ʻOku ʻI ai ha Meʻa Te u Lava ʻo Fai?
Loralee Leavitt, Uasingatoni, USA
Ngaahi tā fakatātā ʻa Allen Garns
Ne u tangutu ʻi hoku loto falé ʻo tangi. Ko e hili pē ia ha ngaahi ʻaho talu mei heʻeku tama-toó, pea naʻe ʻikai ke u lava ʻo taʻofi ʻeku fakakaukau ki he mole ʻema kiʻi pēpeé. Naʻe lahi ha ngaahi meʻa naʻá ne fakamanatu mai kiate au ʻa e meʻa fakalolomá ni, tautautefito ki heʻeku kōpate tautauʻanga vala ne fonu ʻi he ngaahi vala feitamá.
Ko e taimi kotoa pē naʻá ku ʻalu ai ki hoku lokí, naʻe hangē ne sio fakamamaʻu mai e ngaahi valá mei honau tautauʻangá kiate au. Naʻe kei foʻou ʻaupito e ngaahi valá pea teʻeki ke fakaʻaongaʻi, ʻo ne fakamanatu mai kiate au ne ʻikai ke u toe feitama. Naʻá ku fuʻu kei vaivai fau ke u tuʻu hake ʻo laka ʻi ha ngaahi lau sekoni ke fakamaau ʻo tuku kinautolu.
Fakafokifā pē kuo tukituki mai ha taha ʻi hoku matapaá. ʻI heʻeku fakaava haké, ne u vakai atu ki heʻeku faiako ʻaʻahí ʻokú ne tuʻu mai ʻi he sitepú. Ko e faiako ʻaʻahi tatau ʻeni naʻá ne faʻa tokangaʻi ʻeku fānaú ʻi he taimi ne fakapapauʻi mai ai ʻe he toketaá kiate au mo hoku husepānití ne u tama-toó.
Naʻá ne fehuʻi mai, “ʻOku ʻi ai ha meʻa te u lava ʻo fai maʻau?”
Ne u pehē ange, “ʻIo.” “ʻOku ou fie maʻu hoʻo tokoní ke fakamaau ʻo tuku hoku ʻū vala feitamá.”
Naʻá ku taki ia ki he loki mohé, ʻaʻau e ngaahi toloá kotoa, pea toʻo hifo mo e valá mei he ʻū hengá. Peá u tokoto hifo leva ʻi he mohengá lolotonga ʻene pelupelu hoku valá mo faʻo fakalelei ia ki he ngaahi puhá. Hili ʻene tepiʻi e ngaahi puhá mo fetuku ia ki lalo koeʻuhí ke u ʻoua te u toe sio ki aí, naʻá ku ongoʻi ʻa e fiefia hoku laumālié.
Hili iá, naʻá ne ʻalu ki he peitó, faʻoaki e mīsini fufulu peletí, holoholo e funga kānitá, mo fakamaau—ʻa e ngaahi meʻa naʻe ʻikai ke u toe lava ʻo faí. ʻI heʻene mavahé, naʻe maʻa hoku falé, pea ʻikai ke u toe sio ki hoku ʻū valá, pea ʻikai ke toe mafasia hoku lotó.
Naʻe akonaki ʻa e ʻAposetolo ko Sioné ʻo pehē, “ʻOku ʻikai ha manavahē ʻi he ʻofá; ka ʻoku tekeʻi atu ʻa e manavaheé ʻe he ʻofa haohaoá” (1 Sione 4:18). ʻI heʻetau kakapa atu ke vahevahe ʻa e ʻofa ʻa e Fakamoʻuí, ʻoku fakamālohia kitautolu ʻe Heʻene loto-toʻá. Koeʻuhí naʻe fonu ʻeku faiako ʻaʻahí ʻi he ʻofa ʻa Kalaisí, naʻá ne haʻu fakatoʻotoʻo ai ʻi he taimi naʻe ueʻi ai ia ʻe he Laumalié ke haʻú.
Naʻe lahi e ʻofa ne fakahaaʻi mai lolotonga ʻa e taimi fakamamahi ko iá, ʻo kau ai ʻa e ngaahi matalaʻiʻakaú, kātí, fanga kiʻi keké, mo hono tokangaʻi e fānaú, ʻa ia ne mau fakahoungaʻi kotoa. Ka ko e ʻofa ne fakahaaʻi ʻa ia ne tokoni lahi tahá, ʻa e taimi naʻe ʻikai ʻilo ai ʻe heʻeku faiako ʻaʻahí ʻeku fuʻu fie maʻu vivili iá, naʻá ne tukituki ʻi hoku matapaá, pea fehuʻi mai, “ʻOku ʻi ai ha meʻa ʻe lava ke u fai maʻau?”