Pōpoaki ʻa e Faiako ʻAʻahí
Ngaohi ʻi he Tatau ʻo e ʻOtuá
Ako ʻi he faʻa lotu ʻa e fakamatala ko ʻení pea feinga ke ʻiloʻi ʻa e meʻa ke vahevahé. ʻE founga fēfē hano fakatupulaki ʻe he mahino ʻa e “Ko e Fāmilí: Ko ha Fanongonongo ki Māmaní” hoʻo tui ki he ʻOtuá mo faitāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
“Pea naʻe folofola ʻa e ʻOtuá, Ke tau ngaohi ʻa e tangatá ʻi hotau tataú, mo [hotau] angá. …
“Ko ia naʻe ngaohi ʻa e tangatá ʻe he ʻOtuá ʻi hono tataú, naʻá ne ngaohi ia ʻi he tatau ʻo e ʻOtuá; naʻá ne ngaohi ʻa kinaua ko e tangata mo e fefine” (Sēnesi 1:26–27).
Ko e ʻOtuá ʻa ʻetau Tamai Hēvaní, pea naʻá Ne ngaohi kitautolu ʻi Hono tataú. Naʻe pehē ʻe Palesiteni Tōmasi S. Monisoni kau ki he moʻoni ko ʻení: “ʻOku maʻu ʻe he ʻOtua ko ʻetau Tamaí, ha telinga ke Ne fanongo ʻaki ki heʻetau ngaahi lotú. ʻOkú Ne maʻu ha fofonga ke Ne ʻafio mai ʻaki ki heʻetau ngaahi ngāué. ʻOkú Ne maʻu ha ngutu ke folofola mai ʻaki kiate kitautolu. ʻOkú Ne maʻu ha mafu ke Ne ongoʻi manavaʻofa mo ʻofa mai ai kiate kitautolu. ʻOkú Ne moʻoni. ʻOkú Ne moʻui. Ko ʻEne fānau kitautolu naʻe faʻu ʻi hono tataú. ʻOku tau fōtunga tatau mo Ia pea ʻokú Ne fōtunga tatau mo kitautolu.”1
“ʻOku vakai ʻa e Kāingalotu ʻo e Siasí ʻi ha faʻahinga ongo kakato ko e tokotaha kotoa pē ko e fānau ʻa e ʻOtuá; ʻoku nau fakakaukau ʻoku fakalangi ʻa e tokotaha kotoa pē ʻi honau tupuʻangá, natulá mo e meʻa ʻoku nau malavá.”2 Ko e tokotaha kotoa pē ko “ha foha mo e ʻōfefine ʻo ha mātuʻa fakalangi.”3
“Naʻe ʻilo foki ʻe he [Palōfita] ko Siosefa Sāmitá ʻoku finangalo ʻa e ʻOtuá ke maʻu ʻe Heʻene fānaú ʻa e hākeakiʻi tatau ʻo hangē ko ia ʻokú Ne maʻú.”4 Hangē ko e folofola ʻa e ʻOtuá, “He vakai, ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).
Ngaahi Potufolofola Kehé
Sēnesi 1:26–27; 1 Kolinitō 3:17; Tokāteline mo e Ngaahi Fuakava 130:1
Mei he Folofolá
Naʻe fekumi ʻa e tokoua ʻo Sēletí ʻi he Tohi ʻa Molomoná ki ha founga ke fakamāmaʻi ʻaki ʻa e ngaahi vaka lafalafa ʻe valu ne foʻu ke fakafolau ʻaki ʻa e kau Sēletí ʻi he funga ʻo e ngaahi vaí ki he fonua ʻo e talaʻofá. Naʻá ne “tutu ʻo ngaohi mei he maká ha ngaahi foʻi maka iiki ʻe hongofulu mā ono” peá ne lotu ki he ʻOtuá ke “ala ki he ngaahi foʻi maká ni” ʻaki Hono louhiʻi toʻukupú “ke ulo atu ʻi he fakapoʻulí.” Pea “naʻe mafao mai ʻe he [ʻOtuá] ʻa hono toʻukupú ʻo ala ki he ngaahi foʻi maká takitaha.” Naʻe matoʻo ʻa e veilí mei he mata ʻo e tokoua ʻo Sēletí, ʻo “ne mamata ki he louhiʻi toʻukupu ʻo e ʻEikí; pea naʻe hangē ia ko e louhiʻi nima ʻo ha tangata. …
“Pea folofola ʻa e ʻEikí kiate ia: ʻOkú ke tui ki he ngaahi lea ʻa ia te u lea ʻakí?
“Peá ne tali ange: ʻIo, ʻEiki.”
Pea “naʻe fakahā ʻe he ʻEikí ia [ki he tokoua ʻo Sēletí], ʻo ne folofola, “ʻIkai kuó ke vakai naʻe fakatupu koe ʻi hoku tatau ʻoʻokú? ʻIo, naʻa mo e tangata kotoa pē naʻe fakatupu ʻi he kamataʻangá ʻi hoku tatau ʻoʻokú.” (Vakai ki he ʻEta 3:1–17.)