Go Fored Wetem Fet
I Kam long Elda Antoni D. Pekins
Blong Olgeta Seventi
I kamaot long wan divosen toktok, “Nevertheless I Went Forth,” we hem i givim long Brigham Yang Yunivesiti long 4 Feb 2014. Blong ful toktok long Inglis, go long speeches.byu.edu.
I gat fofala lesen blong mekem desisen wetem insperesen we i kam long Nifae, we i save daonem ol fraet blong yumi, mo mekem yumi gat moa tras blong muv i go fored.
Wan smol pat blong peinting iaSpirit blong Prea, we i kam long Klodio Roberto Aquiar Ramires
Yufala, ol yang adalt, yufala i stap laef naoia long wanem oli singaotem “Taem blong Mekem Ol Desisen.” Yufala i stap mekem plante long ol joes we oli moa impoten long laef blong yufala, olsem “blong go long tempol, go long wan misin, kasem wan gudfala pepa long skul, jusum wan wok, mo jusum wan kompanion, mo sil blong taem naoia mo ful taem we i no save finis insaed long tabu tempol.”1
Mi toktok speseli long olgeta we oli stap traehad wetem wan o plante long ol impoten desisen ia—maet sam oli nomo save muv from oli fraet blong mekem rong desisen, o oli nidim sapot blong gohed blong gat tras long wan desisen we hem i mekem finis.
I gat fofala lesen blong mekem desisen wetem insperesen we i kam long Nifae, we, sapos yu praktisim, i save daonem ol fraet blong yu, mo i leftemap tras blong yu blong muv i go fored.
1. Obei long Olgeta Komanmen.
Las ves blong tabu rekod blong Nifae i tokbaot gud ful laef blong hem: “From olsem ia nao Lod i bin givim oda long mi, mo mi mas obei. Amen.” (Seken Nifae 33:15).
Fet mo lav blong Nifae we hem i gat long Sevya i eksampol blong fasin blong hem blong obei long olgeta komanmen. Hem i bin prea (luk long Fas Nifae 2:16). Hem i ridim olgeta skripja (luk long Fas Nifae 22:1). Hem i lukaotem mo folem daereksen blong wan profet we i stap laef (luk long Fas Nifae 16:23–24). Kaen fasin ia blong obei i letem Tabu Spirit blong givhan strong long Nifae truaot long laef blong hem, mo i mekem se hem i kasem revelesen blong hemwan oltaem.
Yu tu, yu mas stap kolosap long Lod taem yu stap obei long olgeta komanmen blong God. Mi testifae se fasin blong stap obei oltaem long ol smol samting olsem ridim ol skripja, prea evri dei, go long ol miting blong Jos, mekem folem kaonsel blong ol profet we oli stap laef, mo blong givim seves long ol narawan bae oli mekem yu yu kwalifae blong kasem Spirit— mo revelesen we i kam wetem.
Fasin blong stap stret gud evriwan i no wan samting we yu mas gat fastaem blong save kasem revelesen blong yuwan. Fasin we yu mas gat fastaem, hem i fasin blong sakem sin evri dei (luk long Rom 3:23). Sapos fasin blong yu blong sakem sin i kam wetem tru tingting mo i series (luk long D&C 58:42–43), paoa blong Atonmen blong klinin man bae i tekem Spirit i kam blong i lidim yu long ol hevi desisen blong laef.
2. Muv Fored Wetem Fet
Putum yuwan long sandel blong Nifae. Papa blong yu i talem long yu se Lod i givim oda blong famle blong yu i aot long ol rij samting we yufala i gat mo go long ples we i no gat man long hem. ?Bae yu no wantem save abaot wokbaot blong yufala mo ples we bae yufala i go long hem?
Mi ting se Nifae bae i glad tumas sapos Lod i talem klia fiuja blong hem. Be, hemia i no wei we God i stap wok long hem, mo hem i no olsem wanem bae Hem i wok wetem yu.
Taem famle blong Nifae i wokbaot tru long ples we i no gat man long hem, ol instraksen oli kam long hem “wanwan taem” (Fas Nifae 16:29; 18:1). Sapos hem i bin luk finis wokbaot blong laef blong hem, hemia bae i no save givim hem ol eksperiens blong mekem sol blong hem i kam antap, mo mekem fet blong hem i kam antap, we oli ol eksperiens ia we oli bin helpem hem blong kam moa olsem wan man we i olsem Kraes.
Sapos yu stap wet long God blong i talemaot long yu wanem topik blong stadi long hem, huia blong maredem, mo wanem wok blong akseptem, weaples blong stap long hem, o blong go long wan graduet skul, mo hamas pikinini blong gat, bae i luk olsem se bae yu neva aot long haos blong yu. Mi testifae se revelesen blong yuwan bae i kam “wanwan taem.”
Papa blong yumi long Heven i wantem yumi blong groap, mo hemia i minim tu blong divelopem paoa blong skelem ol samting, mekem gud jajmen, mo mekem ol desisen. Be Hem i invaetem yumi tu blong talem ol desisen blong yumi long Hem tru long prea (luk long D&C 9:7–9). Elda Rijad G. Skot blong Kworom blong Olgeta Twelef Aposol i tijim se ol ansa long ol prea blong yumi long “wan long ol trifala wei ia.”2
Wan Stret Save wetem Konfemesen
Elda Skot i talem: “Faswan. Yu save filim pis, kamfot, mo stret save we i konfemem se desisen blong yu i raet.”3 Waef blong mi, Kristi, mo mi, mitufala i faenem se stret save ia long ol desisen we oli impoten tumas long laef, God i save talemaot tru long ol skripja, mo plante taem afta, tru long tempol wosip.
Eksampol. Afta we mitufala i bin tingting hevi, mo prea, mitufala i disaed blong lego niufala drim haos blong mitufala long Teksas, blong akseptem wan wok long wan niu ples, mo muvum ol sikis yang pikinini blong mitufala i go long Beijing, Jaena. Be mitufala i nidim tumas konfemesen long saed blong spirit blong save mekem muv ia. Stret save we i kam long heven i kam long mitufala—insaed long tempol—taem mitufala i ridim ol toktok insaed long Doktrin mo Ol Kavenan: “we i talem se hemia i tingting blong Hem we bae mitufala i no mas stastap longtaem tumas long ples ia; no tingting long propeti. Go long ol graon long Is” (luk long D&C 66:5–7)
Voes blong Jisas Kraes insaed long ol skripja, we oli kam wetem ol strong filing we i kam long Tabu Spirit, i konfemem desisen se muv blong mitufala i go long Jaena i stret.
Ol Filing we Oli No Stap Kwaet
Seken wei we Papa long Heven i ansa long ol prea hem i tru long wan “filing we i no stap kwaetkwaet, o tingting i no gat, we i soem se joes blong yu i wan rongwan.”4
Afta long misin blong mi i go long Taewan, mi ting se bae i gud blong mi wok long saed blong intanasonol loa. Taem Kristi mo mi i lukluk long hemia olsem wan gud fiuja, mitufala i andastanem tu se i gat faef moa yia blong sas edukesen we i stap kam tu wetem.
Ekonomi long Amerika i stap long trabol mo mane blong mitufala i smol nomo, mekem se mitufala i luk se blong joenem Ea Fos ROTC bae i wan waes joes blong pem skul blong mi. Be taem mi stap tekem ol tes mo fulumap ol pepawok, tingting blong mitufala i no save stap kwaetkwaet blong mekem komitmen ia. I no se i nomo gat tingting, o ol nogud filing i kam— mitufala i no stap long pis nomo.
Wanem we i luk se i no wan stret desisen long faenens i wan insperesen, !from se bae mi no wan gudfala loya nating!
Tras we I Kam long Heven
God i ansarem ol prea long wan nambatri wei: no ansa. “Taem yu stap laef klin inaf mo joes blong yu i stret wetem ol tijing blong Sevya, mo yu nidim blong tekem aksen,” Elda Skot i talem: “Gohed wetem tras.”5
Las traem blong Nifae blong kasem ol buk we oli wokem long bras i soemaot olsem wanem yumi mas gohed wetem tras we i kam long heven. Hem i raetem:
“Mo Spirit i bin lidim mi, mi no bin save yet wanem ol samting we bae mi mas mekem.
“Be mi bin go fored” (Fas Nifae 4:6–7).
Bae i gat ol taem we oli kam long taem blong yu blong mekem desisen we yu no save pusumbak i go moa, be yu mas tekem aksen. Mi bin lanem hemia taem Elda Dalin H. Oks blong Kworom blong Olgeta Twelef Aposol i tijim: “bae yumi kasem ol kwaet toktok blong Spirit taem yumi mekem evri samting we yumi save mekem, taem yumi stap wok andanit long hot san, be i no taem yumi stap sidaon gud andanit long sed mo stap prea from daereksen long fas samting blong mekem.”6
Olsem wetem Nifae, Spirit bae i konfemem, o bae i givim woning, long stret taem long rod we yu jusum blong tekem.
3. Laef long Taem Naoia
Komitmen blong Nifae long wokbaot ia i go long promes graon i stap i defren long wokbaot blong ol brata blong hem, Leman mo Lemyul. Tufala i mekem desisen blong go, be hat blong tufala i neva aot long Jerusalem. Nifae i stap mekem gud bo blong hem we i brok blong i go lukaotem kaekae mo sam tul blong bildim wan sip taem ol brata blong hem oli stastap nomo insaed long wan tenet.
Tedei, wol i gat fulap Leman mo Lemyul. Be Lod i nidim ol man mo ol woman we oli komitim olgeta olsem Nifae. Bae yu gat moa bigfala pogres long laef taem yu komitim yu fulwan long ol desisen blong yu mo traehad blong kam gud long situesen we yu stap long hem, mo yet gat wan ae i open long fiuja.
Nifae i eksampol blong waes kaonsel blong Presiden Tomas S. Monson: “Blong stap dei drim long wanem we i pas finis, mo blong stap wet blong fiuja i kam, i save givim wan kamfot, be i no save tekem ples blong stap laef long taem we i stap naoia. Hemia i dei blong janis blong yu, mo yu mas tekem.”7
4. Tekem Paoa blong Ol Narawan
Iven afta we yumi askem Spirit, muv fored wetem desisen blong yumi, mo komitim yumi fulwan long desisen ia, ol tu tingting oli save kam antap mo i save mekem yumi gat kwestin long desisen blong yumi. Long ol situesen olsem, wan memba blong famle o wan fren we yu trastem i save givim kaonsel mo paoa blong stap long rod ia. Mi givim tingting se, folem rod ia, woman we bae i maredem Nifae i kam wan angka we hem i trastem.
Mi kam blong glad long waef blong Nifae taem mi bin stap visitim Jos Histri Miusium. Mi laekem tumas wan peinting we i bin stap, abaot Nifae we oli fasem hem long pos blong wan sip, i wetwet evriwan from oli stap long wan strong win wetem ren.8
Long saed blong Nifae i gat waef blong hem mo wan long ol pikinini blong hem. Woman ia i stap gotru long semfala strong win mo ren ia, mo semmak jalenj we Nifae i stap gotru long hem, be ae blong hem i strong, mo strong han blong hem i go raon long Nifae i protektem hem. Long taem ia, mi luksave se, mi tu, mi gat blesing ia blong gat wan waef we i tru long mi, we i givim paoa long ol taem blong tes blong mi. Mi hop se mi tu mi mekem semfala samting long hem.
Ol Brata. Blong holemtaet paoa long saed blong spirit we yu developem (o bae yu developem yet) taem yu wan misinari, o long taem blong nara stret mo gud seves, mo mekem paoa ia i kam strong moa, i wan long ol bes tul blong kam wan hasban mo papa we oli wantem yu. Ol Sista. Blong save filim Spirit, gat fet, mo strong paoa long tingting blong folem Jisas Kraes, oli stap long medel blong ol bes kwaliti blong yu olsem wan waef mo wan mama.
Mi invaetem yufala blong kam kaen man o woman ia we waef o hasban blong yu i save kam long hem blong kasem waes kaonsel mo paoa. Wan man wetem klin fasin mo wan woman we i klin inaf, we tufala i sil blong taem naoia mo blong ful taem we i no save finis insaed long wan tempol, i save mekem ol had samting olsem tufala patna we tufala i ikwol.
Mi promes se sapos yu praktisim ol lesen we yu lanem aot long Nifae mo ol profet blong tedei long saed blong mekem desisen, bae Lod i lidim yu wetem ol revelesen blong yuwan “wanwan taem.” Taem yu stap progres tru long taem blong desisen, bae yu, olsem Nifae, i gat fet blong talem:
“Mo Spirit i bin lidim mi, mi no bin save yet wanem ol samting we bae mi mas mekem.
“Be mi bin go fored” (Fas Nifae 4:6–7).