Lahi Ange e Faitataú ʻi he Faikehekehé
ʻI he hiki atu ʻa e kau finemuí ki he Fineʻofá pea talitali lelei kinautolu ʻe he kau fafine ko iá, ʻe ʻāsili ange ʻenau fakatokangaʻi e ngaahi meʻa ʻoku nau faitatau aí.
Lolotonga ha ʻekitivitī fakataha ʻa e Finemuí mo e Fineʻofá, naʻe kole ange ki ha Loumaile taʻu 18 mo ha fineʻeiki toulekeleka taʻu 81 ke na talanoa ki heʻena ngaahi fuofua teití. “Naʻá na fakatou ʻohovale ke ʻilo ʻa e ngaahi faitatau ʻi heʻena ngaahi aʻusia vāmamaʻó.”1 Naʻá na ʻiloʻi naʻe lahi ange ʻa e meʻa naʻá na faitatau aí ʻi he meʻa naʻá na fakakaukau ki aí.
ʻE lava ke hā ngali fuʻu lahi e hiki atu mei he Finemuí ki he Fineʻofá, pea fakailifia he taimi ʻe niʻihi. ʻI hoʻo hoko ko ha finemuí, te ke ala fehuʻi hifo, “ʻOku ʻi ai nai ha meʻa ʻoku ou faitatau ai mo e kau fafine matuʻotuʻa ange ko ʻení? ʻOku ʻi ai nai haʻaku ʻaonga ʻi he Fineʻofá?”2
ʻOku mātuʻaki mahino ʻa e tali ʻio ki he ongo fehuʻi ko iá. Hangē ko e ongo fafine ʻi he talanoa ʻi ʻolungá, te ke ala ʻilo ha ngaahi meʻa lahi ange ʻoku mou faitatau ai mei he meʻa naʻá ke fakakaukau ki aí. “ʻIo” ʻoku ʻi ai ho ʻaonga ʻi he Fineʻofá. Kae hangē ko e fakalakalaka kotoa pē ʻi he moʻuí mei he tuʻunga ʻe taha ki he tuʻunga ʻe taha, ʻoku fie maʻu ke tau ngāue fakataha ke tau lavameʻa.