100 Yia blong Famle Haos Naet
Manis ia i makem 100 yia stat long taem we Fas Presidensi i leftemap tingting blong ol memba blong gat famle haos naet. Ol smol toktok ia oli kamaot long leta blong Fas Presidensi we i tokbaot famle haos naet blong fas taem. Leta ia i kamaot long Epril 1915, mo oli printim insaed long magasin ia Improvement Era long Jun 1915 (ol pej 733–34). Oli stretem fasin blong raetem toktok mo seperetem sentens.
Jos Histri Laebri i glad blong serem foto ia.
Ol Dia Brata mo Sista:
Mifala i givim kaonsel long Ol Lata-dei Sent blong folem gud komanmen blong Lod we Hem i givim long namba 68 seksen blong Doktrin mo Ol Kavenan we i talem se:
“folem hamas ol papa mo mama oli gat ol pikinini long Saeon, we oli no tijim olgeta blong andastanem doktrin blong fasin blong sakem sin, fet long Kraes Pikinini blong God we i laef, mo baptaes mo presen we i Tabu Spirit tru long fasin blong putum han antap long hed, taem oli gat eit yia, bae sin ia i stap long hed blong papa mo mama blong olgeta.
Mo oli mas tijim tu ol pikinini blong olgeta blong prea, mo blong wokbaot long stret laef long fored blong Lod.” [luk long D&C 68:25–28].
Ol pikinini blong Saeon oli mas folem gud moa ol komanmen blong Lod we Hem i bin givim long Isrel bifo, mo i talem bakegen long ol Lata-dei Sent:
“Oltaem bambae yufala i mas ona long papa mo mama blong yufala. Sipos yufala i folem fasin ya, bambae yufala i save stap longtaem long kantri ya we mi bambae mi givim long yufala.” [Eksodas 20:12].
Ol revelesen ia hem i fulwan blong ol Lata-dei Sent, mo God i stap askem long ol papa mo mama blong Jos ia we oli mas tijim olgeta komanmen ia mo oli mas yusum olgeta insaed long hom blong olgeta.
Blong mekem hemia, mifala i givim advaes mo pusum stat blong wan “famle haos naet” raon long Jos, we i wan taem we ol papa mo ol mama oli save pulum ol boe mo ol gel blong olgeta oli kam tugeta raon long olgeta insaed long hom, mo tijim olgeta long toktok blong Lod. Long wei ia, oli save lanem moa fulwan ol nid mo ol samting we famle blong olgeta i nidim, mo long semtaem, olgeta mo ol pikinini blong olgeta oli save kam blong save dip moa ol prinsipol blong gospel blong Jisas Kraes. Haos naet ia, oli mas putum i stap blong prea, singsing ol hym, singsing ol singsing, plei miusik, ridim skripja, tokbaot ol poen blong famle, mo ol stret instraksen long saed blong ol prinsipol blong gospel mo long saed blong fasin blong laef, mo tu, ol diuti mo ol wok we ol pikinini oli mas mekem long papa mo mama, ol wok insaed long hom, Jos, sosaeti mo nesen. Long ol smol pikinini, mekem oli ripitim baehat skripja, singsing ol singsing, talem stori, mo plei gem. Oli save mekem wan smol kaekae blong save kakae tugeta long hom.
Fasin blong gat wan wei nomo blong mekem famle haos naet, hemia oli no mas mekem, mo evri memba blong famle oli sapos blong tekpat long ol aktiviti.
Ol kam tugeta ia bae i givim janis blong gat tras bitwin papa, mama, mo pikinini, bitwin ol brata mo sista, mo tu, givim janis blong kasem ol toktok blong woning, kaonsel, mo advaes we i kam long papa mo mama i go long boe mo gel blong tufala. Bae oli givim wan janis blong ol boe mo gel blong givim ona long papa mo mama blong olgeta, mo blong soem tangkyu from ol blesing blong hom, blong mekem se promes we Lod i promesem, bae i save hapen mo laef blong olgeta i save longwan mo gat hapines long hem. …
Mifala i leftemap tingting blong ol yang pipol blong stap long haos long naet ia blong yusum evri paoa blong yufala, blong mekem naet ia i wan taem blong lanem samting, blong kasem samting mo mekem i gat intres long hem.
Sapos olgeta Sent oli obei long kaonsel ia, mifala i promes se bae i gat ol bigfala blesing i kam. Lav long hom mo fasin blong stap obei long papa mo mama bae i kam antap. Fet bae i develop insaed long hat blong ol yut blong Isrel, mo bae oli kasem paoa blong faet agensem ol nogud paoa mo temtesen we i stap long fored blong olgeta.
Mifala, ol Brata blong yufala,
Josef F. Smit
Anton H. Land
Jals W. Penros
Fas Presidensi