Singsing long Singsing we Yu Laekem Tumas
Anjela Olsen Senta, Ohaeo, YSA
Ol pikja oli kam long Bradli H. Klak
Mi jes bonem bebi gel blong mi, Rebeka. Taem blong mi blong karem bebi i bin strong, mo mi bin taed.
Taem oli kam putum Rebeka long han blong mi, mi gat bigfala filing ia se mi mas singsing long hym ia we mi laekem tumas, “Mi Pikinini blong God” (Singsing Tabu mo Singsing blong Ol Pikinini, pej 58). Fas ansa blong mi hem i: “No mi taed tumas. Bae mi singsing afta.” Be afta, tingting ia i kambak long mi bakegen. Mekem se, nomata mi taed, mi stat blong singsing fas ves. Hasban blong mi mo mama blong mi, tufala i joenem mi.
Taem mifala i finis singsing, mi filim wan spesel filing insaed long rum. Iven dokta, we kasem taem ia i toktok olsem wan dokta nomo mo no toktok tumas, i krae mo wota i ron long fes blong hem. Woman dokta ia i talem tangkyu blong singsing long wan naesfala singsing. Hem i talem se aot long evri yia we hem i stap helpem ol mama blong oli bonem bebi, hem i neva filimolsem we hem i bin filim long tetaem ia.
Mi tingtingbak long eksperiens ia mo askem miwan sapos mi save faenem wan kopi blong singsing ia mo givim long hem. Sore tumas, mi go bisi wetem laef mo mi fogetem hemia.
Nao dei i kam blong oli jekem mi afta we mi karem pikinini. Taem dokta i wokbaot i kam insaed long rum, fes blong hem i saen wantaem, mo hem i haggem mi. Hem i talem se hem i no bin save karemaot singsing ia aot long maen blong hem, mo i bin traem blong faenem miusik ia long Intanet blong hem i save singsing long famle blong hem. Taem ia nao Tabu Spirit i mekem mi mi tingbaot se mi mas karem wan kopi blong miusik ia blong hem. Mi promesem hem se long wik ia nomo, bae mi kambak wetem miusik.
Long naet ia, mi prea blong kasem help blong mi faenem miusik blong singsing ia we bae i stret long hem. Long nekis aftenun, mi putum oda long wan Sidi we singsinsg ia i stap long hem. Taem i kam long postofis sam dei afta, mi wantem givim long hem kwiktaem.
Hemi bin glad tumas blong kasem mo i talem tangkyu from presen ia. Hem i talem se hem i no save stret from wanem, be singsing ia i impoten tumas blong hem i serem wetem famle blong hem. Taem mitufala i gohed blong toktok, mi serem wetem hem, i no lav we mi gat long singsing ia nomo, be tu, testemoni blong mi abaot ol simpol trutok we singsing ia i tijim.
Taem mi draev i gobak hom long dei ia, mi bin filim lav we Papa blong yumi long Heven i gat long wan long ol gel blong Hem–woman dokta blong mi. Hem i save mo lavem hem, mo Hem i bin wantem woman ia blong i mas andastanem se hem tu i save gobak stap wetem Hem wan moa taem.