Fineʻofá
Fai ʻe Linda K. Burton
Palesiteni Lahi ʻo e Fineʻofá
ʻE lava fēfē ʻi hoʻo hoko ko e Fineʻofá ʻo tokoniʻi e “kau fefine foʻoú” ke nau lavameʻa ʻi hotau konga mahuʻinga ʻo e ngāue ʻo e fakamoʻuí? Te ke lava ʻo tokoni ke mahino kiate kinautolu ko ha konga mahuʻinga kinautolu ʻo e ngāue toputapu ʻi he puleʻanga ʻo e ʻOtuá. ʻE lava ʻo tokoni hono vahevahe e tohí pe fehokotakiʻanga ʻi he ʻinitanetí ki he Ngaahi ʻOfefine ʻi Hoku Puleʻangá ke fakamatalaʻi ʻetau ngāue toputapu ʻi he Fineʻofá.
Te ke lava ʻo fetākinima pea fakakaungāmeʻa ki he kau finemuí ʻi heʻetau teuteu fakataha atu ki he tāpuaki ʻo e moʻui taʻengatá. Te ke lava ʻo fakalahi ho kaungā-fonongá ke fakakau ai e kau finemuí. Te ke fakahoko ʻi hono fai iá, ʻa e fakaʻamu ʻa Lusi Meki Sāmita ki heʻene fuofua kau Fineʻofá: “Kuo pau ke tau fefakahoungaʻiʻaki, fetokangaʻiʻaki, fefakafiemālieʻaki pea maʻu mo e ngaahi fakahinohino ko ē te tau lava ʻo nofo fakataha ai ʻi he langí.”3
Ko e hā ʻe lava Ke Fai ʻe he kau Taki ʻo e Fineʻofá mo e kau Fineʻofá?
Fakatokangaʻi ʻoku ʻomi ʻe he kau finemuí ha ngaahi talēniti, ngaahi meʻafoaki, mo ha loto vēkeveke ke vahevahe. Fakapapauʻi ʻoku ʻi ai ha taha ke tangutu mo e kau finemuí heʻenau hū atu ki he Fineʻofá. ʻOange haʻanau faingamālie ke tānaki mai ʻenau vēkeveke ke takiekiná ki he Fineʻofá. ʻIloʻi ʻoku ʻikai ngata pē ʻi he ivi tākiekina mālohi ʻoku mou maʻu ki he kau finemui kei siʻi ko ení, ka te nau lava ʻo hoko ko ha ngaahi sīpinga ʻofa kiate kimoutolu. Kapau ʻokú ke akoʻi ʻa e ngaahi lēsoni ʻo e Fineʻofá, fakapapauʻi ke fakakau ai ʻa e ngaahi tūkunga ʻo e ngaahi toʻu kotoa pē ʻokú ke akoʻí—ʻikai ko e ngaahi faʻeé pē. ʻE lava pē ke foaki ange ha ngaahi faingamālie ki he kau finemuí ke faiako ʻi he Fineʻofá. ʻE lava ke ke fakatauhoa ʻa e kau finemuí mo e kau fineʻofa matuʻotuʻa angé ʻi he faiako ʻaʻahí mo e faingamālie ngāue tokoní. Te ke lava ʻo hoko ko ha tāpuaki pea ke taʻofi ʻa e ngaahi ʻā vahevahe ʻo e taʻu motuʻá.