Ongoʻi e Laumālie ʻo e ʻInisititiutí
ʻOku nofo ʻa e tokotaha naʻá ne faʻu ʻa e talanoá ʻi Kolomupia.
Naʻe lōmekina au he taimi ʻe niʻihi ʻe he ʻātakai kovi ʻo e ʻunivēsití. ʻI heʻeku ongoʻi ʻa e ʻātakai ʻo e ʻinisititiutí, naʻá ku ʻiloʻi naʻe ʻikai ke u tuenoa.
ʻI heʻeku kamata ako ʻi he ʻunivēsití, naʻá ku saiʻia ʻaupito ʻi heʻeku ʻi he ʻātakai fakaakó mo vakai ki he vēkeveke hoku toʻu akó. ʻOku ou fakamālō ki heʻeku Tamai Hēvaní, Paʻanga Tokoni Fakaako Tuʻumaʻú, pea mo e poupou ʻa hoku fāmilí, ke hoko ai ʻeku misí.
Lolotonga ʻa e ngaahi fuofua uike ʻo e kalasí, naʻá ku ʻiloʻi ai ʻa e ngāue faingataʻa naʻe tatali mai kiate au ʻi he taʻu ʻe nima ka hokó: ʻa e ngāue fakaako mei ʻapí, fanga kiʻi sivi īkí, siví, mo e ngāué. Naʻe kamata ke u saiʻia ʻaupito ʻi he ngāue maʻuʻanga moʻui ne u filí mo ʻeku ako ʻunivēsití, ka naʻá ku fakatokangaʻi foki ne ʻikai ke u ʻilo lahi ki he māmaní. Naʻá ku ʻiloʻi lelei ne u kehe mei he fānau ʻunivēsiti kehé. Naʻa nau fanongo ki he hiva ʻoku taʻetaau honau fakaleá, pea ne fakahehema ʻenau ngaahi talanoá ki he angaʻulí, fakaʻaongaʻi ʻo e faitoʻo konatapú, mo e inu ʻolokaholo he fakaʻosinga ʻo e uiké.
Naʻe fakaafeʻi tā tuʻo lahi au ʻe hoku kaungā-akó ke u kau fakataha mo kinautolu ʻi heʻenau ngaahi ʻekitivitī ʻi he fakaʻosinga ʻo e uiké. Hili ʻeku fakamatalaʻi ʻeku ngaahi tuʻunga moʻuí mo ʻeku tui fakalotú, naʻe fakaʻapaʻapaʻi ʻe ha tokolahi ʻeku tuí pea ʻikai ke nau toe vili mai ke u kau fakataha mo kinautolu, ka ne toe tokolahi ange ʻa kinautolu ne nau manukiʻi ʻeku ngaahi tui fakalotú. Naʻá ku feinga ke tukunoaʻi e ngaahi fakamatalá ni, ka naʻá ku fakakaukau, “Te u lava nai ʻo feʻao mo ʻeni he taimi kotoa pē?” Naʻá ku lotu maʻu pē ke maʻu ʻa e mālohí pea ke ʻoua naʻá ku ongoʻi tuenoa. Ka naʻe ʻikai ke u ongoʻi naʻe tali ʻa e ngaahi lotu ko ʻení. Ne u toki ʻiloʻi he ʻikai teitei liliu ʻa e ngaahi meʻa ia ʻoku hoko ʻi hoku ʻātakaí ʻi he ʻunivēsití. Neongo naʻá ku ʻi he ʻunivēsití, naʻá ku kei ʻalu pē ki he Finemuí, ko ia ne u ʻilo ʻo kau ki he ʻinisititiutí ʻi ha Sāpate ʻe taha ʻi he houalotu sākalamēnití. Ne u fakakaukau ke u ʻalu ki he ʻinisititiutí ʻi he ʻaho Pulelulu hoko maí ke fai ha fehuʻi ʻo kau ki he Paʻanga Tokoni Fakaako Tuʻumaʻú.
Hili ha ʻaho femoʻuekina fuoloa ʻi he ʻunivēsití, naʻá ku fononga atu ki he ʻinisititiutí. Naʻá ku heka ʻi he pasí, tangutu hifo, pea kamata ke u lau ʻa e vahe hono hoko ki heʻeku ngāue fakaako mei ʻapí. Naʻe ʻai ʻeku fuʻu māpuhoi, fie maʻu ke u mālōlō, peá u sio hake, ʻoku hoko ha meʻa taʻe-taau ʻo ofi mai kiate au. Ne u hifo ʻi heʻeku tauʻanga pasí ʻo lue atu ki he ʻinisititiutí, fakakaukau lahi fekauʻaki mo e ngāue fakaako mei ʻapi ne fie maʻu ke tānaki ʻi he ʻaho hokó.
Neongo naʻá ku moʻui ʻaki e ngaahi tuʻunga moʻui ʻo e ongoongoleleí, naʻe lōmekina au ʻe he ʻātakai ʻo e ʻunivēsití ʻi heʻeku hū atu ki he fale ʻinisititiutí. Naʻá ku hū atu ʻo mamata ki he fānau ʻunivēsiti tāutaha kei talavou ʻoku nau teunga taau peá u fanongo ki heʻenau lea fakaʻapaʻapa ki he taha kotoa. Ko e fē ʻa e kalasi te ke toʻo ʻi he faʻahitaʻu ako ko ʻení? Ko e Tokāteline mo e Ngaahi Fuakavá? Tohi ʻa Molomoná? Teuteu Ngāue Fakafaifekaú?
Naʻá ku ʻalu atu ki he kalaké, ʻo maʻu e tali ki he fehuʻi ne u haʻu ke ʻeké, peá u tafoki mai ke ʻalu. ʻI heʻeku fakaofi mai ki he hūʻanga ki tuʻá ne u tafoki hake, ʻi heʻeku ongoʻi ʻa e ʻātakai ʻo e ʻinisititiutí. Ne u hū atu ki tuʻa ʻi he matapá, pea ʻalu noa pē hoku loʻimatá ʻi heʻeku ongoʻi ʻa e fiefia lahi. Ne u foki he pasí ki ʻapi ʻo tangi pea mo malimali. Naʻe haʻu ha fakakaukau fakangalongataʻa kiate au: Naʻe ʻikai ke u tuenoa.
Ne u maʻu e tali ki heʻeku ngaahi lotú ʻi he momeniti ko iá. Naʻá ku ongoʻi e Laumālié, fakakaukau ki he meʻa ne u aʻusiá, pea naʻá ku fakamālō ki heʻeku Tamai Hēvaní koeʻuhí ko e fiefia ʻi he tui ki he ongoongoleleí.
ʻI heʻeku aʻu atu ki ʻapí, ne u fāʻofua ki heʻeku faʻeé ʻo talaange ki ai ʻa e aʻusia fakaʻofoʻofa ʻo ʻeku ongoʻi e ʻofa ʻa e ʻOtuá. Kuo teʻeki ke ne liʻaki au pea kuó Ne ʻiate au maʻu pē, he ʻokú Ne ʻiate kitautolu hono kotoa he taimi ʻoku tau fie maʻu lahi taha ai Iá. Naʻá ku ʻalu ki he ʻinisititiutí ʻi he kotoa ʻo hoku taimí ʻi he ʻunivēsití peá u feʻiloaki ai mo ha kakai tokolahi ne nau hoko ko hoku kaungāmeʻa lelei. Ka ko Sīsū Kalaisí hotau maʻuʻanga tokoni lelei taha ʻo e ʻofá mo e poupoú, pea kuo teʻeki ke Ne tuku ʻa kitautolu ke tau tuenoa.