Na Vuna Eda Gadreva kina na iVola i Momani
Eso ena tarogi iko se cava eda gadreva kina na iVola i Momani ni sa tu rawa oqo na iVola Tabu.Vakaidina, a vakadinadinataka o Jisu Karisito ni na yaco na ka oqo (raica 2 Nifai 29:3). E tu e levu na vuna ka bibi kina na iVola i Momani ena noda gauna (me kena ivakaraitaki, raica 2 Nifai 29:7–11). Oqo e vica ga na vuna e bibi kina.
E Dua Tale Na iVakadinadina Kei Jisu Karisito
Na ivolanikalou e vakaraitaka vei keda e dua na ituvatuva ni kena vakayagataki na veimataqali ivakadinadina me yavutaki kina na dina ena Lotu i Karisito. Na iVola i Momani e okati vaka-ikarua ni ivakadinadina ki na iVola Tabu me dua na ivakadinadina i Karisito. O Elder Mark E. Petersen (1900–84) ena Kuoramu ni iApositolo le Tinikarua a tukuna ena dua na gauna, “Na vuna levu ka tiko kina vei keda na iVola i Momani oya me vakadinadinataki kina na vosa kecega ena gusu ni ivakadinadina e lewe rua se lewe tolu. (Raica na 2 Kor.13:1.) E tiko vei keda na iVola Tabu; e tiko talega vei keda na iVola i Momani. Rau vakatulewataka e rua na domo—rua na itukutuku ni ivolanikalou—mai na rua na kawa tamata duidui veiyawaki, ka vakadinadinataka ruarua na ituvaki cecere ni Turaga o Jisu Karisito.”1 O Peresitedi Ezra Taft Benson (1899–1994) a tomana, “Meda kakua ni guilecava ni Turaga vakataki-Koya a solia mai na iVola i Momani me ulu ni Nona ivakadinadina.”2
Na Taucoko ni Kosipeli
Eda kila ni “veika rawarawa ka vakamareqeti … era a kautani mai” na iVola Tabu ena veitabagauna kece sara (1 Nifai 13:40). Na iVola i Momani e vakamatatataka na ivakavuvuli i Karisito ka kauta tale mai ki vuravura na taucoko ni kosipeli (raica na 1 Nifai 13:38–41). Me ivakaraitaki, na iVola i Momani e vukei keda meda kila ni veipapitaisotaki e vakayacori ena tabadromuci (raica na 3 Nifai 11:26) ka ra sega ni dodonu mera papitaiso na gonelalai (raica na Moronai 8:4–26).
E Uto ni Lotu Vakalesuimai
A vakadinadinataka o Josefa Simici ni iVola i Momani “sa ivatuvakadei ni noda lotu.”3 Ni da sa kila tu oqo, e sega ni vaka me veivakidroataki ni Lotu i Jisu Karisito ni Yalododonu Edaidai a tauyavutaki ena ika 6 ni Epereli, 1830, ni oti toka ga e 11 na siga ni kena tavoci na iVola i Momani me volitaki raraba ena ika 26 ni Maji, 1830. A sega ni tauyavutaki taumada na Lotu me yacova ni ra sa taukena na lewenilotu na ivolanikalou ivatuvakadei.
E Dua na Veivakalougatataki ena Noda Bula
Nona vakaibalebaletaka na iVola i Momani, a vakavulica o Josefa Simici ni “na toro voleka e dua na tamata vua na Kalou ena nona tugana na kena ivakavuvuli, mai na veivola tale eso.”4 E tiko kina na kaukauwa me veisautaka na bula—oka kina na nomu kei ira o wasea kina na iVola i Momani. O Peresitedi Henry B. Eyring, iMatai ni Daunivakasala ki na Mataveiliutaki Taumada, a vakadinadinataka, “Na revurevu ni iVola iMomani kina nomu itovo, kaukauwa, kei na yaloqaqa mo na dua kina na ivakadinadina ni Kalou e ka dina sara.Na ivunau kei na veivakaraitaki qaqa ena ivola oya ena veilaveti, veituberi, ka vakamarautaki iko. … Na vulici ni iVola i Momani ena masumasu ena taracake na vakabauti ni Kalou na Tamada, na Luvena Daulomani, kei na Nona kosipeli. Ena taracake na nomu vakabauti ira na parofita ni Kalou, ni gauna makawa kei na gauna oqo. … Ena rawa ni toroi iko vakavoleka vua na Kalou mai na veivola tale eso. E rawa ni veisautaka na bula me vinaka cake.”5
Lesoni ni Sigatabu
Ulutaga ena Vula Oqo: Na Vukitani kei na Veivakalesuimai