E Le o Se Agasala le Agavaivai
E alala le tusitala i Iuta, ISA.
O le le gafataulimaina ma ni le agatonu e le o ni agasala ma e le taofia ai i tatou mai le mama ma agavaa mo le mafutaga ma le Agaga.
“Pe ua ou agavaa moni ea e ulu atu i le maota o le Atua? E mafai faapefea pe afai ou te le atoatoa?”
“Mata e mafai moni e le Atua ona avea o’u vaivaiga ma se malosiaga? Sa ou anapogi ma tatalo mo le tele o aso ina ia aveese atu lenei faafitauli mai ia te au, ae foliga mai e leai lava se mea o suia.”
“I le misiona, sa sili atu ona ou ola pea lava pea i le talalelei nai lo se isi lava taimi i lo’u olaga, ae e leai foi se taimi na sili ai ona ou iloa o’u vaivaiga. Aisea, ae o lea sa ou matuai lelei lava, na ou lagonaina ai i nisi taimi le faaletonu?”
A tatou mafaufau loloto i fesili faapea, e taua tele le malamalama e faapea, e ui o le agasala e taitaiese ai i tatou mai le Atua, ae o vaivaiga, i se isi itu e mafai ona taitai atu ai i tatou ia te Ia.
Ata na pueina e iStock/Thinkstock
Eseesega o le Agasala ma Vaivaiga
E masani ona tatou mafaufau i le agasala ma vaivaiga ua na o ni pisia eseese i o tatou agaga. Ae ua ta’u mai e tusitusiga paia e faapea o le agasala ma vaivaiga e afua eseese mai, e eseese vaifofo e manaomia ai, ma e i ai le gafatia e gafoa mai ai taunuuga eseese.
O le toatele o i tatou ua masani tele i le agasala nai lo le tatou manatu e tautino, ae sei o tatou iloiloina: O le agasala o se filifiliga e le usitai i poloaiga a le Atua pe teena i le Malamalama o Keriso o i totonu ia i tatou. O le agasala o se filifiliga e faatuatuaina ia Satani ae le o le Atua, ma avea ai i tatou ma fili i lo tatou Tama. E le pei o i tatou, o Iesu Keriso sa matuai leai se agasala ma sa mafai ona togiolaina mo a tatou agasala. A tatou salamo ma le faamaoni—e aofia ai le suia o o tatou mafaufau, loto, ma amioga; tuuina atu faatoesega talafeagai pe ta’uta’u atu foi; faaleleia mea e tatau ai; ma le toe faia ai lena agasala i le lumanai—e mafai ona tatou maua le Togiola a Iesu Keriso, ma faamagaloina e le Atua, ma toe mama.
O le mama e taua aua e leai se mea eleelea e mafai ona mau i le afioaga o le Atua. Ae afai na pau la tatou sini o le ta’umamaina e pei ona i ai i le taimi na tatou tuua ai le afioaga o le Atua, sa sili ai ona tatou faapupuu i o tatou moega pepe i o tatou olaga atoa. Ae, na tatou o mai i le lalolagi e aoao mai mea tatou te fai ia iloa ai le lelei mai le leaga, ma tuputupu ae i le poto ma tomai, ola i tulaga taua tatou te mananao ai, maua ai uiga faaleatua—alualu i luma lea e le mafai ona tatou maua mai le saogalemu o le moega pepe.
O vaivaiga o tagata e i ai le matafaioi taua i faamoemoega nei o le olaga. Ina ua popole Moronae faapea ai nei e avea ona vaivaiga e tusitusi ma mea e amuamu ai Nuuese i mea paia, sa faamautinoa e le Alii ia te ia i upu nei:
“Ma afai e o mai tagata ia te au o le a ou faaali atu ia te i latou o latou vaivaiga. Ou te avatu i tagata ia vaivaiga ina ia faalotomaualalalo ai i latou; ma ua lava lou alofa tunoa mo tagata uma o e e latou te faalotomaualalaloina i latou lava i ou luma, ma faatuatua mai ia te au, ona ou faia lea o mea vaivai ia avea ma mea malolosi ia te i latou” (Eteru 12:27; tagai foi 1 Korinito 15:42–44; 2 Korinito 12:7–10; 2 Nifae 3:21; ma le Iakopo 4:7).
O faamatalaga a lenei mau masani e maoae ma ua valaaulia ai i tatou ia iloa le eseesega o le agasala (e uunaia e Satani) mai vaivaiga (o loo faamalamalama i i, o se tulaga na “tuuina mai” ia i tatou e le Atua).
E mafai ona tatou faauigaina vaivaiga o se tapulaa o lo tatou poto, mana, ma le paia lea e o mai ma le tagata soifua. O le avea ai o ni tagata soifua, tatou te fananau mai ma le augavaivai ma le faalagolago i isi, faatasi ai ma ni faaletonu faaletino ma agamasani o le natura. E tausia i tatou ma siosiomia e isi tagata vaivai, ma o a latou aoaoga, faataitaiga, ma le faiga o i tatou e faaletonu ma o nisi foi taimi e faataumaoi. I o tatou tulaga vaivai i le olaga, tatou te mafatia ai i ma’i, fiaaai, ma le vaivai faaletino ma faalelagona. Tatou te oo i lagona faaletagata o le ita, faanoanoa, ma le fefe. E leai so tatou poto, tomai, onosai, ma le malosi. E tele foi tofotofoga tatou te feagai.
E ui ina sa leai sana agasala, ae sa aufaatasi atoatoa i tatou ma Iesu Keriso, i le tulaga o vaivaiga faaleolaga nei (tagai 2 Korinito 13:4). Na soifua mai o Ia o se tamameamea e le taualoa i se tino faitino ma sa tausia e ni matua e le atoatoa. Sa tatau ona ia aoao e savali, tautala, galue, ma fealofani ma isi. Sa fiaai ma le lava, sa ia maua lagona faaletagata, ma sa mafai foi ona ma’i, mafatia, lavatoto, ma maliu. Na “faaosoosoina o ia i mea uma e pei o i tatou, a ua leai sana agasala,” ua tuuina o Ia lava i la le tino ina ia mafai ai ona “tiga alofa ma i tatou i o tatou vaivai” ma fesoasoani ia i o tatou mafatiaga po o vaivaiga (Eperu 4:15; tagai foi Alema 7:11–12).
E le mafai ona na ona tatou salamo ona o lo tatou vaivai—e le mafai foi e le vaivai lava ia ona fai ia tatou le mama ai. E le mafai ona tatou tuputupu ae faaleagaga vagana ai ua tatou teena le agasala, ae tatou te le tuputupu ae faaleagaga foi vagana ai ua tatou talia lo tatou tulaga o vaivaiga faaletagata soifua, tali atu i ai ma le lotomaualalo ma le faatuatua, ma aoao e ala i o tatou vaivaiga e faalagolago i le Atua. Ina o popole Moronae i le vaivai o lana tusitusi, sa le’i tauina atu e le Atua ia te ia e salamo. Ae, sa aoaoina o ia e le Atua ia lotomaualalo ma faatuatua ia Keriso. A tatou agamalu ma faatuatua, e ofoina mai e le Atua le alofatunoa—ae le o le faamagaloga—e avea ma vaifofo mo vaivaiga. O loo faamatala mai i le Lomifefiloi o le Tusi Paia o le alofatunoa o se mana e mafai ai, mai le Atua ona faia mea e le mafai ona tatou faia e i tatou lava (tagai Lomifefiloi o le Tusi Paia, “Alofatunoa”)—o le vaifofo talafeagai faaleatua lea e mafai ai e Ia ona “avea mea vaivai ma mea malolosi.”
Faaaogaina o le Lotomaualalo ma le Faatuatua
Mai o tatou potomasani i le Ekalesia, sa aoaoina i tatou i elemene taua o le salamo, ae o le a tonu lava le ala tatou te atiae ai le lotomaualalo ma le faatuatua? Mafaufau i tulaga nei:
-
Mafaufau loloto ma tatalo. Ona tatou te vaivai, atonu tatou te le iloaina pe o tatou feagai ma le agasala (e manaomia ai se suiga vave o le mafaufau, loto, ma le amio) po o vaivaiga (e manaomia ai se taumafaiga lotomaualalo, e lagolagoina, aoao, ma le faaleleia atili. O le ala tatou te vaai atu ai i nei mea e mafai ona faalagolago i lo tatou ola tuputupuae ma le tulaga faatagata matua. E ono i ai ni elemene o le agasala ma vaivaiga i se amioga e tasi. O le faapea o le agasala o se vaivaiga e tau atu ai i le faia o se ’alofaga nai lo le salamo. O le faapea o se vaivaiga o se agasala lea e mafai ona taunuu i le maasiasi, tuu’aia, faanoanoa, ma lafoai ai folafolaga a le Atua. O le mafaufau loloto ma tatalo e fesoasoani tatou te iloa ai nei eseesega.
-
Faamuamua. Talu ai tatou te vaivai, e le mafai ona tatou faia suiga uma e manaomia i le taimi e tasi. A tatou taumafai e faatoilalo ma le lotomaualalo ma le faatuatua o tatou vaivaiga faaletagata soifua ia tofu le taimi ma nai mea e fai, e mafai ona faifai malie ona faaitiitia le valea, faia ni mamanu lelei ma ni mausa, faateleina lo tatou ola maloloina faaletino ma faaleagaga ma tomai e onosaia ai, ma faamalolosia lo tatou faatuatuaga i le Alii. E mafai ona fesoasoani le Atua ia tatou iloa po o fea e amata ai.
-
Fuafua. Talu ai tatou te vaivai, o le a tele atu ai mea e manaomia ina ia malolosi atili ai nai lo le na o se naunau amiotonu, ma le tele o le amiopulea o le tagata lava ia. E manaomia foi ona tatou fuafua, aoao mai a tatou mea sese, atiae nisi faiga poto aoga, toe iloilo a tatou fuafuaga, ma toe taumafai. Tatou te manaomia le fesoasoani mai tusitusiga paia, o tusi talafeagai, ma isi tagata. Tatou amata i nai mea iti, fiafia i le faaleleia, ma talia tulaga e ono lamatia (tusa lava pe tatou te lagona ai le faaletonu ma le vaivai). Tatou te manaomia le lagolagosua e fesoasoani tatou te faia ai filifiliga lelei tusa lava pe ua tatou le lavava pe faavaivai, ma ni fuafuaga e toe amatalia ai pe tatou se’e ese.
-
Faaaoga le onosai. Talu ai tatou te vaivai, e ono umi se taimi o suiga. E le mafai ona na ona tatou lafoaia o tatou vaivaiga e pei ona tatou lafoai o le agasala. O soo lotomaualalo e naunau e faia mea e manaomia, latou te aoao e maua’i, taumafai pea, ma le aua lava nei fiu. E fesoasoani le lotomaualalo tatou te maua ai le onosai mo i tatou lava faapea ma isi o e vaivai foi. O le onosai o le faailoga lea o lo tatou faatuatua i le Alii, lotofaafetai mo Lona talitonuga mautu ia i tatou, ma faalagolago i Ana folafolaga.
E tusa lava pe tatou te salamo faamaoni i a tatou agasala, maua le faamagaloga, ma toe faamamaina, tatou te tumau i le vaivai. E mafai lava ona oo mai ma’i, lagona malolosi, vale, aga masani o le natura, vaivai, ma tofotofoga. Ae o le le gafataulimaina ma ni le agatonu, e le o ni agasala ma e le taofia ai i tatou mai le mama ma le agavaa mo le mafutaga a le Agaga.
Vaivaiga i le Malosiaga
Ata na pueina e iStock/Thinkstock
E ui ina naunau Satani e faaaoga o tatou vaivaiga e faatosina ai i tatou ia agasala, e mafai e le Atua ona faaaoga vaivaiga faaletagata soifua e aoao ai, faamalosi ai, ma faamanuia ai i tatou. Peitai, e ese ai mai le mea tatou te ono faamoemoeina, e le “faia [pea lava] e le Atua mea vaivai e avea ma mea malolosi” mo i tatou e ala i le aveesea o o tatou vaivaiga. Ina o tatalo faafia atu le Aposetolo o Paulo ia aveese e le Atua se “meatuitui mai le tino” sa faaaoga e Satani e faamafatia ai o ia, sa ta’u atu e le Atua ia Paulo, “Ua lava lo’u alofatunoa mo oe: aua o le vaivai e faaatoaina ai lo’u mana” (2 Korinito 12:7, 9).
E tele auala e faia ai e le Alii “mea vaivai e avea ma mea malolosi.” E ui ina mafai e Ia ona aveesea le vaivai e ala i se togafitiga maoae tatou te faamoemoe i ai, ae i la’u lava poto masani, e seasea lava. Mo se faataitaiga, ou te lei iloa se faamaoniga faapea na aveese e le Atua ia vaivaiga o Moronae i le tusitusi ina ua uma le fuaiupu lauiloa i le Eteru 12. E mafai foi e le Atua ona avea mea vaivai ma mea malolosi e ala i le fesoasoani ia tatou galulue mai o tatou vaivaiga, maua se lagona talafeagai o le malie po o se vaaiga i na mea, ma faaleleia atili ai i le gasologa o se taimi. E le gata i lea, o malosiaga ma vaivaiga e tele lava ina fesootai (e pei o le malosi o le faapalepale ma le vaivaiga o le faaulumaaa), ma e mafai ona tatou aoaoina le taua o le malosiaga ma le lotoita, o le vaivaiga lea e o faatasi.
E i ai foi le isi auala e sili atu ona mamana e faia ai e le Atua mea vaivai ma mea malolosi mo i tatou. Na fetalai le Alii ia Moronae i le Eteru 12:37, “Ma ona ua e vaai i lou vaivai o le a faamalosia oe, e oo lava i le nofo i lalo i le nofoaga ua ou saunia i maota o loʼu Tamā.”
E le o ofoina atu e le Atua i i e suia le vaivaiga o Moronae, ae ia suia ia Moronae. O le faatoilaloina o le vaivaiga faaletagata soifua, e mafai e Moronae—ma i tatou—ona aoaoina le alofa mama, tigaalofa, agamalu, onosai, lototele, faapalepale, poto, gafatia e toetulai ai, lotofaamagalo, maua’i, lotofaafetai, fatufatua’i, ma le anoanoai o isi uigaatua e avea atili ai i tatou faapei o lo tatou Tama i le Lagi. O uiga auaumama tonu ia na tatou o mai i le lalolagi e faamaai, o uiga faa-Keriso ia e saunia ai i tatou mo le malo i luga.
E leai se isi mea e sili ona iloagofie ai le alofa, poto, ma le mana togiola o le Atua nai lo Lona tomai e liliu a tatou tauiviga ma vaivaiga faaletagata soifua i ni uiga taua faaleatua ma malosiaga e avea atili ai i tatou e pei o Ia.