Kiʻi Tohi Fakamatala ʻo e Konifelenisi ʻo ʻOkatopa 2015
“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pe ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38 ).
ʻI hoʻomou fakamanatu ko ia ʻa e konifelenisi lahi ʻo ʻOkatopa 2015, ʻe lava ke ke fakaʻaongaʻi ʻa e ngaahi pēsí ni (mo e ngaahi Tohi Fakamatala Fakakonifelenisi ʻi he ngaahi pulusinga he kahaʻú) ke tokoni atu ki hoʻo akó mo hono fakaʻaongaʻi e ngaahi akonaki fakamuimuitaha ʻa e kau palōfita mo e kau ʻaposetolo moʻuí pea mo e kau taki kehe ʻo e Siasí.
Fakatatau mo ʻenau “ʻilo ki he ʻaloʻofa mo e mālohi ʻo e ʻEikí”, naʻe fili ai ʻe he fāmili ʻo Sisitā Neli F. Meliotí ko ʻenau moto fakafāmilí ʻa e, “ʻE ola lelei e meʻa kotoa pē.” ʻE lava ke aleaʻi homou fāmilí ʻa e founga ʻoku fakamālohia ai kimoutolu ʻe he Fakamoʻuí, pea fokotuʻu leva haʻamou moto fakafāmili. (Vakai, Neill F. Marriot, “Ko Hono Fakavaivaiʻi Hotau Lotó kihe ʻOtuá,” 30.)
ʻOku ʻomi ʻi he konifelenisi takitaha ‘e he kau palōfitá mo e kau ʻaposetoló ʻa e ngaahi tali fakalaumālie ki he ngaahi fehuʻi ʻe lava ke maʻu ʻe he kāingalotu ʻo e Siasí. Fakaʻaongaʻi hoʻo makasini ‘o Nōvema 2015 pe vakai ki he conference.lds.org
Ko e hā ʻoku mahuʻinga ai ki he Siasí ʻa e kau fafine tauhi fuakava he ngaahi ʻaho kimui ní? — Vakai, Russell M. Nelson, “Ko ha Tautapa ki Hoku Tuofāfiné,” 95.
Ko e hā ʻoku toputapu pea fakaʻeiʻeiki ai e fatongia fakafaʻeé? — Vakai, Jeffrey R. Holland, “Vakai ki Hoʻo Faʻeé,” 47.
Ko e hā hoʻo taumuʻa ʻi hoʻo hoko ko ha fefine ʻi he ngāue ʻo e fakamoʻuí? — Vakai, Carol F. McConkie, “ʻI Heni ke Fai ha Ngāue Māʻoniʻoni,” 12.
Ko e hā ʻoku mahuʻinga ai ke tau ʻilo ʻoku ʻi ai hotau natula mo e ikuʻanga fakalangi? — Vakai, Rosemary M. Wixom, “Ko Hono ʻIloʻi Hotau Natula Faka-ʻOtuá,” 6.
“ʻOku ʻikai mahuʻinga ia pe ko e hā e angahala kuo tau faí pe ko e loloto e luo kuo tau tō ki aí. …
“… Ko e meʻa ʻoku mahuʻingá ko e tautapa ʻa Kalaisi maʻatautolu ʻi he ʻao ʻo e Tamaí. … Ko e meʻa ia ʻoku mahuʻinga moʻoní pea ʻoku totonu ke ne fakafoʻou ʻetau ʻamanaki leleí mo ha vilitaki ke toe feinga ange, koeʻuhí kuo teʻeki ai ke Ne fakangaloʻi kitautolu.
ʻOku ou fakamoʻoni ʻe ʻikai tafoki ʻetau Fakamoʻuí meiate kitautolu kapau te tau loto fakatōkilalo ke fekumi kiate Ia ka tau lava ʻo fakatomala; ʻe ʻikai loto e Fakamoʻuí ke tau hē; pea he ʻikai ke ne pehē, “ʻOiauē, ko koe ai pē”; pea ʻe ʻikai ʻaupito ke Ne siʻaki ʻa kitautolu koeʻuhí ko e ʻikai mahino kiate kitautolu ʻa hono faingataʻa ʻo e fakaʻehiʻehi mei he angahalá. ʻOku mahino kotoa ia kiate Ia. …
“ʻOku maʻu [ʻe he] fakatomalá … e mālohi ke hiki hake ʻa e ngaahi kavenga mafasiá kae fetongi kinautolu ʻaki ʻa e ʻamanaki leleí.”