Taimi o Tusitusiga Paia

Ua Faamalolo e Iesu se Lepela

Saunia e Erin Sanderson

E alaala le tusitala i Iuta, ISA.

Aoao faatasi e uiga i le Feagaiga Fou i le tausaga nei!

Mafaufau i se taimi na e ma’i ai. Pe na faia e se tasi se mea agalelei e fesoasoani ai ina ia e manuia?

I le Feagaiga Fou ua tatou faitau ai i le ala na faaalia ai e Iesu le agalelei i tagata sa mamai. I se tasi aso, sa alu atu ai ia Iesu se tagata sa maua i se ma’i tiga o le pa’u e ta’ua o le lepela. Sa ia iloa o loo i ai ia Iesu le mana e faamalolo ai tagata uma sa mamai. Sa talitonu o ia e mafai e Iesu ona faamalolo o ia. Sa pa’i atu Iesu i le lepela ma faapea atu, “Ina mama ia oe” (Mareko 1:41). O le taimi lava na fetalai ai Iesu, na malolo ai le tagata,

E mafai ona tatou mulimuli i tulagaaao o Iesu e ala i le agalelei atu ma alolofa i isi o e mamai pe faanoanoa.

Aoao Atili: O Talalelei

O le Feagaiga Fou e fa ona tusi faapitoa ua ta’ua O Talalelei, ia na tusia e nisi o soo o Iesu. O loo faamatala mai i Talalelei le taimi na soifua ai Iesu Keriso i le fogaeleele. O le tala e uiga i le faamalologa o le lepela, o loo maua i Talalelei e tolu. O loo maua i le Mareko 1:40–42 faapea foi i le Mataio 8:2–4 ma le Luka 5:12–14.

Manatu mo Talanoaga Faaleaiga

E mafai ona e faaaogaina ata o tusitusiga paia o i le itulau e 74 e faamatala ai le tala mai le Mareko 1:40–42. Ona mafai lea ona e faitauina le Iuta 1:22 ma fuafua pe faapefea ona faia faatasi e le aiga se mea e faia ai se eseesega i le olaga o se tagata. Atonu e mafai ona e faia se auaunaga faalilolilo mo se tasi.

Pese: “Tau Mai Tala ia Iesu” (Tusipese a Tamaiti, 36)

Mau: Mareko 1:40–42

Vitio: Alu i le Biblevideos.org e matamata le “Ua Faamalolo e Iesu se Tagata Pipili i le Sapati” ma le “Ua Faamalolo e Iesu se Tagata na Fanau Mai o Tauaso.”

Mulimuli i Tulagaaao o Iesu

Faatino e lou aiga pe mafai faapefea ona outou faaalia le alofa mo isi i tulaga nei. Fatufatu ni au lava tulaga!

• Ua sii atu i le tou pitonuu se aiga fou.

• O nisi tamaiti e agaleaga ia i se isi tamaitiiti i le aoga.

• Ua asiasi mai i le Peraimeri se tasi e le masani i se isi i le lotu.

• E leai se tasi e taaalo ma lou uso po o lou tuafafine laitiiti.

• O loo tagi le pepe ae o loo taumafai lou tina e fai le kuka.

• O loo i ai se tasi o lau uarota po o le paranesi o loo ma’i ma e le mafai ona tuua le fale.

Motugaafa o Mau: Sailiga o upu

I le Mareko 1:41 o le upu mutimutivale o loo faaaoga. O nisi taimi e i ai upu tetele i le Tusi Paia atonu e te le malamalama ai. A e maua se upu e te le iloa, e mafai ona e faaaogaina le Taiala i Tusitusiga Paia e fesoasoani ai ia te oe! Mo se faataitaiga, e mafai ona e sueina le “Mutimutivale” e sue ai le uiga ma sue ai isi mau o loo faaaogaina. O a isi upu e mafai ona e suea i le tala e uiga ia Iesu o loo faamaloloina le tagata ua i ai le lepela?