Talitonuga Faalelotu Mama

Saunia e Elder W. Christopher Waddell

O Le Fitugafulu

O le auauna atu ma le le faatuaoia—faagalo ia i tatou lava, tali atu i manaoga o isi, ma le ofoina atu o o tatou ola e tautuaina ai i latou—o se uiga lava lea o soo o Iesu Keriso.

I le Mataio matapu e 11 ua aoao mai ai ia i tatou e le Faaola se lesona taua e ala i Lona lei tali atu i se fesili na tuuina mai e soo a Ioane le Papatiso:

“Ua lagona e Ioane i le fale puipui o galuega a Keriso, ona aauina mai ai lea e ia ni ona soo se toalua,

“Ua faapea mai ia te ia, O oe ea le maliu mai, pe matou te faatali i se tasi?

“Ona tali atu ai lea o Iesu, ua faapea atu ia te i laua, Ina o atu ia oulua, ma faailoa atu ia Ioane o mea ua oulua faalogo i ai, ma vaai i ai:

“Ua pupula tauaso ma ua savavali pipili, ua faamamaina lepela ma ua logo tutuli, ua faatutuina o e na oti ma ua folafolaina foi le tala lelei i e matitiva” (Mataio 11:2).

Nai lo le tuuina atu o se faamalamalamaga puupuu faaleaoaoga faavae e ta’u atu ai o Ia lava lea, “o ia le e tatau ona afio mai,” ae sa tali atu le Faaola e ala i mea sa Ia faia—Lana faataitaiga o le auauna atu.

I le konafesi aoao ia Aperila 2014, na faamanatu mai ai e Elder Richard G. Scott o le Korama a Aposetolo e Toasefululua: “E sili atu lo tatou auauna atu i lo tatou Tama oi le Lagi e ala i faatosinaga amiotonu o isi ma auauna atu ia te i latou. O le faataitaiga aupito sili na soifua i le fogaeleele o lo tatou Faaola, o Iesu Keriso”¹

O le auauna atu ma le le faatuaoia—faagalo ia i tatou lava, tali atu i manaoga o isi, ma le ofoina atu o o tatou ola e tautuaina ai i latou—o se uiga lava lea o soo o Iesu Keriso. Pei ona sa aoao mai e le Tupu o Peniamina i le silia ma le 100 tausaga a o lei soifua mai le Faaola, “Pe a outou auauna atu i o outou uso-a-tagata, ua na o lo outou auauna atu lava lea i lo outou Atua” (Mosaea 2:17).

Ua faamanatu mai e Iakopo ia i tatou e faapea o se itu taua o le “talitonuga faalelotu mama” o loo maua lea i a tatou auaunaga i isi pe a tatou “tauasiasi atu i e matua oti ma fafine ua oti a latou tane i o latou tiga” (Iakopo 1:27). O le “talitonuga faalelotu mama” e sili atu i le na o se tautinoga o le talitonuga; o se faatinoga o le talitonuga.

Alofa I E Tou Te Faimalaga

I le totonugalemu o Iulai 1984, i ni nai vaiaso talu ona ona ma faaipoipo ma lo’u toalua o Carol i le Malumalu o Los Angeles i Kalefonia, sa ma malaga i Iuta, e amata ai ona ou faigaluega ae faaauau le aoga a Carol i le kolisi. Na tofu i ma’ua ma le taavale. Sa ma utaina i taavale ia e lua a ma meatotino uma.

Pe a ma le afa o le ala i lo ma taunuuga, ae seu mai le taavale a Carol i autafa o la’u taavale ma amata ona genogeno mai ia te au. O le taimi lea e lei i ai ni telefoni feaveai ma ni feau feaveai i telefoni ma ni Twitter. O le vaaia o ona foliga e ala atu i le faamalama o lana taavale, sa ou iloa ai e le o manuia lana faalogo. Sa fai mai e mafai lava ona ave lana taavale ae sa ou popole mo la’u manamea fou.

Ina ua ma latalata atu i le taulaga itiiti o Beaver, Iuta, sa toe seu mai foi lana taavale, ma sa ou iloa ai ua manaomia ona taofi. Ua ma’i o ia ma ua le toe mafai ai ona faaauau. Sa tutumu a ma taavale e lua i lavalava ma meaalofa o le faaipoipoga, ae paga lea, e utiuti si a ma tupe. Sa le gafatia e le ma paketi se potu i se faletalimalo. Sa ou le mautonu po o le a le mea e fai.

E leai se tasi o i ma’ua ua oo i Beaver, ma e le o mautinoa lelei foi la’u mea lea e sue, ma sa ma feofeoai faataamilo mo ni nai minute seia oo ina ou vaaia se paka. Sa ma afe i le paka ma maua ai se laau paolo, lea sa ou fofola ai se palanikete e taoto ai Carol.

I nai minute mulimuli ane, sa afe mai se isi taavale ma paka ai i autafa o a ma taavale e lua. Sa oso mai i fafo se tamaitai, pe tusa o le matua o o ma tina, ma fesili pe i ai se mea o faaletonu ma pe mafai ona ia fesoasoani mai. Fai mai o ia, sa ia matauina i ma’ua a o sau lana taavale ma sa ia lagona ai e tatau ona tu. Ina ua ma faamatala atu i ai le tulaga ua ma i ai, sa vave ona ia valaaulia i maua e mulimuli atu ia te ia i lona fale, lea e mafai ai ona ma malolo i le umi ma te manaomia.

E lei pine ae o ma malolo i se moega matagofie i se potumoe i le potu i lalo o lona fale. Ina ua ma mapu, sa fai mai lenei tuafafine lelei, e i ai ana feau e alu e fai ma o le a tuu na o i maua mo ni nai itula. Sa ia fai mai, afai ma te fiaaai, e pule lava i maua i soo se mea e mafai ona ma maua i lona umukuka, ma afai ma te o a o lei foi mai, faamolemole ia tapuni le faitotoa i luma.

Ina ua lava le moe lea sa ma matua manaomia, sa lagona le malosi e Carol ma sa faaauau le ma malaga e aunoa ma se mafaufau i le umukuka. Na ma tuua, a o lei toe foi mai le tamaitai. O se maasiasi, ma te lei tusia le tuatusi ma ma te lei faafetai lelei atu i lo ma’ua Samaria agalelei, o le sa tu mai i le ala ma tatala mai lona fale i ni tagataese sa manaomia le fesoasoani.

A ou toe tomanatu i lenei aafiaga, na ou manatua upu a Peresitene Thomas S. Monson, o loo aumaia ai le faataitaiga o le poloaiga a le Faaola i soo se tagata: e “o ma faia foi faapea” (tagai Luka 10:37) “E le mafai ona tatou alolofa moni i le Atua pe afai tatou te le alolofa i a i latou o tatou faimalaga i le malaga fai o lenei olaga.”²

Pe o fea lava tatou te fetaiai ai ma “uso faimalaga”—i luga o le ala po o o tatou aiga, po o malae taalo po o a tatou aoga, i falefaigaluega po o le lotu—a tatou sailia, vaaia, ma galulue, o le a avea atili i tatou e faapei o le Faaola, faamanuiaina ma auauna atu i le gasologa o le ala.

Saili

Na aoao mai Elder Neal A. Maxwell (1926–2004) o le Korama a Aposetolo e Toasefululua:

“E le pei o le Faaola pele, e le mafai lava ona tatou togiolaina agasala a tagata! E le gata i lea, tatou te le mafaia lava ona onosaia ma’i, o mafatiaga ma faanoanoaga uma o le olaga nei (tagai Alema 7:11–12).

“Peitai, i si a tatou fua itiiti, pei lava ona sa valaaulia ai e Iesu, e mafai lava ona tatou taumafai e avea ’e pei lava o [Ia]’ (3 Nifae 27:27).”³

A tatou saili ia avea e faapei o Ia, ma se manaoga faamaoni e faamanuia “i latou o tatou faimalaga”, o le a tatou maua avanoa e faagalo ai i tatou lava ae siitia isi. O nei avanoa atonu e tele ina le faigofie, o le tofotofoina o lo tatou manao moni ia avea atili faapei o le Matai, o Lana auaunaga aupito silisili o auaunaga uma, Lana Togiola e le iu, sa lei faigofie. “E ui i lea, ia i ai i le Tama le viiga, ma sa Ou inu ma faauma ai au tapenapenaga mo le fanauga a tagata” (MF&F 19:19).

O le sailia ma le faamaoni ia avea atili e faapei o le Faaola, o le a mafai ai e i tatou ona iloa mea e le o mafai ona tatou vaaia. Sa lava le soifua ai o lo ma Samaria agalelei i le Agaga, e tali atu ai i se uunaiga ma sau ai i se tagataese na manaomia le fesoasoani.

Vaai

Ina ia vaai i ni mata faaleagaga o le vaai lea i mea e pei ona i ai moni, ma iloa manaoga atonu tatou te lei iloaina. I le faataoto i mamoe ma oti, e leai se tasi o i latou na “faamanuiaina” pe “faamalaiaina” na iloaina le Faaola ia i latou o e na fiaaai, fiafeinu, le lavalava, pe i le falepuipui. Sa latou tali atu i lo latou taui e ala i le fesili, “O anafea na matou iloa ai oe?” Tagai i le Mataio 25:34-44.

E na o i latou o e sa vaai i mata faaleagaga, na iloaina manaoga, na galulue ma faamanuiaina ai i latou sa mafatia. Sa iloa e lo ma Samaria agalelei le manaoga, a o ia vaai i ona mata faaleagaga.

Galue

E mafai ona tatou vaai i manaoga i o tatou siosiomaga, ae manatu e le gafatia ona tali atu i ai, ma faapea e le talafeauga mea tatou te ofoina atu. A o tatou saili ina ia avea e faapei o Ia, ma a o tatou vaaia manaoga i e tatou te faimalaga e ala i mata faaleagaga, e tatau ona tatou faatuatua e mafai e le Alii ona galue e ala ia i tatou, ona tatau lea ona tatou galulue.

Ina ua ulufale atu i le malumalu Peteru ma Ioane, sa latou fetaiai ma se tagata “pipili talu ona fanau mai” sa faatoga atu ia i la’ua mo se meaalofa (tagai Galuega 3:1–3). O le tali atu a Peteru o se faataitaiga lea ma se valaaulia mo i tatou taitoatasi:

“E leai sa’u ario po o sa’u auro; a o le mea ua ia te au, ou te avatu lea ia te oe, O le suafa o Iesu Keriso o le Nasareta, ina tu ai ia i luga, ina savali.

“Ua tago atu foi o ia i lona lima taumatau, ua faatu ia te ia i luga” (Galuega 3:6–7).

E mafai ona tatou galulue e ala i le tuuina atu o o tatou taimi ma taleni, se upu alofa, po o se galuega faatino. A o tatou saili ma vaaia, o le a o tatou i ai i ni avanoa ma tulaga e mafai ai ona tatou galulue ma faamanuia. Sa galue lo ma Samaria agalelei. Sa ia aveina i ma’ua i lona fale ma tuuina mai mo i ma’ua ana mea sa i ai. O le mea moni sa ia fai mai, “O le mea ua ia te au ou te avatu ai ia te oe.” O le mea tonu lava lea na ma manaomia.

Na aoao mai e Peresitene Monson nei lava mataupu faavae:

“O i tatou taitoatasi, i le faigamalaga i le olaga nei, o le a malaga i lana lava Ala i Ieriko. Mata o le a sou aafiaga? Ae o le a sa’u? Pe o le a ou le iloaina ea o ia, o le ua pau atu i lima o faomea ma manaomia la’u fesoasoani? Ae a oe?

“Mata o le a ou vaai atu i le ua manua ma faalogo atu i lana faatoga, ae ou faatafa ma ui atu i le isi itu? Ae a oe?

“Pe o le a ou vaai atu, faalogoina, tu, ma fesoasoani? Ae a oe?

“Ua tuuina mai e Iesu la tatou anavatau, ’Alu, ma faia foi faapea.’ A tatou usitai i lena tautinoga, o iina e tatala mai ai i la tatou vaaiga o le faavavau, se mata’iga o le olioli e seasea faaluaina ma e le maausia.”⁴

A o tatou avea atili e faapei o le Faaola e ala i le sailia, vaaia, ma galulue, o le a oo ina tatou iloa le moni o upu a le Tupu o Peniamina: “Pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17).