Promes blong Hem blong: Oltaem
Robin Kaspa, Yuta, YSA
Ol pikja oli kam long Bradli H. Klak
Taem mi sidaon long sakramen miting, mo tingting hevi long prea blong bred, ol toktok oli gohed blong ripitim olgetawan insaed long maen blong mi: “blong oli save gat Spirit blong hem i stap wetem olgeta oltaem” (Moronae 4:3; D&C 20:77).
“Oltaem.” I no talem—long samfala taem nomo. ?From wanem nao, sam manis i pas, hasban blong mi mo mi i no kasem toktok long Spirit long saed blong olsem wanem blong protektem boe blong mitufala we i gat 11 yia, bifo hem i ded long wan aksiden blong baskel mo trak? ?From wanem Papa long Heven bae i no “oltaem” lukluk long mifala mo givim woning long mifala?
Oli tijim mi long Praemeri, mo mi bin bilivim se Tabu Spirit bae i protektem yumi. Bae Hem i yusum kwaet, smol voes bong lukluk, gaedem mo wonem yumi long ol denja. Tingting ia i bin stap long maen blong mi stat long taem we Ben i ded. Mi misim hem fulap, mo hat blong mi i soa blong mi andastanem hemia wetem pis.
?Wehem nao voes blong woning? ?Wehem Tabu Spirit? Mi filim se mifala i stap mekem evri samting blong stap stret mo gud. Mifala i pem taeting, go long ol miting long jos, mo givim seves taem oli askem mifala. Mifala i no stret evriwan, be mifala i stap gat famle haos naet mo skripja stadi. Mifala i stap traem.
Kolosap long sem taem ia, mi sidaon long klas blong Rilif Sosaeti taem tija i tokbaot wan stori blong wan memba blong famle blong hem. Taem hem i stap wet long stop laet, famle memba i filim se bae hem i mas stap long ples we hem i stap long hem taem bae laet i go grin. Hem i mekem folem kwaet toktok ia, mo klosap wantaem nomo, wan bigfala trak i kam long kona, i bitim red laet. Sapos hem i no harem mo obei long voes ia, hem mo ol pikinini blong hem bae oli kasem kil o bae oli ded.
Stori ia i kasem gud mi, be taem mi sidaon long jea blong mi we mi stap krae, mi rere blong stanap mo aot long rum, wan bigfala kamfot i kam long mi. Mi bin filim pis from se Tabu Spirit i bin stap wetem mi. Long kes blong mi, Hem i no bin olsem wan voes blong woning, be blong kamfot.
Stat long taem blong aksiden blong Ben, mi bin filim paoa we i bitim hemia blong mi mo lav blong Papa long Heveni givim kamfot long mi. Mi no save andastanem, sam taem, from wanem sam samting oli hapen, be mi neva gat tu tingting long lav blong Hem.
Mi gat fet se God i andastanem evri samting mo bae i neva livim mi we mi no gat kamfot. Tabu Spirit i plei plante pat long laef blong yumi. Hem i save protektem yumi, be tu, Hem i save gaedem yumi, kamfotem yumi, tijim yumi, mo givim save mo ol nara blesing.
Mi lanem se Papa long Heven i stap kipim ol promes blong Hem. Hem ibin stap “oltaem” wetem mi.