2015
Olsem Wanem blong Stap Waes
Epril 2015

Olsem Wanem blong Stap Waes

I Kam long Elda Nil L. Andesen

Blong Kworom blong Olgeta Twelef Aposol

Elda Nil L. Andesen

I kam long wan Brigham Young University–Idaho divosen we oli bin givim long 25 Septemba 2007.

Wetem taetol wef blong infomesen blong tedei, yumi nidim tumas blong gat waes tingting—waes tingting blong seraotem ol samting mo luksave olsem wanem blong yusum wanem we yumi stap lanem.

Yumi mas tingbaot:

  1. Yumi mas lukaotem blong gat waes tingting.

  2. Waes tingting, i gat plante defren kaen, mo i kaem long ol defren saes mo kala.

  3. Waes tingting we oli kasem eli long laef i tekem ol bigfala blesing i kam.

  4. Waes tingting long saed blong wan samting, yu no save yusum long wan narafala samting.

  5. Waes tingting blong wol ia, we long plante taem oli gat valiu, i wan gudfala valiu sapos nomo hem i bodaon wetem tingting i stap daon long fored blong waes tingting blong God.

Ol skripja oli tokbaot tufala kaen waes tingting: waes tingting blong wol, mo waes tingting blong God. Waes tingting blong wol i gat gudfala mo nogud saed blong hem. Blong tokbaot long nogud wei, yumi save talem se i wan trutok we i hafaf, i miks wetem waes mo fasin blong tantanem samting blong kasem ol samting folem selfis tingting mo nogud stamba tingting.

I gat wan nara kaen waes tingting blong wol we i no nogud tumas. Be, hem i gud i stap. Waes tingting ia, oli stap kasem tru long fasin blong stadi, tingting longtaem, lukluk samting fastaem, mo traehad. Hem i gat valiu mo i save help long ol samting we yumi stap mekem. Long ol pipol we oli gud mo gat klin tingting, waes tingting ia i kam taem yumi gotru long eksperiens long laef long wol ia.

Moa impoten long hemia, waes tingting we i tekem sakses i kam insaed long wol ia, hem i mas glad blong stap biaen long waes tingting blong God mo i no gat tingting se i save tekem ples blong waes tingting blong God.

I no evri waes tingting we oli krietem i ikwol. Yumi nidim blong lanem se taem waes tingting blong wol i no agri wetem waes tingting blong God, yumi mas mekem tingting blong yumi i agri long waes tingting blong God.

Mi givim tingting se yu tekem sam poen we yu stap fesem. Raetemdaon wan laen i kamdaon long medel blong wan pepa. Listim daon waes tingting blong wol long lef saed, mo waes tingting blong God long raet saed. Raetem ol poen we oli no agri, oli agensem olgeta bakegen.

?Wanem joes nao yu stap mekem?

Long seksen 45 blong Doktrin mo Ol Kavenan, we i tokbaot ol samting we bae oli hapen i go kasem Seken Kaming blong Sevya, bakegen Lod i talem stori blong ol ten yang gel we oli no save man yet, mo afta, i livim yumi wetem ol toktok ia: “From olgeta we oli waes mo oli bin akseptem trutok, mo oli bin tekem Tabu Spirit olsem gaed blong olgeta, mo oli no bin folem ol giaman toktok—i tru, mi talem long yufala, bambae mi no katemdaon olgeta mo no sakem olgeta i go long faea, be bae oli stap laef long dei ia” (luk long D&C 45:57).

Bae yumi lukaotem Waes Tingting blong God. I gat plante samting we yumi save lanem naoia abaot waes tingting. Mi promesem yufala se blesing blong Lod bae i kam long yu taem yu stap lukaotem waes tingting, waes tingting blong God. Hem i wantem tumas blong serem waes tingting blong Hem wetem yumi. Mo sapos yumi stap obei mo stap prea, mo stap lukaotem waes tingting ia, bae i kam long yumi.