Ol Hom blong Yumi, Ol Famle blong Yumi

Famle Haos Naet—!Yu Save Mekem!

Nomata se famle blong yu i olsem wanem, famle haos naet i save blesem mo mekem yu kam strong moa.

Brigham Yang Yunivesiti i glad blong serem ol histri foto ia; foto blong peint i kam long iStock/Thinkstock

Wan papa i taed afta wan longfala dei blong wok, mo i faenem famle blong hem i stap traehad wetem sam nogud filing. Hem i Mandei naet, mo i luk se i no posibol blong gat famle haos naet. Afta we tufala i talem wan prea blong kasem help, papa mo mama, tufala i disaed blong mekem ol samting oli simpol nomo. Oli singaotem famle i kam tugeta, oli singsing wan hym mo prea tugeta. Tufala i givim wan smol kandel long wanwan memba blong oli laetem mo semtaem tokbaot wan samting we i bin givim insperesen long olgeta i no longtaem i pas. Insaed long wan rum we i tudak, laet blong ol kandel i ripresentem insperesen mo i pulum tingting blong ol pikinini. Taem oli stap serem ol testemoni blong olgeta, wan filing blong swit pis mo lav i kam insaed long hom. Famle i endem naet ia wetem fasin blong talem tangkyu blong save gat haos naet.

?Yu yu save se famle haos naet i wan program blong Jos we i stap blong 100 yia finis? Long Epril 1915, Fas Presidensi i daerektem ol memba blong putum wan naet long wan wik i stap blong mekem famle prea, miusik, lanem gospel, talem stori, mo gat aktiviti. (Luk long pej 80 blong luk wan smol pat blong Fas Presidensi leta ia.) Ol profet oli gohed blong mekem yumi tingbaot se i impoten blong gat famle haos naet. “Yumi no save letem nomo blong yumi no wantem save long program ia we i kam tru long insperesen long heven,” Presiden Tomas S. Monson i talem. “Hem i save mekem wanwan memba blong famle i gro, i helpem hem blong stanap agensem ol temtesen we oli stap long evri ples.”¹

Hemia sam fasin blong stap tingbaot oltaem taem yu stap mekem famle haos naet i pat blong wik blong yu:

Hemia i blong mi. “Famle haos naet i blong evriwan.” Elda L. Tom Peri blong Kworom blong Olgeta Twelef Aposol i talem.² Yumi evriwan—we yumi mared, we yumi singgel, we i gat pikinini o no gat pikinini— i save putum taem ia i stap blong mekem famle i kam strong moa mo i lanem gospel.

Mi save faenem taem. Jos i soem eksampol taem hem i putum Mandei naet i fri mo i no gat aktiviti blong Jos. Yu save soem long Lod mo famle blong yu se yu wantem putum taem i stap blong wanem we i moa impoten.

Mi save faenem wanem we bae i wok blong famle blong mi. Sapos famle blong yu i stap long ol defren ples, traem blong gat wan “intanet famle naet” blong toktok wetem ol memba blong famle tru long intanet o long telefon. ?I gat wan i wok let long naet? Holem wan “famle paking naet” kolosap long wokples long taem we memba blong famle i spel smol. Wan papa we i divos i bin gat wan “famle leta naet” evri Mandei, i stap raet i go long ol pikinini blong hem we oli stap longwe long hem.³ Mekem ol samting we oli kam blokem rod i wan wei blong faenem moa samting blong mekem.

Mi save stat long wik ia. Famle haos naet, oli save oganaesem folem ol nid mo ol situesen blong hom blong yu. Hemia samfala tingting:

• Statem mo endem famle haos naet wetem wan prea.

• Yusum miusik, wetem ol hym mo ol singsing blong Praemeri.

• Lanem samting aot long ol skripja mo ol toktok blong ol profet blong tedei.

• Mekem fulap defren kaen aktiviti o pleiplei, ol seves projek, mo ol aktiviti we i lukluk long gospel, wik afta wik.

• !Gat gudfala taem! Pleiplei long wan gem o mekem smol kaekae.

• Mekem famle haos naet evri taem. Sapos yu no save mekem long Mandei, faenem wan nara dei we i wok gud.

Mi wantem ol blesing. Ol profet oli promesem se sapos yumi tekpat long famle haos naet, ol bigfala blesing bae oli kam: Lav mo fasin blong stap obei long hom bae i kam antap moa. Bae fet i kam bigwan insaed long hat blong olgeta yut. Ol famle bae “i kasem paoa blong faet agensem ol ivel fos mo ol temtesen” we oli stap raonem olgeta.⁴

Nomata we ol famle haos naet blong yufala oli no ol eksperiens we oli go stret evriwan long evri taem, famle blong yu bae i kam strong moa mo bae i kasem blesing tru long ol hadwok blong yu. “Wanwan famle haos naet i taem wan i pentem wan laen long peinting blong sol blong yumi,” Elda Deved A. Bedna blong Kworom blong Olgeta Twelef Aposol i tijim. “I no gat wan taem we i bigbigwan o bae yumi tingbaot oltaem. Be semmak olsem wanwan laen we oli pentem i kam joenem narawan mo mekem wan naesfala peinting, taem yumi stap strong oltaem blong mekem ol smol samting oltaem, i save lidim yumi long ol bigfala risal long saed blong spirit.”⁵

Ol Not

1. Thomas S. Monson, “Constant Truths for Changing Times,” Liahona, Mei 2005, 19.

2. L. Tom Perry, “Therefore I Was Taught,” Ensign, Mei 1994, 38.

3. “Family Home Evening: Any Size, Any Situation,” Ensign, Dis 2001, 42.

4. First Presidency, insaed long James R. Clark, komp., Messages of the First Presidency of The Church of Jesus Christ of Latter-day Saints, 6 vols. (1965–75), 4:339.

5. David A. Bednar, “More Diligent and Concerned at Home,” Liahona, Nov 2009, 19–20.

Putum I Kam Faswan

“Mifala i givim kaonsel long ol papa mo mama, mo ol pikinini, blong putum i kam faswan ol famle prea, ol famle haos naet, gospel stadi mo tijing, mo ol gudfala famle aktiviti. Nomata we ol nara klin samting o aktiviti we oli stret i save hapen, be oli no mas kam faswan long ol diuti we i tabu we oli bin givim long ol papa mo ol mama nomo mo ol famle.”

Fas Presidensi Leta, 11 Feb 1999