O Lana Folafolaga O LE MAUA Pea Lava Pea

Robyn Casper, Iuta, ISA

A ou saofai i le sauniga faamanatuga ma mafaufau i le tatalo o le areto, sa saga oo mai pea lava pea ia upu i lo’u mafaufau: “ina ia latou maua pea lona Agaga e faatasi ma i latou” (Moronae 4:3; MF&F 20:77).

“Pea,” o loo fai mai ai—ae le na o ni taimi faapitoa. Aisea la, i nai masina na muamua atu, sa le musuia ai a’u ma lo’u toalua pe faapefea ona puipuia le ma atalii e 11 tausaga le matua na maliu i se faalavelave tautaavale? Aisea e le puipuia ai “pea” e le Tama Faalelagi i tatou ma lapata’ia?

Sa aoaoina au i le Peraimeri ma sa ou talitonu o le a puipuia i tatou e le Agaga Paia. Na te faaaogaina le leo lemu, filemu e puipuia ai, taiala, ma lapataia i tatou i faigata. Sa i ai lava le mafaufau lea ia te au talu ona maliu Ben. Ua ou matua misia lava o ia, ma sa tagitu’i lo’u loto mo se malamalama ma le filemu.

O fea sa i ai la’u leo o le lapataiga? O fea sa i ai le Agaga Paia? Sa ou manatu o la sa ma faia le mea sili ina ia amiotonu. Sa totogi a ma sefuluai, auai i sauniga, ma galulue i soo se mea lava e poloaiina ai. Sa mamao i ma’ua mai le atoatoa, ae sa fai a matou afiafi faaleaiga ma suesue i tusitusiga paia. Sa ma taumafai.

Tusa o le taimi lea sa ou nofo ai i le vasega a le Aualofa a o faamatala e le faiaoga se tala i se tasi o ona aiga. A o tu i se moli o le auala, sa maua e lea tagata o lona aiga se uunaiga ma’oti, e tu ai pea i le mea la e i ai pe a sau le moli lanumeamata. Sa ia usitai i le uunaiga, ma na toetoe o le taimi lava lea na alamu ane ai se loli tele i le alakolosi, a o mumu le moli mumu. Pe ana ia le faalogo ma usita’ia le leo, semanu e mafatia o ia ma lana fanau pe oo ai lava ina maliliu.

Sa matuai taia a’u i le tala, ae a o ou nofo i lo’u nofoa ma loimata ma sauniuni ou te tu i luga e alu ese mai le potu, sa lilofia au i se mafanafana tele. Sa ou lagona le filemu e moni lava sa i ai le Agaga Paia ia te au. O le tulaga na ou i ai, sa lei i ai o Ia o se leo o le lapataiga, ae o se faamafanafana.

Mai lava i le taimi o le mea na tupu ia Ben, sa ou lagonaina le malosiaga i luga atu o lo’u lava malosi, ma sa faamafanafanaina au i le alofa o lo’u Tama Faalelagi. E i ai taimi e le lava ai lo’u malamalama pe aisea e tutupu ai nisi o mea, ae ou te lei fesiligia lava Lona alofa.

Ou te faatuatua e malamalama le Atua i mea uma ma o le a le tuulafoaia lava i tatou. E tele matafaioi a le Agaga Paia i o tatou olaga. E mafai ona Ia puipuia i tatou, ae Na te taialaina foi i tatou, faamafanafana i tatou, aoao i tatou, ma aumaia le malamalama ma isi faamanuiaga.

Sa ou aoaoina e tausia lava e le Tama Faalelagi Ana folafolaga. Na i ai “pea” lava o Ia ma au.