Kau Finemuí

Fai ʻe Bonnie L. Oscarson

Palesiteni Lahi ʻo e Kau Finemuí

ʻOku ou palōmesi atu kau finemui ko e taimi ʻoku mou feinga ai ke ʻiloʻi e kau fineʻofa ʻi ho uōtí, te nau faitāpuekina hoʻomou moʻuí pea te ke hoko ko ha tāpuaki kiate kinautolu. Tukupā kakato ke ke fakahaaʻi ʻokú ke mateuteu ke hoko ko ha mēmipa mālohi ʻo e taha ʻo e ngaahi kautaha fuoloa mo lahi taha ʻo e kakai fefiné ʻi he māmaní. Ko ha konga mahuʻinga koe ʻo e ngāue ʻo e fakamoʻuí ʻi he ngaahi ʻaho fakaʻosí, pea ʻi hoʻo hoko ko ha ʻōfefine tauhi-fuakava ʻo hoʻo Tamai Hēvaní, ʻokú ke mateuteu ai ke kau ʻi hono langa hake ʻo e puleʻanga ʻo e ʻOtuá ʻi he māmaní. Teuteuʻi koe ke ke aʻusia ha meʻa fakaofo.

Ko e hā ʻe Lava Ke Fai ʻe he kau Loumaile Taʻu 18?

ʻI hoʻo vakavakai holo ʻi he loki Fineʻofá ʻoku fonu ai ʻa e kau fafine ʻi he ngaahi taʻu kehekehe, fehuʻi hifo, “Ko e hā te u lava ʻo ako mei he kau fafine fakaofó ni?” ʻI hoʻo fakaava ho lotó mo e ʻatamaí, te ke ofo ʻi hoʻo feohi fakakaungāmeʻa mo e kau fineʻofa ʻoku taʻu motuʻa ange ʻiate koé ka ʻoku lahi ha ngaahi meʻa ke nau vahevahe atu ʻi he potó mo e aʻusiá.

Ko e hā ʻe Lava Ke Fai ʻe he kau Taki ʻo e Kau Finemuí?

ʻE lava ke hoko hoʻo fakakaukau fekauʻaki mo hoʻo hoko ko e mēmipa mālohi ʻo e Fineʻofá ko ha tākiekina lahi ia ki he ongo ʻoku maʻu ʻe he kau finemuí ʻi hoʻo kalasí. Te ke lava ʻo vahevahe ha ngaahi aʻusia fakatāutaha ʻokú ne fakahaaʻi mai e founga kuo tāpuekina ai koé pe founga kuo tāpuekina ai e niʻihi kehé ʻi heʻenau kau atu ki he Fineʻofá. ʻOku totonu ke ke poupouʻi mo tokoniʻi e kau Loumaile taʻu 18 ke nau hiki fiefia atu ki he Fineʻofá.