O LE 100 Tausaga o Afiafi Faaleaiga

O le masina lenei ua atoa i ai le 100 tausaga talu ona faamalosiauina e le Au Peresitene Sili ia tagata o le au paia ina ia faia afiafi faaleaiga. O le vaega o loo mulimuli mai e aumai i le tusi a le Au Peresitene Sili na folasia mai ai afiafi faaleaiga. Na faalauiloa mai ia Aperila 1915 ma sa lolomiina i le Improvement Era ia Iuni 1915 (itulau 733–34). Ua faaaoga mataitusi tetele ma faailoga faaonaponei.

Ata mai le faaaloaloga a le Faletusi o Talafaasolopito o le Ekalesia

Uso e ma Tuafafine Pele:

Matou te fautuaina le Au Paia o Aso e Gata Ai ina ia saga silasila totoa i le poloaiga a le Alii na tuuina mai i le vaega e 68 o le Mataupu Faavae ma Feagaiga:

“O lenei foi, o le tulaga e oo i ai le i ai o matua e fai fanau i Siona, po o i soo se tasi o ona siteki ua faatulagaina, ae latou te lē aoaoina i latou ia malamalama i le mataupu faavae o le salamo, faatuatua ia Keriso le Alo o le Atua soifua, ma e uiga i le papatisoga ma le meaalofa o le Agaga Paia e ala i le faaee o lima, pe a valu tausaga le matutua, ia i ai le agasala i luga o ulu o matua; …

“O le a latou aoaoina foi a latou fanau e tatalo, ma savavali tonu i luma o le Alii” [tagai MF&F 68:25–28].

E ao foi i fanau a Siona ona saga mataituina le poloaiga a le Alii na tuuina atu ia Isaraelu anamua ma ua toe faamautu mai i le Au Paia o Aso e Gata Ai:

“Ia e ava i lou tamā ma lou tinā, ina ia faalevalevaina ou aso i luga o le laueleele ua foaiina mai e le Alii lou Atua ia Te Oe” [Esoto 20:12].

Ua faatatau ma le malosi tele nei faaaliga i le Au Paia o Aso e Gata Ai, ma e manaomia ai tama ma tina o lenei Ekalesia, ina ia aoaoina nei poloaiga ma faaaoga i totonu o o latou aiga.

O le mea lea ua matou fautuaina ai ma uunaia le faatinoga o “afiafi faaleaiga” i le Ekalesia atoa, ma o le taimi lea e mafai ai e tama ma tina ona faapotopoto tama ma teine i le fale ma aoao atu i latou i le afioga a le Alii. Ona mafai ai lea ona latou silafia uma ia manaoga ma mea o loo moomia i o latou auaiga, ma o le taimi foi lea e faamasani lelei ai i latou lava ma a latou fanau i mataupu faavae o le talalelei a Iesu Keriso. O lea afiafi faaleaiga e ao ona tuuto atu i le tatalo, usuina o viiga, pese, mea faimusika, faitauga tusitusiga paia, autu faaleaiga, ma faatonuga patino e uiga i mataupu faavae o le talalelei ma faafitauli masani o le olaga, faapea i tiute ma matafaioi a le fanau i matua, le aiga, le Ekalesia, nuu, ma le atunuu. Mo fanau iti, e mafai ona amatalia ai tauloto, pese, tala, ma taaloga. E mafai ona faia ni nai meaai mama ia e tele lava ina gaosia i le fale.

“E tatau ona matua aloese mai le tamau ai lava i le faasologa e tasi ma faatulagaga, ma e tatau ona auai tagata uma o le aiga i gaoioiga.

O nei mafutaga o le a maua ai avanoa mo le talitonuga maua’i i le va o matua ma le fanau, i le va o tuagane ma tuafafine, e maua ai foi le avanoa mo upu lapata’i, fautuaga, ma apoapoaiga a matua i tama ma teine. O le a maua ai le avanoa mo tama ma teine e faamamalu ai le tama ma le tina ma faaalia ai lo latou talisapaia o faamanuiaga o le aiga, ina ia faataunuuina moni ai le folafolaga a le Alii ia i latou, ma faaumiumi ai lo latou ola ma maua ai le fiafia. …

Matou te uunaia le autalavou ina ia nonofo i le fale i lena afiafi ma faaaoga lo latou malosi e faia ai ina ia tumu i aoaoga, manuia, ma manaia.

Afai e usitaia e le Au Paia lenei fautuaga, matou te folafola atu o le a tulai mai ai ni faamanuiaga sili. O le a faateleina le alofa ma le usiusitai i le aiga. O le a atiina ae le faatuatua i loto o le autalavou o Isaraelu, ma o le a latou maua le mana e tau ai ma aafiaga leaga ma faaosoosoga latou te fetaia’i.

O o outou uso,

Iosefa F. Samita

Anthon H. Lund

Charles W. Penrose

Au Peresitene Sili