Ko ha Mataʻitofe Moʻoni
ʻOku nofo e tokotaha ʻokú ne fai e talanoá ʻi ʻIutā, USA.
Naʻe fie maʻu ʻe Seta ke ne tā ʻa e pianó, ka te ne lava nai ʻo mavahe mei hono fāmilí?
“ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).
Naʻe toʻo ʻe Seta Mataʻitofe Sitauti hono tataá peá ne tangutu hifo he fakafaletoló ʻo ofi ki heʻene tamaí. Naʻá ne ʻeke ange, “Ko e hā ʻa e mata‘itofe?”
Naʻe ʻosi ʻilo pē ʻe he tokotaha taʻu valu ko Setá pe ko e hā ʻa e mataʻitofe, ka naʻá ne fiefia ke fanongo ki he tali ʻene tamaí. Naʻe fakamatalaʻi ʻe heʻene tamaí ʻo hangē kuó ne faʻa talaangé, ʻa e anga e tupu ʻa e mataʻitofé ʻi he tofé, mei he ʻotu ki he ʻotu, kae ʻoua kuo nau hoko ko ha siueli ngingila mo fetapaki.
Naʻá ne talaange fiefia, “ʻOku fetapaki ʻa e ngaahi mataʻitofé hangē ko koé siʻeku kiʻi taʻahine Seta Mataʻitofe. Naʻe mamali pē ʻa Seta. Naʻá ne saiʻia ʻi heʻene hoko ko ʻene Mataʻitofé.
ʻI he maʻu meʻatokoni efiafi he pō ko iá, naʻe talaange ʻe heʻene Tamaí kia Seta ʻoku ʻi ai ha fehuʻi ke ne fai ange.
Naʻe talaange ʻe he Tangataʻeikí, “Talu hoʻo kei siʻí, mo hoʻo manako ʻi he hivá.” “Te ke fie ako tā piano?”
Naʻe fiefia lahi ʻaupito ʻa Seta. “ʻIo, ʻio!”
Naʻe pehē ange ʻe heʻene faʻeé, “Kuo pau ke ke fononga mamaʻo pea nofo mo hoʻo faiakó ʻi ha kiʻi taimi siʻi.” “ʻOku ʻikai ha taha ia heni ʻi Milipeeni te ne lava ʻo akoʻi koe.”
Naʻe pulia atu e malimali ʻa Setá. Kuo teʻeki ke ne mavahe mei hono fāmilí ʻo laka hake ʻi ha ʻaho ʻe taha. Pea ke nofo mamaʻo atu …
Naʻe pehē ange e Tangataʻeikí, “Ka ʻoku mahuʻinga kiate kitautolu ke tau fakatupulaki hotau ngaahi talēnití, neongo kapau ʻoku faingataʻa.”
Naʻe kamokamo atu pē ʻene faʻeé. Naʻá ne pehē, “Kuo pau ke ke ngāue mālohi.”
Naʻe saiʻia ʻaupito ʻa Seta ʻi he hivá. Pea naʻá ne fakaʻamu maʻu pē ke tā e pianó. Naʻe fāifai pē pea hā mai ha malimali ʻi hono fofongá. “Te u ʻalu ʻo tā pianó!”
Ka ʻi he pongipongi hono hokó, ne ʻikai teitei ongoʻi fiefia ʻa Seta ʻi heʻene sio atu ki hono tau ʻe heʻene tamaí e fanga hōsí ki he salioté. Naʻá ne ilifia he ʻaho ko ʻení. Naʻe ʻikai ke ne ʻamanaki ʻe vave haʻane mavahe mei ʻapi.
Naʻe kaka māmālie hake ʻa Seta ki he salioté ʻo tangutu he tafaʻaki ʻene tamaí.
Naʻá ne pehē ange, “ʻOkú ke mateuteu Seta Mataʻitofe?”
Naʻe ʻikai ke ne ongoʻi mateuteu ka naʻe kamokamo pē ʻa Seta. Naʻe ngaʻunu atu e salioté.
Hili ha kiʻi taimi ne sio atu ʻene tamaí kiate ia. “ʻOkú ke ʻilo ʻa ʻema laukau ʻaki koe mo hoʻo faʻeé?”
Naʻe kamo pē ʻa Seta. “ʻE fēfē kapau te ke fie maʻu ʻeku tokoní ʻi ʻapi?”
Naʻe malimali e tamaí. “ʻOku ou ʻiloʻi pau te mau ʻofa atu kiate koe, ka ko ha founga pē ʻeni te ke lava ai ʻo tokoní. Te ke tokoni ki he Tamai Hēvaní ʻaki hono fakatupulaki e ngaahi meʻafoaki kuó Ne foaki atu maʻaú.”
Naʻe teʻeki ke ne fakakaukau pehē ki ai. Ko ha meʻafoaki nai mei he Tamai Hēvaní hono talēniti hivá?
Naʻe toe hoko atu ʻene tamaí. “ʻE fie maʻu ha taimi, ka ʻe faifai pē pea ʻe lelei ange hoʻo tā pianó. Pea te ke toki lava leva ʻo tokoni ki ha kakai tokolahi.”
Naʻe ongoʻi ʻe Seta kuo kamata ke mōlia atu ʻene manavasiʻí. Naʻá ne hanganaki atu leva ke ako tā piano mo tokoni ki he Tamai Hēvaní. ʻE kiʻi fakatupu ilifia, ka naʻá ne ʻilo te Ne tokoniʻi ia.
Naʻe fakakuitaha ange ʻene tamaí. “ʻE fakaʻau ke ulo mo ngingila ange ʻa ʻeku kiʻi Mataʻitofé.”
Ne fakaʻau ke poto ange ʻa Seta he tā pianó ʻo hangē pē ko e lea ʻene tamaí. Naʻá ne toe poto foki ʻi hono tā e ʻōkaní.
Hili ha ngaahi māhina siʻi, naʻe foki ʻa Seta ki ʻapi. ʻI he Sāpate ko iá naʻá ne hoko ko e fuofua tokotaha tā ʻōkani ʻi Milipēní! Naʻe lēlea hono lotó ʻi heʻene tangutu hifo ʻi he fuʻu ʻōkani lahi ne ngāue e koló ʻo fakatau ke ne taá. Naʻe fuʻu fakaʻofoʻofa pea mei manavasiʻi ʻa Seta ke ala ki ai. Naʻe pau ke ne tangutu ʻi ha tohi ke aʻu ki he ngaahi kií.
Naʻá ne mihiʻi ʻene mānavá pea kamata ke ne tā. Naʻe ongona ʻa e ngaahi tuʻunga fasí ʻi he lokí kotoa pea fakaʻofoʻofa.
Naʻe kiʻi hila atu ʻa Seta ki he haʻofangá. Naʻe malimali ʻa e kakaí lolotonga ʻenau hivá. Naʻe malimali foki mo Seta. Naʻe ʻikai pehē ke haohaoa ʻene taá, ka naʻá ne fakaʻaongaʻi hono talēnití ke tokoni.
Naʻá ne manatuʻi ʻa e ngaahi lea ʻene tamaí: “ʻOku fetapaki ʻa e ngaahi mataʻitofé hangē ko koé, Seta Mataʻitofe.”
Naʻe faifai pē pea ngaohi ia ʻe he Tamaí Hēvaní ke ne hoko ko ha mataʻitofe moʻoni.