Fas Presidensi Mesej
Presiden Monson I Askem Evriwan blong Gat Strong Paoa long Tingting
I Kam long Presiden Tomas S. Monson
Ol pikja oli kam long iStock/Thinkstock
Presiden Tomas S. Monson i talem se i no gat wan aoa we i stap pas we bae yumi no mekem ol defren kaen joes.
Hem i givim kaonsel ia se blong mekem ol waes joes, yumi nidim strong paoa long tingting—“strong paoa long tingting blong talem no, strong paoa long tingting blong talem yes. Ol Desisen oli talemaot fiuja.”1
Long ol sotsot toktok ia, Presiden Monson i talem bakegen long ol Lata-dei Sent se oli nidim strong paoa long tingting blong stanap from trutok mo stret mo gud fasin, blong difendem wanem oli biliv long hem, mo blong fesem wan wol we i stap sakemaot ol valiu mo ol prinsipol we oli no save finis.
“Singaot ia blong gat strong paoa long tingting i kam oltaem long wanwan long yumi,” hem i talem. “I bin olsem oltaem mo bambae i stap olsem oltaem.”2
Strong Paoa long Tingting I Mekem God I Agri
“Bae yumi evriwan i fesem fraet, man i daonem yumi, mo mitim man blong agens. Bae yumi—evriwan long yumi—i gat strong paoa long tingting blong agensem popula tingting, strong paoa blong stanap from prinsipol. Strong paoa long tingting, i no wan dil, i tekem smael blong God we i glad. Strong paoa long tingting i kam wan klin fasin long laef we i gud tumas, i no taem nomo yumi ded wetem ona, be tu, taem yumi gat strong tingting blong laef long klin fasin. Taem yumi stap muv fored, mo traehad blong laef olsem yumi sapos blong laef, bae yumi kasem help we i kam long Lod mo save faenem kamfot long ol toktok blong Hem.”3
Stanap Strong wetem Stong Paoa long Tingting“
?Hem i minim wanem blong stap strong? Mi laekem mining ia: blong stanap strong wetem strong paoa long tingting. Maet yu nidim strong paoa long tingting blong yu biliv; samtaem, bae yu nidim blong save obei. Yes, bae yu nidim taem yu stap strong kasem dei ia we bae yu aot long laef long wol ia.”4
Gat Strong Paoa long Tingting blong Stanap from Trutok
“Bae yu gat strong paoa long tingting blong stanap strong from trutok mo stret mo gud fasin. From we i fasin blong sosaeti tedei, blong stap longwe long ol valiu mo ol prinsipol we Lod i bin givim long yumi, bae Hem i mas singaotem yu blong difendem wanem nao yu stap bilivim. Sapos ol rus blong testemoni blong yu oli no hang strong long graon, bae i had blong yu yu stanap mo fesem man we i jikim mo jalenjem fet blong yu. Taem testemoni blong yu i stap strong long graon, testemoni blong yu abaot gospel, abaot Sevya, mo abaot Papa long Heven bae i lidim tingting blong yu long evri samting we yu stap mekem long ful laef blong yu.”5
Yumi Nidim Strong Paoa long Tingting long saed blong Spirit mo long Fasin
“Ol Mesej we oli stap kamaot long televisen, long ol muvi, mo long ol nara media [tedei], plante taem, oli agensem stret wanem yumi wantem ol pikinini blong yumi blong akseptem mo blong holemtaet. Hem i responsabiliti blong yumi, blong tijim olgeta blong stap stret long saed blong spirit, be tu, blong helpem olgeta blong stap olsem, nomata ol fos aotsaed we bae oli fesem. Hemia bae i nidim plante taem mo hadwok long saed blong yu—mo blong save helpem ol narawan, yumi tu, yumi nidim strong paoa long tingting long spirit mo long fasin blong save stanap agensem ivel samting we yumi luk long evri saed.”6
Bae Yumi Gat Strong Paoa long Tingting Oltaem
“Taem yumi stap gohed long laef blong yumi evri dei, bae i no save ronwe long fasin ia we bae oli jalenjem fet blong yumi. Samtaem, bae yumi stanap long smol grup mo plante oli raonem yumi, o maet bae yumi stanap yumiwan long saed blong ol samting we oli stret, mo ol samting we oli no stret. …
“Bae yumi gat strong paoa long tingting oltaem, mo bae yumi rere blong stanap from wanem we yumi biliv long hem, mo sapos yumi mas stanap yumiwan long rod ia, bae yumi mekem wetem strong paoa long tingting, we yumi kasem paoa tru long save ia se, long tru laef, yumi neva stanap yumiwan taem yumi stanap wetem Papa blong yumi we i stap long Heven.”7