Auala e Poto Ai

Saunia e Elder Neil L. Andersen

O Le Korama a Aposetolo e Toasefululua

Mai se saunoaga i le faigalotu a le Iunivesite o Polika Iaga–Idaho na tuuina atu i le aso 10 Aperila, 2009.

I le galulolo o faamatalaga ua tatou maua i nei ona po, ua tatou matuai moomia ai lava le poto—poto e faavasega ai ma iloatino pe faapefea ona faaaoga mea ua tatou aoaoina.

Tatou manatua:

1. E tatau lava ona tatou sailia le poto.

2. E anoanoai vaega o le poto ma e oo mai i tulaga ma lanu eseese.

3. O le vave maua o le poto e aumaia ai faamanuiaga maoae.

4. O le poto i se tasi mataupu atonu e le mafai ona faaaoga i se isi mataupu.

5. O le poto o le lalolagi, e ui i le tele o tulaga e taua tele, ae e sili ona taua pe a faagauai atu ma le lotomaualalo i le poto o le Atua.

O loo faamatala mai i tusitusiga paia ituaiga e lua o le poto: o le poto o le lalolagi ma le poto o le Atua. O le poto o le lalolagi e i ai vaega e le lelei ma vaega e lelei. I se faamatalaga aupito le lelei o le poto o le lalolagi, e mafai ona faamatalaina o se mea moni, faaafaafa, e lualuagia i le atamai ma faiga ia ausia ai faamoemoega manatu faapito ma faatiapolo.

E i ai se isi ituaiga o le poto o le lalolagi e le leaga tele ona faamoemoega. O le mea moni e lelei tele. O le poto lea e maua pea lava pea e ala i le suesue, manatunatuga, mataituuga, ma le galue malosi. E taua tele ma e fesoasoani i mea tatou te fai. I tagata mafaufau, e oo mai a o tatou maua le poto masani o le olaga nei.

O le mea e sili atu ona taua, o le poto e aumaia ai le manuia i le lalolagi, e tatau ona naunau e la’a i tua o le poto o le Atua ma aua nei mafaufau e mafai ona suia ai le [poto o le Atua].

E lei foafoaina tutusa le poto uma. E ao ina tatou iloa a oo ina i ai se feteenaiga i le va o le poto o le lalolagi ma le poto o le Atua, e tatau ona tatou gauai atu o tatou loto i le poto o le Atua.

Ou te fautua atu e te mafaufau i ni luitau o oulua feagai. Tusi se laina agai i lalo i le ogatotonu o se laupepa. Lisi le poto o le lalolagi i le itu tauagavale ma le poto o le Atua i le itu taumatau. Tusi ia faafitauli e feteenai.

O a filifiliga o e faia?

I le vaega e 45 o le Mataupu Faavae ma Feagaiga, lea o loo talanoa i mea e tutupu e tau atu i le Afio Mai Faalua o le Faaola, o loo toe faamatala mai ai foi e le Alii le tala i taupou e toasefulu ona ia tuu mai ai lea o upu nei ia i tatou: “Aua o i latou o e e popoto ma ua latou talia le upumoni, ma ua latou ave le Agaga Paia mo o latou taiala, ma sa lei faaseseina—e moni Ou te fai atu ia te outou, o le a le tatuuina i latou i lalo ma lafo i le afi, ae o le a latou gafatia le aso” (tagai MF&F 45:57).

Tatou saili i le poto o le Atua. E tele naua mea e mafai ona tatou aoaoina nei e uiga i le poto. Ou te folafola atu ia te oe o le a e maua faamanuiaga a le Alii pe a e sailia le poto, le poto o le Atua. Ua matuai naunau lava o Ia e tuuina mai Lona poto ia te i tatou. Ma afai tatou te usiusitai ma lototatalo ma sailia, o le a maua.

O Faapefea Ona E Faaaogaina Lenei Mea?

“E lua lava ala e mafai ona filifili ai. E mafai ona e filifilia le mea e te manao ai. Ae e tatau lava ona e filifili ma le poto. E mafai ona ou fai atu o le filifilia o le Alii e mafai ona fesoasoani ai ia te oe i aso taitasi ma o le i ai o le Agaga Paia i ou autafa, e mafai ai ona fesoasoani ia te oe i tulaga taitasi. O le filifilia o le itu sese e mafai ona oo atu ai i se lagona le fiafia, o se lagona e foliga mai o le fiafia mo sina taimi puupuu ae mulimuli ane, o le a e vaai ai i taunuuga ma o le a e matuai faanoanoa ai lava ona o le faaiuga sa e faia. Ia i ai i le itu a le Alii! E le faigofie i taimi uma, ae e taua le faia!”

Samuel J., Austria