Visiting Tijing Mesej
Ol Fasin blong Jisas Kraes: Hem I No Gat Rabis Tingting o Fasin blong Gat Tufes
Stadi long toktok ia wetem prea mo luklukgud blong save wanem blong serem. ?Olsem wanem nao taem yu andastanem laef mo ol defren wok blong Sevya i leftemap fet blong yu long Hem, mo olsem wanem i blesem olgeta we yu stap lukluk long olgeta tru long visiting tijing? Blong kasem moa infomesen, go long reliefsociety.lds.org.
Fet, Famle, Help
Taem yumi andastanem se Jisas Kraes i no gat rabis tingting mo i no gat tufes, bae i helpem yumi blong stap fetful blong traehad blong folem eksampol blong Hem. Elda Josef B. Witlin (1917–2008) blong Kworom blong Olgeta Twelef Aposol. “Blong gat rabis tingting i blong giaman o blong lidim man i go rong. … Wan we i no gat rabis tingting i wan we i no gat rong, i gat stret tingting, mo wanem i pusum hem i stret, mo laef blong hem i soemaot simpol praktis blong mekem ol jenis evri dei folem ol prinsipol blong stap tru. … Mi biliv se i gat bigfala nid blong ol memba blong Jos oli no mas gat rabis tingting. Mo hemia i nidim moa naoia bitim ol nara taem from se i luk se plante long wol ia, oli no andastanem se klin fasin ia i impoten tumas.”1
Long saed blong fasin blong gat tufes, Presiden Dita F. Ukdof, Seken Kaonsela long Fas Presidensi, i talem: “I no gat wan long yumi i olsem Kraes, olsem we yumi save se yumi sapos blong stap olsem. Be yumi wantem tumas blong winim ol rong blong yumi, mo fasin ia blong mekem sin. Wetem hat mo sol blong yumi, yumi wok blong kam gud moa wetem help blong Atonmen blong Jisas Kraes.”2
Yumi save se “bae Lod i jajem yumi folem ol aksen blong yumi, folem wanem hat blong yumi i wantem, mo folem kaen man o woman we yumi kam.”3 Yet, taem yumi traehad blong sakem sin, bae yumi kam moa klin gud—“mo olgeta we tingting blong olgeta i klin gud, oli save harem gud, from we bambae oli save luk God.” (Matiu 5:8).
Sam Moa Skripja
I Kam long Ol Skripja
Ol smol pikinini oli no gat rabis tingting. Jisas Kraes i talem: “!Yufala i no blokem ol pikinini ya! Yufala i letem olgeta oli kam long mi, from we ol pikinini tu oli gat raet wetem ol man we God i King blong olgeta. … Nao hem i putum han blong hem i goraon long ol pikinini ya, mo i putum han blong hem long olgeta, i blesem olgeta” (Mak 10:14, 16).
Kraes i bin tijim tu ol pikinini long Ol Amerika afta we oli bin hangem Hem long kros. Hem i givim oda blong ol pipol oli tekem ol smol pikinini blong olgeta i go long Hem mo “oli putum olgeta i go daon long graon raonabaot long hem, mo Jisas i bin stanap long medel blong olgeta; …
“… Mo hem i bin krae, mo grup blong pipol ia i witnes long samting ia, mo hem i bin tekem ol smol pikinini blong olgeta wan afta narawan, mo i bin blesem olgeta, mo i bin prea long Papa from olgeta. …
“Mo taem we oli stap lukluk blong luk oli bin sakem ol ae blong olgeta i go long heven, mo … oli bin luk ol enjel i stap kamdaon aot long heven olsem we i stap long medel blong faea; mo oli bin kam daon mo oli bin raonem ol smol wan ia, … mo ol enjel i bin givhan long olgeta” (3 Nifae 17:12, 21, 24).