Mi Nidim Yu Oltaem
Man we i raet i stap long Yuta, YSA.
Taem mitufala i no bin save wanem moa blong tijim, kompanion blong mi i givim tingting se bae mitufala i singsing long hym ia.
Long wan naes Sandei aftenun long misin blong mi long Balsan, Koria, kompanion blong mi mo mi i stap talem tata long ol memba afta long jos, mo mitufala i stap rere blong go lukaotem man blong tij; nao wod misin lida blong mitufala i presentem wan boe blong twelef yia, Kong Sung-Giun. Hem i kam long jos long dei ia mo i wantem lanem moa long saed blong gospel.
I tru, mitufala i glad tumas long tingting ia blong save tijim hem, be mi bin fraet tu blong tijim wan we i yangfala tumas olsem. Mitufala i meksua se mitufala i kasem raet blong papa mo mama blong hem, mekem se mi ring i go haos blong Kong Sung-Giun mo toktok sot taem wetem mama blong hem, Pak Mi-Jung. Mi bin sapraes taem mama ia i talem se hem i glad we boe blong hem i wantem kam long jos, mo bae hem i hapi blong mitufala i go tijim hem.
Sam Investigeta we Mifala I No Save
Long naet afta, mitufala i kasem haos blong boe, mitufala i rere blong tij. Mitufala i sapraes blong faenemaot se Pak Mi-Jung i wantem tu se mitufala i tijim gel blong hem, Kong Su-Jin. Mo from mitufala i ol strenja long haos blong hem, Mak Mi-Jung i wantem se hem tu bae i stap long taem blong ol lesen. Yes, mitufala i hapi blong tijim hamas we oli glad blong lisin.
Afta we oli givim smosmol kakae, mifala i sidaon tugeta mo stat blong toktok. Mitufala i no statem lesen stret i go, be Pak Mi-Jung i wantem blong save gud mitufala mo talem situesen blong famle blong hem. Hem i tokbaot ol hadtaem we oli jes kasem, mo ol had samting we oli bin gotru long olgeta, we wan long olgeta i boe blong hem we i jes kasem kansa mo kasem tritmen. Hem i gotru long lesa tritmen, mo kansa i stap go lus, be ol dokta oli givim woning se i save kambak long eni taem. Hemia i bin had tumas long famle. Oli wan famle we oli mas wok, mo papa i mas wokhad jes blong putum wan ruf antap long hed blong olgeta, mo kaekae antap long tebol.
Mi sek mo harem nogud long ol tes blong laef blong olgeta. Laef i no isi long olgeta, be famle ia i strong, mo hemia i kamaot klia bitim long sam nara famle we mi bin mitim long Koria, mo hemia i talem fulap samting from sosaeti long Koria i lukluk fulap long famle. Mitufala i aot long haos blong olgeta long naet ia, mo mitufala i kam blong save spesel famle ia gud moa mo mitufala i gat janis blong serem ol mesej blong gospel wetem olgeta.
Kompanion blong mi mo mi i gobak blong tij plante taem long wik ia, mo long evri taem, mitufala i kasem gud welkam mo open hat semak olsem we mitufala i kasem long fas visit blong mitufala. Taem topik blong baptaes i kam antap, tufala pikinini i wantem tumas blong joenem Jos. Be, mama blong tufala i no glad semmak. Nomata hem i laekem ol tijing blong mitufala, mo hem i hop se i tru, hem i no filim se hem i save mekem mo kipim ol kaen komitmen we i nid blong mekem blong save joenem Jos. Hem i no bin filim se bae i stret blong hem i kasem baptaes sapos hasban blong hem i no joenem hem, mo mitufala i no mitim hasban blong hem yet. Be, hemi glad moa blong gohed blong mit wetem mitufala, mo tu, i wantem blong joenem ol pikinini blong hem blong kam long jos.
Taem i stap go from en blong seken wik, taem mitufala i gohed blong tij insaed long hom blong mama ia, mitufala i mitim hasban blong hem, Kong Kuk-Won—wan man we tingting blong hem i stap daon, i naes, mo i gat open hat. Hem i joenem mifala long ol las toktok mo wantaem nomo i bilivim evri samting we mitufala i tijim, wetem ol doktrin we ol narawan oli faenem i had blong akseptem olsem taeting mo Tok blong Waes. Nomata we situesen blong olgeta long saed blong mane i nogud tumas, oli bin stat blong pem taeting. Wan samting nomo i stap i we papa i mas wok long Sandei. Hem i stap wok long Seul Intanasonal Eapot evri Sandei, mekem se hem i no save kam long jos wetem famle blong hem. Nomata long taem blong wok blong hem, papa ia wetem waef blong hem i mekem taem blong kam long baptaes blong tufala pikinini blong tufala long Sandei.
Afta long baptaes blong ol pikinini, mifala i gohed blong visitim famle ia oltaem long haos. Mifala i gat famle haos naet, mifala i serem ol skripja mo ol eksperiens we i leftemap tingting, mo mitufala i presentem olgeta long ol memba blong wod. Be nomata long ol eksperiens blong gospel we i gohed blong kam, papa mo mama ia, tufala i no soem saen nating blong kasem baptaes.
Long taem we i bin stap go, kompanion blong mi i muv i go long nara eria, mo niu kompanion blong mi i wan elda we i jes kamaot long misinari trening senta. Hem i gat fulap fet, paoa long bodi, mo paoa long tingting, mo mi mas ones, samtaem mi faenem i had blong stap folfolem hem. Afta we hem i mitim Kong Ku-Won mo Pak Mi-Jung long samfala taem, kompanion blong mi i kam luk mi mo askem sapos kompanion blong mi bifo mo mi i bin livim kakae finis wetem olgeta. No. Mitufala i no bin mekem. Be, tingting ia i no bin kam nating tu long mi. Mekem se mitufala i toktok wetem famle mo givim tingting blong livim kakae. Mi bin sek tumas blong faenemaot se olgeta oli bin stap livim kakae olgetawan wanwan taem, hemia from helt blong boe blong tufala, mo blong i save gat wan jenis long taem blong wok blong papa blong hem i save kam long jos. Afta we kompanion blong mi mo mi i joenem olgeta long wan taem blong livim kakae, prea blong mifala i gat ansa mo taem blong wok blong Kong Kuk-Won i jenis. Be Pak Mi-Jung i strong yet se bae hem i no baptaes.
Wan Tingting we I Kam Tru long Insperesen
Afta, kompanion blong mi i gat wan gudgudfala tingting. Hem i karemaot smol hymbuk blong hem, mo askem sapos mitufala i save singsing long olgeta. Nomata we mifala i bin singsing tugeta long sam taem bifo, mi neva luk Pak Mi-Jung i singsing mo mi jes ting se hem i no laekem singsing, o i no filim gud blong singsing from se miusik ia i niu long hem. Kompanion blong mi i askem hem sapos hem i gat wan hym we hemi laekem tumas, mo long sapraes blong mi, hemia i jokem hem, mo hem i ansa se taem hem i smol gel i kam, hym we hem i laekem tumas i “Mi Nidim Yu Oltaem” (Singsing Tabu mo Singsing blong Ol Pikinini, pej 12). Mifala i stat blong singsing long fo pat, wetem papa i singsing long soprano, mama i singsing alto, mo kompanion blong mi i singsing tena, mo mi mi singsing bes.
Spirit i bin strong insaed long rum. Taem mifala i stap singsing long nambatri ves, filing i winim hem, mo voes blong hem i nomo gat taem mifala i stap gohed:
Mi Nidim Yu Oltaem.
Taem mi hapi o sad.
Kam kwik stap wetem mi.
Olsem long laef mi glad.
Nidim yu, mi nidim yu;
Oltaem mi nidim yu
Blesem mi Sevya bae mi,
kam klosap long yu.
Taem mifala i finisim nambafo mo las ves, hem i stap krae. Nao hasban blong hem i traem toktok gud long hem, mo hem i kam oraet bakegen. Hem i luk stret long ae blong mi mo talem: “Mi nid blong kasem baptaes.”
Seves blong baptaes blong Kong Kuk-Won mo Pak Mi-Jung long Sandei aftenun ia, i wan we i gat moa Spirit long misin blong mi. Pikinini blong tufala i tekpat long program, mo plante lokol memba oli bin kam blong soem sapot blong olgeta long niufala konvet famle long wod blong olgeta. Kompanion blong mi mo mi i givim spesel miusik namba: “Mi Nidim Yu Oltaem.”
Long en, misin blong mi i kam long en mo mi gobak hom. Afta wan yia long kolej, mi gobak long Koria blong mekem smol wok long samataem, mo evri wiken, mi putum se mi mas go visitim ol plante spesel fren mo famle we mi bin mitim long misin blong mi. Afta sam wik, taem mi gobak long Balsan, mo mitim spesel famle ia bakegen. Taem mi kasem haos blong olgeta, mi luk se wan i no gat—boe blong tufala. Wetem wota long ae blong hem, Pak Mi-Jung i talem nius long mi: kansa blong boe blong tufala i kambak, mo taem hem i gat 14 yia, boe i lusum faet ia, i ded.
Taem mi traem blong talem sore blong mi long olgeta, mo semtaem, kontrolem harem nogud we mi filim, Kong Kuk-Won i talem long mi se evri samting bae i oraet. Oli lavem gospel, oli fetful blong stap atendem jos, mo luk fored long dei ia taem famle blong olgeta bae i save sil tugeta blong taem we i no save finis long Seul Koria Tempol. Nomata soa we i bin stap long hat blong olgeta, famle ia i bin save se bae oli luk Kong Sung-Kiun bakegen mo bae oli wan bakegen. Pak Mi-Jung i talem tu long mi se taem hem i stap singsing long ol hym evri dei i stap helpem hem blong faenem paoa blong gogohed, mo filim pis we Spirit i tekem i kam wetem.
Taem mi aot long hom blong olgeta long naet ia, mi tingtingbak bakegen long ol toktok blong hym we Pak Mi-Jung i laekem tumas. Mi talem tangkyu se Papa long Heven i blesem famle ia wetem pis afta long ded blong Sung-Giun, mo mi talem tankgyu tumas from wok blong Spirit insaed long laef we i jenis blong Pak Mi-Jung, we i mekem se famle ia i kwalifae blong kasem ol blesing we oli no save finis, blong tempol.