Sam Tingting blong Famle Haos Naet

Magasin ia i gat ol stori mo ol aktiviti we oli save yusum long famle haos naet. Wanem i kam afta, hem i tu tingting blong yusum.

“Mi Nidim Yu Oltaem”, pej 30: Semmak olsem we ol toktok blong hym “Mi Nidim Yu Oltaem” i helpem Pak Mi-Jung blong disaed blong baptaes, ol hym oli save gat bigfala paoa long laef blong yumi. Tingbaot wan taem we ol toktok blong wan hym i blesem laef blong yu, mo tingting blong serem eksperiens ia wetem famle blong yu. Invaetem wanwan memba blong famle blong jusum wan hym we oli laekem tumas mo talem olsem wanem hym ia i blesem laef blong olgeta. Afta, singsing long wanwan hym ia wetem famle blong yu. (Maet i gud blong yu mekem hemia ova long tu wik olsem.)

“Ol prea mo Katedral,” pej 68: Afta we yu ridim stori ia, soem ol pikja o tokbaot ol defren jos we oli stap long taon blong yu, mo tokbaot ol kwestin ia wetem famle blong yu: ?Wanem samfala samting yumi gat we i semsemmak wetem ol narafala relijin? ?Olsem wanem nao Papa long Heven i filim abaot evriwan long ol pikinini blong Hem? ?Olsem wanem nao bae yumi mas tritim ol pipol we bilif blong olgeta i defren long bilif blong yumi? Tingting blong yusum atikol ia “Skelem Gud Trutok mo Fasin blong Akseptem Samting Defren” we i kam long Elda Dalin H. Oks blong Kworom blong Olgeta Twelef Aposol (Liahona, Feb 2013, 28–35) blong save ansarem ol kwestin ia.