Fesili & Tali
“E mafai faapefea ona ou lagona le mafanafana e talanoa atu ai i lo’u epikopo e uiga i faafitauli po o ni atugaluga?”
Atonu e te lagona le fefe e talanoa i lou epikopo e uiga i mea o loo e tauivi ai, ma o se mea lava e masani ai. E tele ina tatou fefefe a o lei oo mai ni aafiaga fou pe ao lei talanoa foi ma se tagata matua.
Ae o lou epikopo na tofia e le Atua. Na tofia o ia aua o ia o se soo ua tuuto atu ia Iesu Keriso. O le a ia faia le mea sili ina ia agalelei ma malamalama. O lana sini o le fesoasoani lea ia te oe e te sau i le Faaola ina ia e maua le filemu. Muamua, atonu e te lagona le maasiasi e talanoa atu ia te ia e uiga i au fesili po o agasala, ae peitai o le a le manatu faatauvaa lava o ia ia te oe. O le mea moni, o le a fiafia o ia ua i ai sou naunauga e faaleleia. Ma o le a ia le faalauaiteleina a lua talanoaga.
E te le tau tauaveina na o oe au avega. E mafai ona fesoasoani lou epikopo e tali au fesili pe a manaomia, fesoasoani ia e salamo ma lafoai, e ala i le Togiola a Keriso, ia lagona o le tausalaina, faavauvau, po o le le agavaa.
A o e talanoa atu i lou epikopo, o le a e lagonaina lona alofa ia te oe. E ui ina nafa o ia ma le uarota atoa po o le paranesi, ae o lana taulaiga autu lava o alii talavou ma tamaitai talavou. E te le o faalavelave ia te ia i lou talosagaina o se fesoasoani.
E mafai ona e tatalo i le Tama Faalelagi mo le malosiaga ma le lototele e talanoa ai i lou epikopo. Ua Ia faatagaina lou epikopo e fesoasoani ia te oe ma ua naunau foi lou epikopo e faia. Afai e te alu ma lou loto matala ma se naunauga ia faaleleia atili, o le a e iloaina e te tuua lona ofisa ma se lagona sili atu nai lo le taimi muamua.
O Le A Le Manatu Faatauvaa o Ia ia te Oe
Ua tuuina i le epikopo o lau uarota le pule e taiala ai oe i laasaga o le salamo. O nisi taimi o le liliu atu i lou epikopo e na o le pau lea o se ala mo oe e te salamo atoa ai e ala i le Faaola. Ina ua manaomia ou te talanoa i lo’u epikopo, sa fesoasoani mai o ia ia te au ia ou maua le Faaola ma foia lo’u manu’a loloto sa i ai. E manao lou epikopo e fesoasoani ia te oe. O lona valaauga o le vaaia o oe, ma o le a le manatu faatauvaa lava o ia ia te oe, ona o loo i ai se mea e te vaai ai ia te ia.
Madison D., 18 tausaga, Iuta, ISA
O Loo Naunau Lou Epikopo e Fesoasoani ia te Oe
E masani ona ou le maua se lagona toafimalie i faatalanoaga, ae sa iu ina ou iloaina sa naunau lava lo’u epikopo e fesoasoani e foia a’u faafitauli. Ia faatuatuaina lou epikopo: o ia o se leoleo mamoe ma o le uarota o lana lafu.
Jaime R., 19 tausaga, Cochabamba, Polivia
O Le a Na Le Faalataina Lava Lou Faatuatuaga
Ua oo ina ou iloa o se epikopo atonu o le tagata matua aupito faatuatuaina lea e mafai e se talavou ona sailia mo se fesoasoani. O le a na ia le faalataina lava lou faatuatuaga—o mea uma lava e faasoa atu ia te ia, e gata ai lava i lona ofisa. O nisi taimi e faigata tele ona faasoa au faafitauli, peitai o le talanoa fesagai ma se tasi e alofa ma manatu popole ma manao i le mea sili mo oe, e atili ai ona faigofie.
Nicole S., 18 tausaga, Idaho, ISA
E Mafai Ona E Faalagolago ia te Ia
O lou epikopo po o le peresitene o le paranesi o se auauna moni lava a le Alii. E mafai ona e faalagolago ia te ia mo se taitaiga a o e sailia musumusuga mai le Agaga Paia ma tusitusiga paia. E tatau ona e malamalama ua i ai iina le epikopo e fesoasoani ma e taitaiina o ia e le Atua.
Stanislav R., 19 tausaga, Donetsk, Iukureini
Manatua e Alofa o Ia ia te Oe
Afai e i ai se mea e te manao lava e talanoaina ma le epikopo, atonu e sili atu ona faigofie ona talatalanoa muamua ma ia e uiga i le a’oga ma isi mea masani. Afai e te fefe, e manaomia ona e talanoa ia te ia e uiga i mataupu o le salamo, ae ia manatua e alofa o ia ia te oe. E le tatau ona e fefe i ona manatu e uiga ia te oe, aua o le a le mea o le a manatu faatauvaa ai ia te oe ona o lou manao e faalatalata atili ia Keriso?
Ashley D., 17 tausaga, Arisona, ISA
Tatalo ia Iloa
Fesili ifo ia te oe lava pe aisea e te lagona ai le le toafilemu e talanoa i le epikopo. Pe e te manatu o le a le mafai ona ia foia au faafitauli? Tatalo ia e iloa e alofa le epikopo ia te oe ma ua tofia e fesoasoani ia te oe.
Adam H., 13 tausaga, Kalefonia, ISA.
Tusa Lava Pe E Te Faia se Mea Sese
E ono faigata ma maasiasi le ta’uta’u atu o mea i lou epikopo, ae a e savali ese atu mai lena ofisa, o le a e mapu, ma o le a e iloaina e alofa le Tama Faalelagi ia te oe. E finagalo o Ia ia e fiafia, tusa lava pe e te faia se mea sese.
Amanda W., 16 tausaga, Iuta, ISA
Ua I Ai o Ia Iinei e Fesoasoani
O le epikopo o le leoleo mamoe o lau uarota. Manatua o le a ia faia le mea sili e fesoasoani ai ia te oe ma ua ia te ia le mana o le Atua i lana itu. Afai e te lagona le fefe, e mafai ona e tatalo mo le malosi ia mafai ai ona e talanoa ma lou epikopo. A uma, o le a e fiafia na e alu ia te ia—ma o le a aoga.
Samuelu H. 14 tausaga, Idaho, ISA