O Tatalo ma Falelotu
E alala le tusitala i Iuta, ISA.
“O o’u soo outou, pe afai ua outou fealofani” (Ioane 13:35).
Sa ea a’e i luga Dani ae sa le mafai lava ona ia iloa atu le tumutumu o le falelotu matagofie. E o mai iinei tagata e ese se lotu e auai. Sa lei malamalama Dani pe aisea sa asiasi mai ai lona aiga i le falesa lea i se Aso Faraile, sa fai mai lona tama e o i se mea e ta’u o le Tapuaigaafiafi.
“O le a lena mea?” Sa fesili ai Dani.
O se mafutaga e vivii ai tagata, faitau tusitusiga paia, ma tatalo faatasi,” o le tala lea a Tama. “Pei o se aiga tele i le faaiuga o le aso.”
Sa fiafia Dani i lea faaupuga. Sa asiasi o ia ma lona aiga i Egelani. O le Aso Sa ua te’a na latou o ai i se uarota i se aai e ta’u o Ioka. I le Peraimeri, sa iloa e tamaiti uma mau ma pese na iloa e Dani. Sa ia iloaina o le uarota sa asiasi i ai, o se vaega o le Ekalesia moni a Iesu, pei foi o lana uarota masani.
Ae sa matua ese lava lea falelotu mai ia ua masani ai. Sa ia matauina se tamai laulau e tumu i moligao. Sa matau e Dani se tamaitiiti sa tutuina se moligao.
“Aisea ua e tutuina ai moligao?” Na fesili atu ai Dani ia te ia.
Sa ataata le tamaitiiti. “Ou te tutuina se moligao pe a ou tatalo atu mo ni mea faapitoa. A mumu, ou te faamoemoe o le a oo atu ina faafofogaina e le Atua le tatalo.”
Sa foliga mai ia Dani o ni moligao lava e masani ai. Sa fai si ona faaletonu, ae sa manao o ia e faaaloalo. Sa ataata atu o ia i le tamaitiiti.
Sa nonofo i lalo Dani ma lona aiga, ma e lei pine ae amata le Tapuaigaafiafi. Sa ia iloa atu le tamaitiiti lava lea i nai laina e lei mamao ese. Ona ia iloa ai lea na te le iloaina se pese ia sa pepese ai tagata uma. Ina ua latou tatalo, sa latou faitauina mai se tamaitusi. Sa foliga e ese mea uma mai mea ua masani ai o ia.
Ae sa matua matagofie musika, tusa lava pe lei masani ai. Ona tu lea i luga o se tamaloa e faitau tusitusiga paia. Sa fai sona ofutalaloa, nai lo le suti ma se fusiua pei o le epikopo a Dani. Ae ina ua amata ona ia faitau, sa matauina e Dani na te iloa le tala! Sa ia faitauina le tala ia Iesu i le faamalologa o lepela e toa 10.
“Tama,” sa musumusu atu ai Dani, “Ou te fiafia lava i le tala lea.”
Sa ataata lona Tama. “Ma au foi.”
Ona fai lea e le tamaloa ma lona ofutalaloa le tatalo. Sa ole atu o ia i le Atua e faamanuia i latou o e mamai ma manaomia le fesoasoani. Pei lava ona sa faia e Dani! Sa ole atu foi o ia mo se faamanuiaga faapitoa mo taitai o lana lotu. Sa manatua e Dani le talosagaina pea e lona aiga le Tama Faalelagi e faamanuia Peresitene Thomas S. Monson ma ona fesoasoani.
Sa oo mai se lagona mafanafana i le loto o Dani. Sa iloa e ia na ta’u atu e le Tama Faalelagi ia te ia e alofa o Ia i Ana fanau uma ma faafofogaina a latou tatalo uma, tusa lava pe na latou o i se isi lotu e ese ai, ma e le o i ai le atoaga o le talalelei.
Ina ua tutu i luga o le a o, sa siaki e Tama lana telefoni. Sa faanoanoa o ia ina ua faitau i feau o i ai. “Ua maliu Sister Monson,” o lana tala lea.
“Auoi leai!” Sa vave ona tatalo Dani i lona loto ina ia le afaina Peresitene Monson.
“O lelei mea uma?” na fesili ane ai se tasi. O le tamaitiiti lea na vaai i ai muamua. Sa ia faalogo atu ia Dani, ma sa foliga mai ua popole ai o ia.
“Ua maliu Sister Monson,” le tala a Dani. “O ia o le faletua o lo matou perofeta, o Peresitene Monson.”
“Talofa e,” o lana tala ma le agaalofa. “O le a ou tutuina se moligao mo ia.”
Sa ataata atu Dani ma faafetai atu ia te ia. Sa manatu o ia e ese le lelei o si tamaitiiti ma lona faia o se tatalo faapitoa mo Peresitene Monson. Sa ia iloa o le a faafofoga le Tama Faalelagi i le tatalo na ia faia i lona loto ma le tatalo foi a si tamaitiiti.