!Yumi Mas Go long Tempol Naoia!
Meri Holm Iwen, Kalifonia, YSA
Ol pikja oli kam long Bradli H. Klak
Wan Sandei moning, oli prisentem wan memba we i jes baptaes i kam long wod. Nem blong hem i Lidia. Hem i winim hat blong mifala wantaem nomo.
Lidia i olfala mo i blaen from hem i kasem sik suga longtaem finis. Hem i kam blong save ol memba blong wod tru long voes mo wokbaot blong olgeta. Bae hem i talem nem blong olgeta mo sekhan wetem olgeta, mo mifala i neva tokbaot se hem i blaen.
Afta wan yia we hem i mas wet, Lidia i go luk bisop mo stek presiden blong kasem tempol endaomen blong hem. Wan dei, long Rilif Sosaeti, hem i pulum mi go long saed blong hem mo talem: “Stek presiden i talem long mi se mi mas go long tempol kwiktaem. ?Bae yu glad blong kam wetem mi?”
Hem i fas wik blong Disemba—wan bisi taem blong yumi evriwan. Mi traem blong talem eskius mo talem: “?Bae yumi no save wet kasem Jenuware?”
“No. !Yumi mas go naoia!”
Wan grup blong ol woman blong wod oli stap go long tempol evri manis, mekem se mi go luk olgeta blong oli go wetem Lidia. Olgeta tu oli bisi tumas. Be Lidia, wetem wota long ae blong hem, i talem bakegen long mifala se stek presiden i talem long hem blong go kwiktaem.
Afta we hem i talem hemia, mifala evriwan i agri blong mekem 241 km trip long wik afta. Long rod i go, mifala i fulumap bas wetem storian mo frensip blong eit woman. Lidia i glad bitim glad long tempol eksperiens blong hem mo blesing blong kasem endaomen blong hem.
Long fas wik blong Jenuware, helt blong Lidia i go nogud moa mo hem i admit long hospital long imejensi. Wan wik afta, hem i go. Be Lidia i go wetem ol blesing we oli no save finis we hem i bin kasem insaed long tempol sam wik bifo.
Afta, mi tokbaot long stek presiden stori blong trip blong mifala, mo talem long hem olsem wanem nao mi bin sapraes se hem i bin filim blong talem long Lidia blong hem i mas go long tempol kwiktaem.
“Mi no minim se hem i mas go naoia” presiden i talem. “Oltaem mi stap talem long ol niufalawan we oli kasem rekomen blong go kwiktaem long tempol. Spirit nao i toktok long Lidia, !i no mi!”
Lidia i tijim mifala evriwan blong lisin long Spirit mo blong tekem aksen folem kwiktaem. Mi tangkyu tumas blong hem i mekem mi tingbaot blong lisin long kwaet, smol voes.