O Le Ala Sa’o

Saunia e Elder Claudio D. Zivic

O Le Fitugafulu

Mai “Aua Nei o Tatou Ui i le Auala Sese,” Liahona, Me 2014, 39–41.

“Faalogo i upu a lena Atua o le na faia oe” (MF&F 43:23).

E tele tausaga talu ai na matou asiasi ai ma lo’u aiga i le Paka Faaofuofu o le Atunuu i Iuta, ISA. O se tasi o faaofuofu aupito sili ona matagofie ma lauiloa i le paka o le Faaofuofu Anagata, ma sa tonu ia i matou e feaei i le mauga e tau i ai.

Sa matou amata ma le naunautai, ae e lei umi ae mananao isi e malolo. Sa ou manao ia vave ona ou taunuu, o lea na ou alu ai na o au. E aunoa ma le mataituina o le ala sa tatau ona ou ui ai, sa amata ona ou mulimuli i se tamaloa sa foliga mai na te iloa le mea e agai i ai.

Sa oo ina faigata tele atu ona aea le ala. Sa ou talitonu e le mafai ona oo i ai lo’u aiga. Sa faafuasei ona ou vaaia le Faaofuofu Anagata, ae na ou ofo, aua sa le mafai ona ou au i ai. O le ala lea na ou ui ai, e le tau i le faaofuofu.

Sa ou le fiafia ma toe foi. Sa ou faatalitali ma le onosai seia matou toe feiloai ma le matou vaega. Sa latou faamatala mai na latou mulimuli i faailo igoa na faasinoina le auala, ma na faatasi ai ma le faaeteete ma taumafaiga, na latou oo ai i le Faaofuofu Anagata. Ae paga lea, sa sese le auala na ou ui ai. Oka se lesona sa ou aoaoina!

Aua nei aveesea lau vaaiga mai lou ala i le ola e faavavau ma lou Tama Faalelagi. Mulimuli i mataupu faavae o le talalelei ma poloaiga ua e iloaina, ona e i ai lea i le ala sa’o e ola faatasi ai ma Ia e faavavau.