“Ua Naunau Ia Te Oe”
E alala le tusitala i Iuta, ISA.
Ina ua ma le iloa nisi mea e aoao atu, sa fautuaina e la’u soa ma te usuina le viiga lea.
I se tasi Aso Sa i se aoauli lagilelei i la’u misiona i Balsan, Korea sa ma faatofa atu ma la’u soa i tagata o le au paia ina ua tuua le lotu, ma o le a ma o e talai, ae faailoa mai e le taitai misiona a le uarota ia i maua se alii talavou e 12 tausaga, o Kong Sung-Gyun. Sa lotu i lena aso ma sa manao e aoao atili i le talalelei.
Ioe sa ma fiafia i le aoaoina o ia, ae sa ou popole i le aoaoina o se tagata laitiiti tele. Sa tonu ia i ma’ua e faamautinoa ua maua mai le faatagaga a ona matua, o lea na ou telefoni ai i le fale o Kong Sung-Gyun ma talanoa puupuu ai ma lona tina, o Pak Mi-Jung. Sa ou ofo ina ua fai mai o ia ua fiafia i le fia sau o lana tama i le lotu, ma o le a fiafia ma te o atu e aoao o ia.
Tagata Sailiili e Lei Fuafuaina
O le afiafi na sosoo ai, na ma taunuu ai i le fale o le tamaitiiti, ua saunia e aoao. Sa ma tetei aua sa manao foi Pak Mi-Jung ma te aoaoina lana tama teine, o Kong Su-Jin. Ma talu ai ona o i ma’ua o ni tagataese i lona fale, o lea sa manao ai Pak Mi-Jung e nofo ai i le taimi o lesona. Sa ma mananao e aoao po o le a lava le toatele e mananao e faalogologo.
Ina ua uma ona tali sa latou faaafe, sa matou nonofo loa i lalo ma amata ona talatalanoa. Nai lo le manao ma te amata loa lava i le lesona, sa manao Pak Mi-Jung ia iloa atili i ma’ua ma faamatala mai foi e uiga i tulaga o lo latou aiga. Sa ia faamatala mai o latou mafatiaga ma faigata sa latou feagai talu ai, e aofia ai le tauiviga lata mai a lana tama tama ma le kanesa. Na manuia ona togafitiga i le leisa, ma o le taimi nei ua faiifo le kanesa, ae na lapataia i latou e fomai e toe ono sasao mai i se taimi. O se popolega tele lea i le aiga. O se aiga limavaivai, ma e matuai galue malosi lava le tama ia tau lava ina i ai se mea e nonofo ai ma meaai i luga o le laulau.
Sa faateia a’u ma faanoanoa ona o mafatiaga o o latou olaga. Sa lei faigofie le olaga mo i latou, peitai sa matua iloagofie le vavalalata o le aiga nai lo se isi aiga ua ou feiloai i ai i Korea, lea e tele mea ua ta’u mai ai i tagata e mapoaiga e pei o Korea. Sa ma tuua lo latou fale i lena afiafi ua tele lo ma iloa i lenei aiga faapitoa, ma ua maua le avanoa e faasoa atu ai ia i latou savali o le talalelei.
Sa ma toe foi ma la’u soa e toe aoao i lena vaiaso, ma o taimi taitasi ma te lagonaina ai lava le mafanafana lava lea e tasi ma le agalelei sa ma maua i le ma asiasiga muamua. Ina ua oo i le autu o le papatisoga, sa taufai naunau tamaiti e auai i le Ekalesia. Peitai, e lei maua e le tina lea sagisagi fiafia. E ui ina sa tosina o ia i a ma’ua aoaoga ma sa ia faamoemoe foi e moni, ae na te lei lagonaina e mafai ona ia tausia ia ituaiga o tautinoga e manaomia pe a auai i le Ekalesia. Na te lei lagonaina foi ua talafeagai mo ia ona papatiso e aunoa ma lona toalua, lea ma te lei feiloai lava i ai. E ui o lea, sa naunau o ia matou te feiloai ma sa manao foi e auai faatasi ma lana fanau i le lotu.
Ina ua lata i le faaiuga o le vaiaso lona lua, a o faaauau pea ona ma aoao atu i lona fale, sa matou feiloai ma lona toalua, o Kong Kuk-Won—o se alii lotomaualalo, faaaloalo, ma le agalelei. Sa ia mafuta mai ma i matou i nai lesona ma sa talitonu o ia i mea uma sa ma aoaoina, e aofia ai aoaoga faavae ia e tele ina le talitonu ai isi tagata e pei o le sefuluai ma le Upu o le Poto. E ui i le tulaga e toetoe ina utiuti mea tautupe, ae sa amata ona totogi a latou sefuluai. Na pau le toatuga o le tama, o le tatau lea ona faigaluega i Aso Sa. Sa faigaluega o ia i le Malaevaalele Faavaomalo o Seoul i Aso Sa uma, o lea sa le mafai ai ona o i le lotu ma lona aiga. E ui i ona taimi faigaluega, ae sa fuafua lava o ia ma lona toalua e auai i papatisoga o o la’ua fanau i le Aso Sa na sosoo ai.
Ina ua maea papatisoga o tamaiti, sa faaauau pea ona matou feiloai soo i le fale o le aiga. Sa fai a matou afiafi faaleaiga, faasoa tusitusiga paia ma aafiaga faagaeetia, ma faafeiloai atu i la’ua i tagata o le uarota. Peitai, e ui i aafiaga faifai pea o le talalelei, sa lei taitai ona latalata ina papatisoina ia matua.
O le taimi lea ua siitia ai la’u soa, ma o la’u soa fou e faatoa sau mai le nofoaga e aoao ai faifeautalai. Sa tumu o ia i le faatuatua, malosi, ma le naunautai, ma sa matuai faigata ia te au ona maua o ia. Ina ua mavae nai taimi na matou feiloai ai ma Kong Kuk-Won ma Pak Mi-Jung, sa fai mai la’u soa pe na matou anapogi ma la’u soa muamua ma i la’ua. Ma te lei faia. O le mea moni, e lei oo mai lava ia te au lea manatu. O lea na matou talanoa ai ma le aiga ma fautuaina se anapogi. Sa faateia au ona sa anapopogi lava latou, mo le ma’i o la la’ua tama ma mo se suiga o taimi faigaluega ina ia mafai ai e Kong Kuk-Won ona alu i le lotu. Ina uma ona matou anapogi ma la’u soa ma i la’ua, sa talia a matou tatalo ma sa suia taimi faigaluega o Kong Kuk-Won. Ae na faauliulito lava Pak Mi-Jung e uiga i le papatisoina.
O Se Manatu Musuia
Ona i ai lea o se isi manatu manaia o la’u soa. Sa ia tago i lana tusipese ma talosagaina pe mafai ona matou pepese faatasi. E ui ina sa matou pepese faatasi i nisi taimi, ae ou te lei vaaia lava Pak Mi-Jung o pese, ma sa na ona ou manatu ai lava e le iloa e ia pese, pe le o lagolelei foi ona e fou le musika ia te ia. Sa fesili la’u soa ia te ia pe i ai se viiga e fiafia i ai, ma sa ou ofo, aua sa taumole o ia ma tali mai, talu ona teineitiiti, o lana pese lava e fiafia i ai o le “Ua Naunau ia Te Oe” (Viiga, nu. 57). Sa matou amata i le usuina i vaega e fa, lea sa usu le tama, sa oloto le tina, faasala la’u soa, ae ou malu.
Sa malosi le Agaga i le potu. Ina ua matou usuina le fuaiupu lona tolu, sa lofituina o ia, ma sa galoma ifo lona leo a o matou faaauau pea:
Ua naunau ia te Oe
I fiafia po o tiga.
Ina afio mai,
Nei iu faamoemoe.
Ua naunau ia te oe;
I taimi uma lava!
Faamanuia au;
Ua ou sau ia oe!
Ina ua mae’a le lona fa ma le fuaiupu mulimuli, sa tagi masusu o ia. A o taumafai lona toalua e faana o ia, sa iu ina mafai ona na. Sa tilotilo sa’o mai o ia ia te au ma fai mai, “Ua ou manao ou te papatiso.”
O le sauniga o le papatisoga o Kong Kuk-Won ma Pak Mi-Jung i le afiafi o lena Aso Sa, o se tasi o sauniga aupito faaleagaga o la’u misiona. Sa auai le la fanau i le polokalama, ma sa toatele le au paia na auai e faaalia ai la latou lagolago mo le aiga aupito fou ua liliu mai i le latou uarota. Sa ma usuina ma la’u soa se musika faapitoa: “Ua Naunau Ia te Oe.”
Sa iu ina maea la’u misiona ma ou toe foi i le aiga. Ina ua mavae se tausaga se tasi i le kolisi, sa ou toe foi i Korea mo la’u polokalama faataitai i le taumafanafana, ma o faaiuga o vaiaso taitasi ou te alu ai e asiasi i le toatele o uo faapitoa ma aiga sa ou feiloai i ai i la’u misiona. Ina ua mavae ni nai vaiaso, sa ou agai atu i Balsan ma feiloai ai ma lenei aiga faapitoa. Ina ua ou taunuu atu i lo latou fale, sa ou matauina se tasi ua misi—o lo la atalii. Na ta’u mai e Pak Mi-Jung ia te au a o maligi ona loimata: na toe foi mai le kanesa o la la’ua tama, ma i le 14 o ona tausaga, na toilalo ai i lana tauiviga.
A o ou taumafai e faailoa atu la’u faamaisega ma taulima le tiga sa ou lagonaina, sa faamautinoa mai e Kong Kuk-Kon o le a lelei mea uma. Sa latou fiafia i le talalelei, auai ma le faamaoni i le lotu, ma taulai atu i le aso atonu o le a faamauina faatasi ai lo latou aiga mo le faavavau i le Malumalu i Seoul Korea. E ui i le lototiga, sa iloa e le aiga o le a latou toe vaai ia Kong Sung-Gyun ma latou toe mafuta ai. Na ta’u mai foi e Pak Mi-Jung o lo latou usuusuina o viiga i aso taitasi, sa fesoasoani ai ia te ia e maua le malosi e taulima ai ma maua le filemu e aumaia e le Agaga.
Ina ua ou tuua lo latou fale i lena afiafi, sa ou toe manatunatu i upu o le viiga e fiafia i ai Pak Mi-Jung. Ou te faafetai ina ua faamanuiaina e le Tama Faalelagi le aiga i le filemu ina ua maliu Kong Sung-Gyun, ma e sili ona ou faafetai ona o le matafaioi a le Agaga i le liua o Pak Mi-Jung, lea ua agavaa ai le aiga mo faamanuiaga e faavavau o le malumalu.