua na taciqu lalai kei na ganequ,” e a kaya.“Au a sega ni nanuma ni na rogoca na kosipeli na ganequ. Niu raica na Kalou ni cakamana tiko ena noqu matavuvale, e vakararamataka na noqu vakanuinui ena veika baleti au mai muri.”
Era vulica na cauravou ena tabanalevu nei Dennis na Vunautaka na Noqu Kosipeli ena veimacawa. Era sa vaka mai e dua na ilawalawa, ena nodra cakacaka vakavoleka kei ira na daukaulotu ka kauti ira na nodra itokani ki na soqoni ni lotu ena Sigatabu kei na itaviqaravi eso, vakakina na qito basketbol kei na soka ena loma ni macawa.Era papitaisotaki ira na itokani na bete kei na so tale era vukea ni vakavulici vata kei na daukaulotu.Ni oti e vica na yabaki, era sa vakaukauwataka na tabanalevu era tiko kina na ilawalawa cauravou oqo, ka va vei ira, oka kina o Dennis, era a ciqoma na nodra veikacivi ki na Tabana ni Kaulotu e Kenya Nairobi.
Era sa vakamuria na ivakasala nei Elder David A. Bednar ena Kuoramu ni iApositolo le Tinikarua mera “sa dua na daukaulotu ni se yawa na gauna mera vakauta kina na nodra pepa ni kaulotu.”3 Era cakava vakakina ena nodra cakacaka vata vaka lewe ni kuoramu, e dua na ilawalawa ka vinaka mai na dua tale.
Era lakocuruma na bolebole na lewe va taucoko na daukaulotu oqo me rawa ni ra veiqaravi. A vakamacalataka o Wilberforce, “Sa voleka sara ni yali na noqu vakanuinui ni lako ena kaulotu [baleta na ka vakailavo], ia au qai wilika na Maciu 6:19–20: ‘Dou kakua ni kumuna vata vei kemudou nai yau e vuravura, ia mo dou kumuna vata na nomudoui yau mai lomalagi.’ Ena gugumatua kei na sasaga, au a rawa kina ni vakavotukanataka na noqu lalawa-ka ni veiqaravi vakadaukaulotu tudei. Au taleitaka na veiqaravi va-kaulotu. E sega ni dua na ka e uasivita na kena vakasaqarai taumada na matanitu vakalomalagi.”
Vakanuinui ki na Gauna Muri Mai
O ira na itabagone e Uganda era sa vukea tiko na taraicake ni matanitu ni Kalou e keya, ena vakanuinui vakaitamera ki na gauna muri mai. Me vaka ni sega na valetabu ena Tokalau kei Aferika, era sa raitayaloyalotaka tu na itabagone na gauna era na vakamau kina ena dua na valetabu e tiko tani. E dua na itaviqaravi a vagolei ena vakavakarau ni curuma na valetabu, ni sa mai vakacavari, a wasea e dua na lewe ni mataveiliutaki ni iteki na nona ivakadinadina: “E lomani kemuni na Kalou. Oi kemuni na usutu ni Lotu e Uganda.” Era sa taukena oti tiko na itabagone dodonu oqo e dua na veivakayarayarataki levu.
Na cauravou kei na goneyalewa e Uganda era sa solibulataka na veika ni vuravura ki na veivakalougatataki ka na tawacava. Era sa teivaka na sorenikau ni vakabauta ka ra sa qarava tiko vakavinaka (raica na Alama 32:33–37). Me vaka e dua na vunikau e vakasinaiti ena vuana (raica na Alama 32:42), era wasea na itabagone na kosipeli ena reki ena vanua bulabula oqo.
Veidonui: iTabagone ni ra tiko vakatautauvata ena dua na yasanibuka ni iteki.
iCake: o Susan (eloma), e dua ka tiko vakararavi e Uganda, a kune vakacegu ena kosipeli ka sa kauti ira na nona isolisoli kei na gonelalai tale eso ki lotu.
E loma: Era taleitaka na goneyalewa ena tabanalevu oqo na qaravi ni Torocake Yadudua.
iMatau: A vakanadakuya o Dennis a dua na itutu ena dua na timi ni soka saumi me vunautaka na kosipeli. O koya kei ira na cauravou tale eso ena nona kuoramu ni bete era solibula ka lakocuruma na bolebole mera veiqaravi vakaulotu.
iTaba mai vei Cindy Smith