?Hamas paoa nao Setan i gat blong lidim tingting blong mi?

Papa blong yumi long Heven i meksua se yumi gat fridom blong save mekem joes, paoa blong jusum gud o nogud. Bae Hem i no fosem yumi blong mekem gud, mo devel i no save fosem yumi blong mekem nogud (luk long Teachings of Presidents of the Church: Joseph Smith [2007], 214).

So, taem yumi tokbaot tingting blong yu, devel i gat paoa blong lidim tingting blong yu olsem we yu glad blong letem hem i mekem. Profet Josef Smit i talem: “Setan i no save switim yumi tru long ol trik blong hem, be sapos nomo, yumi, insaed long hat blong yumi, yumi agri mo yumi mekem folem” (Teachings: Joseph Smith, 213). Hem i talem tu: “Devel i no gat paoa ova long yumi, be nomo, sapos yumi letem hem” (214).

Antap long hemia, ol skripja oli talem long yumi se i no gat wan narafala man bakegen, be God nomo, we i save ol tingting mo ol samting we hat blong yu i wantem (luk long D&C 6:16); so Setan i no save wanem yu rili stap tingting long hem. Hem i save givim ol temtesen mo trik. Be sapos yu jusum blong folem olgeta, hem i kasem moa paoa ova long yu, mo ol temtesen oli kam strong moa. Long semfala wei, sapos yu stanap agensem ivel, mo jusum gud, bae yu kam strong moa mo kasem blesing.