Usu Le Viiga e Sili ona E Fiafia I Ai
Angela Olsen Center, Ohio, ISA
Ata na tusia e Bradley H. Clark
Faatoa uma ona ou fanau i le ma tama teine, o Repeka. Sa matua luluti o’u tiga, ma sa ou le lava.
Ina ua tuuina mai Repeka i o’u lima, sa ou maua se lagona lofituina ua tatau ona ou usuina le viiga e sili ona ou fiafia i ai, O le Atua Lo’u Tama” (Viiga, nu. 184). O la’u uluai tali o le, “E leai, ua ou matua le lava. O le a ou usuina ia te ia i se taimi mulimuli ane.” Ae na toe oo mai lava le manatu. O lea, e ui lava ina ou vaivai, ae sa amata ona ou usuina le fuaiupu muamua. Sa usu mai ai foi ma lo’u toalua ma lo’u tina.
Ina ua uma le pese, sa ou faalogoina se lagona faapitoa i totonu o le potu. E oo lava i le fomai, lea na oo lava i le taimi lea o la e tu i lona tulaga faapolofesa ma faaeteete, sa tafe ifo loimata i ona alafau. Sa ia faafetai mai ia i matou i le usuina o se pese matagofie. Fai mai a ia, mai tausaga uma na ia faafanauina ai pepe, na te lei maua lava se lagona e faapei ona ia maua i lena taimi.
Sa ou tomanatu i lena aafiaga ma mafaufau ai pe ou te alu e sue se lipine o le viiga e ave ma ia. Ae paga lea, sa ou pisi i mea o le olaga ma galo ai.
Ona oo mai ai lea o le aso ou te toe alu ai e siaki a’u. Ina ua savali mai i totonu le fomai, sa susulu ona foliga, ma sa ia opoina atu. Fai mai o ia, sa le mafai ona aveese lena pese mai lona mafaufau ma sa ia taumafai foi e sue le pese i le Initoneti ina ia mafai ai ona ia usuina i lona aiga. O iina na faamanatu mai ai e le Agaga Paia sa tatau lava ona ou sau ma aumai se kopi o le pese mo ia. Sa ou folafola atu ia te ia o le a ou toe foi mai ma le musika a o lei atoa se vaiaso.
O le po lena sa ou tatalo ai mo se fesoasoani ia ou iloa ai le fatuga o le pese e sili mo ia. O le aoauli na sosoo ai, sa ou okaina ai se CD o loo i ai le pese. Ina ua taunuu mai i le meli i nai aso mulimuli ane, sa ou le manofo i le fia tuuina atu ia te ia.
Sa matuai fiafia o ia ina ua maua ma sa faafetai mai mo le meaalofa. Sa ia fai mai na te le o mautinoa pe aisea, ae e taua tele ia te ia ona faasoa lenei pese ma lona aiga. A o ma talatalanoa pea, sa ou faamatala atu ia te ia lo’u fiafia i le pese faapea foi la’u molimau i upumoni o loo aoao mai ai.
A o alu la’u taavale i le fale i lena aso, sa ou lagonaina le alofa o lo tatou Tama Faalelagi mo se tasi o Ona afafine—o la’u fomai. Na te silafia ma alofa ia te ia, ma e finagalo o Ia ia malamalama, e mafai foi e ia ona toe foi atu e toe mau faatasi ma Ia.