Tala Faamamai o le Talalelei
Ua Toetu o Ia
Na soifua mai Tavita O. MaKei i le aso 8 Setema, 1873. Sa faauuina o ia o se Aposetolo i le aso 9 Aperila, 1906 i le 32 o ona tausaga, ma o le aso 9 Aperila, 1951, sa lagolagoina ai o ia e avea ma Peresitene lona iva o le Ekalesia. O se vaega lea o sana saunoaga na i le konafesi aoao ia Aperila 1966. Mo le saunoaga atoa, tagai i le Lipoti o le Konafesi, Ape. 1966, 55–59.
O se faatuatua e le maluelue ia Keriso o le manaoga aupito taua lea o le lalolagi i le taimi nei.
Afai o se vavega o se mea e le afea i tulafono o le natura, ma e le oo i ai se silafia o le tagata, o lona uiga la o le Toetu o Iesu Keriso o se vavega aupito maoae lea ua tulai mai. Ua faaalia ai le silisiliese o le Atua ma le tino ola pea o le tagata.
Peitai, o le toetu o se vavega i le na ona faapea e le oo i ai le silafia ma le malamalama o le tagata. Ia i latou o e taliaina o se mea moni, ua na o se faaaliga o se tulafono masani o le olaga. …
Ua faatuina o se mea moni faapea na avea’e e le Keriso lona tino ma ua faamamaluina, o se tagata toetu ma ua tali ai le fesili ua autausaga: “Pe afai e oti le tagata, pe toe ola mai ea o ia?” Iopu 14:14).
O Molimau o le Toetu
O le Toetu moni mai o Keriso mai le tuugamau o se mea moni lea i soo sa iloaina moni o Ia. Sa matua leai se masalosalo i o latou mafaufau. O i latou o molimau o le mea moni; sa latou iloa aua sa vaai i ai o latou mata, sa faalogo i ai o latou taliga, sa tagotago i ai o latou lima i lona tino mai, o le Togiola ua toetu.
Fai mai Peteru, le Aposetolo sinia, i le taimi na fono ai le toasefulutasi e filifili se tasi e suitulaga ia Iuta le Sekara, “O lea e tatau ona fai ma molimau faatasi ma i matou nei, i lona toetu … se tasi o ia tagata” (Galuega 1:21–22). …
I se tasi taimi na tautino atu ai e Peteru i luma o o latou fili, o tagata lava na faasatauroina Iesu i luga o le satauro: “Sema e, o outou Isaraelu e; … o Iesu lava lena ua toefaatuina a le Atua; o molimau matou uma i lena mea” (Galuega 2:22, 32). …
O Molimau Faaopoopo
O le Ekalesia a Iesu Keriso o le Au Paia o Aso e Gata Ai, faatasi ai ma Peteru, ma Paulo, ma Iakopo, ma isi uluai Aposetolo uma sa taliaina le Toetu, e le gata ina moni a’ia’i, ae o le taualuga foi o le misiona paia a Keriso i le fogaeleele.
E afe valuselau tausaga ina ua mavae le maliu o Iesu i luga o le satauro, sa tautino mai ai e le Perofeta o Iosefa Samita na afio atu ia te ia le Alii toetu ma faapea mai, “Sa ou vaaia ni Tagata e toalua, o lo laua pupula ma le mamalu e le mafaamatalaina, o tutu mai i o’u luga ae i le ea. Sa fetalai mai le tasi o i laua ia te au, ma fofoga mai ia te au i lou igoa ma fetalai mai, ao tusi ane i le tasi—O Lou Atalii Pele lenei. Faalogo ia te Ia!” (Iosefa Samita—Talafaasolopito 1:17). …
Pe ana fai e na o le molimau a Iosefa Samita, o le a pei lava, ona fetalai Keriso e uiga i Lana molimau ina ua ia fetalai e uiga ia te Ia lava, e le aoga; peitai na i ai ia Iesu le molimau a le Atua ma le Au Aposetolo. Ma sa i ai isi molimau a Iosefa Samita [o e] na faamaonia [lana] molimau, lea mea moni lea na faalauiloa e ala i le afio ane i ai o le agelu o Moronae. …
… O loo folafola foi e le Ekalesia a Iesu Keriso o le Au Paia o Aso e Gata Ai le faaaliga mamalu na vaaia e le Perofeta o Iosefa Samita:
“O lenei, ina ua uma ona faia molimau e tele e uiga ia te ia, o le molimau tupito mulimuli lenei o mau uma lava, ma te faia ia te ia: O loo soifua o ia!” (MF&F 76:22). …
Manatu i molimau e le fesiligia na tuuina mai e Aposetolo anamua–o molimau na faamaumauina i ni nai tausaga ina ua mavae le toetu–manatu i le faaaliga vaaia maoae o le Keriso Soifua i lenei vaitau, e foliga mai e faigata ona malamalama pe mafai faapefea e tagata ona saga teena o Ia ma mafai ona masalosalo e uiga i le tino ola pea o le tagata.
O Mea Tatou Te Manaomia Nei
O se faatuatua e le maluelue ia Keriso o le manaoga aupito taua lea o i le lalolagi i le taimi nei. Ua le na o se lagona. O le mana lea e agai atu ai ina faatino, ma e tatau ona i ai o se faavae aupito sili o malosiaga faaosofia uma. …
Afai tau lava ina “faia o Lona finagalo” e tagata, nai lo le taulai atu ma le leai o se faamoemoe i le oti, o le a liliu atu o latou mata i le lagi ma iloa ai ua toetu Keriso! …
Ua folafola atu e le Ekalesia a Iesu Keriso o le Au Paia o Aso e Gata Ai i le lalolagi uma, o Keriso o le Alo o le Atua, le Togiola a le lalolagi! E leai se soo moni e faamalieina i le na o le taliaina o Ia o se sa toefaatulagaina, o le faiaoga lelei, po o le tagata atoatoa e toatasi. O Le Tagata o Kalilaia e—le o se faatusa, ae moni—o le Alo o le Atua soifua. …
Ua Toefanaufouina Moni
E leai se tasi e mafai ona faia ma le loto se faaiuga e faaaoga i lona olaga i aso taitasi ia aoaoga a Iesu o Nasareta e aunoa ma lona lagonaina o se suiga i lona tagata atoa. O le fuaitau “toefanaufouina” e loloto atu lona taua nai lo mea o loo faapipii i ai e le toatele. … E fiafia le tagata na te lagonaina moni le mana siitia, o le toefaafou lea e maua mai i lona latalata i le Faaola, i le sootaga vavalalata ma le Keriso soifua. Ou te faafetai ua ou iloa o Keriso o lo’u Togiola …
O le savali o le Toetu … o le feau aupito faamafanafana, ma mamalu ua tuuina mai i le tagata, aua afai e aveese e le oti se e pele ia i tatou, e faamafanafanaina o tatou loto mafatia i le faamoemoe ma le faamautinoaga faaleatua i upu: “E le o iinei o Ia; ua toetu!” [tagai Mataio 28:6; Mareko 16:6].
Ou te iloa ma lo’u agaga atoa ua faatoilaloina le oti e Iesu Keriso, ma talu ai o loo soifua lo tatou Togiola, o le a faapea foi ona tatou ola.