Mauaina o Lou Ola
Saunia e Elder D. Todd Christofferson
O le Korama a Aposetolo e Toasefululua
Mai se lauga i se faigalotu a le Ofisa o Aoga a le Ekalesia na tuuina atu i le Iunivesite a Polika Iaga i le aso 14 Setema, 2014. Mo le saunoaga atoa alu i le devotionals.lds.org.
I le tuuina atu o Lona soifua, na faaolaina e Keriso e le gata i Lona lava soifua ae faapea foi o tatou ola. Sa ia faia mo i tatou ina ia faafesuiai ai le olaga faaletino semanu e iu mo le ola e faavavau.
Faamatalaga mai le The Three Crosses, State two, saunia e Rembrandt van Rijn, mai The Pierpont Morgan Library/Art Resource, NY; ata auro i tua © iStock/Thinkstock
A o faatasi Iesu ma Ana Aposetolo i Kaisareia i Filipi, sa Ia fai atu ia i latou lenei fesili, “Se a la outou upu ia te au, po o ai?” (Mataio 16:15). Na tali atu Peteru, ma se lauga migao ma le mamana, “O Oe o le Keriso, le Alo o le Atua soifua” (Mataio 16:16; tagai foi i le Mareko 8:29; Luka 9:20).
Ou te olioli e faitau i na upu; ou te olioli e fai atu na upu. Ina ua faatoa mavae lenei taimi paia, ina ua fetalai atu Iesu i Aposetolo e uiga i Lona maliu o loo faamalumalu mai ma le Toetu, na tetee Peteru ia te Ia. O lenei mea na maua ai e Peteru se aoaiga tiga—mo le le ogatasi ai ma, po o le le faaaogaina, o mea a le Atua “ae o mea a tagata” (Mataio 16:21–23; tagai foi i le Mareko 8:33). Ona “faaali atu ai lea [e Iesu] pe a mavae, o se alofa faateleina ia te ia o lē na [Ia] aoaiina” (MF&F 121:43), ma faatonuina Peteru ma ona Uso ma le agalelei e uiga i le tauaveina o le satauro o se tasi ma le tuuina atu o le ola o se tasi e maua ai se olaga faamanuiaina ma le faavavau, o Ia o le faataitaiga atoatoa (tagai i le Mataio 16:24–25).
Ou te fia talanoa e uiga i le folafolaga faigata “O le maua lona ola, e maumau ai ia te ia: ao le faamaumau lona ola ona o au, e maua e ia” (Mataio 10:39; tagai foi i le Mataio 10:32–41; 16:24–28; Mareko 8:34–38; Luka 9:23–26; 17:33). Ua aoao mai ai se aoaoga faavae mamana, ma taua e tatau ona tatou malamalama i ai ma faaaogaina.
Na tuuina mai e se polofesa manatunatu lenei malamalamaaga: “E pei ona maualuga atu le lagi nai lo le lalolagi, o le galuega a le Atua i lou olaga e tele atu nai lo le tala e te manao i lena olaga e ta‘u atu. O lona soifuaga e tele atu nai lo au fuafuaga, sini, po o mea e fefe ai. Ina ia laveaiina lou ola, e tatau ona e tuu i lalo au tala ma, o minute taitasi, i aso taitasi, toe tuu atu lou ola ia te ia.”1
O le tele o lou mafaufau i ai, o le tele foi lea o lou maofa i le tuuina atu pea lava pea e Iesu o Lona soifua i le Tama, i le ala na tuuina atu ai atoatoa Lona soifua i le finagalo o le Tama—i le soifua ma le maliu. O le faafeagai tonu lava o uiga ma ala a Satani, lea ua faaaogaina lautele e le lalolagi manatu faapito o le aso.
I le fono i le muai olaga, i le ofo fua atu e faataunuu le matafaioi a le Faaola i le fuafuaga a le Tama Faalelagi, na fetalai ai Iesu, “Le Tama e, ia faia lou finagalo, ma e a oe pea le mamalu e faavavau” (Mose 4:2; faaopoopo le faamamafa). O Lusifelo, i le isi itu, na tautino mai, “Faauta, o au lenei, auina atu au, o le a avea au mo ou atalii, ma o le a ou laveaiina tagata uma, ina ia leai se agaga e toatasi e se ese, ma o le a ou faia lena mea; o le mea lea, ia tuu mai ia te au lou mamalu” (Mose 4:1; faaopoopo le faamamafa).
O le poloaiga a Keriso e mulimuli ia te Ia o se poloaiga e toe teena faataitaiga faaSatani ma aveesea ai lo tatou ola mo le olaga moni, o le moni o le ola, o le malo selesitila-le olaga na muai vaaia e le Atua mo i tatou taitoatasi. O lena olaga o le a faamanuiaina tagata uma tatou te pa‘i atu i ai ma o le a avea ai i tatou ma tagata paia. Faatasi ai ma lo tatou malamalama le atoatoa, i le taimi nei, o se olaga e le mafai ona malamalama i ai. E moni lava, “o mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia” (1 Korinito 2:9).
Maimau pe ana tatou mauaina le tele o le talanoaga i le va o Iesu ma Ona soo. Semanu e fesoasoani e maua ai se malamalama faaopoopo e uiga i lona uiga, i le faatinoga, e maumau le ola o se tasi mo Ia ona toe maua ai lea. Ae a o ou mafaufau loloto i ai, sa ou iloaina o le faamatalaga a le Faaola a o lei faia ma ina ua maea Lana tautinoga ua tuuina mai ai se taiala taua. Sei o tatou mafaufau i nei saunoaga e tolu e fesootai.
Ave i Luga Lau Satauro i aso Taitasi
Muamua o upu a le Alii a o lei fetalai atu, “Aua ai se fia faasaogalemuina lona ola, e maumau ai ia te ia” (Mataio 16:25). E pei ona tusia i tusi sinopi o Talalelei, na fetalai Iesu, “Ai se tasi e fia mulimuli mai ia te au, aua nei usiusitai o ia ia te ia, a ia ave e ia lona satauro, i le mulimuli mai ai ia te au” (Mataio 16:24). Ua faaopoopo mai e Luka le upu i aso faisoo—“a ia ave e ia … lona satauro i aso faisoo” (Luka 9:23). I le Mataio, o le Faaliliuga a Iosefa Samita ua faalauteleina lenei faamatalaga i le faauigaga a le Alii i le uiga o le ave e ia lona satauro: “Ma o le taimi nei mo se tagata e ave lona satauro, o le teena o ia lava amioletonu uma, ma le tuinanau uma faalelalolagi, ma tausi a‘u poloaiga” (Mataio 16:24, vaefaamatalaga u).
O lenei vaega e tutusa ma le tautinoga a Iakopo: “O lenei lava le amio Atua e lelei ma le faamaoni i luma o le Atua o le Tama lea … ia leoleo foi o ia ia te ia, ina nei pisia mai o ia i le lalolagi” (Iakopo 1:27). O le aveina o le satauro o se tasi o se olaga i aso faisoo o le aloese mai mea uma ua le mama a o tausia fiafia poloaiga sili e lua—alofa i le Atua ma le alofa i uso-a-tagata—lea e faalagolago i ai isi poloaiga uma (tagai i le Mataio 22:37–40). O lea la, o se tasi o elemene o le tuuina atu o o tatou ola i le ola e sili atu na muai vaaia e le Alii mo i tatou e aofia ai lo tatou aveina o Lona satauro mai i lea aso i lea aso.
Ta’uta’u atu Keriso i luma o Tagata
O se isi faamatalaga lona lua o loo fautua mai o le mauaina o o tatou ola e ala i le faamaumauina mo le Faaola ma le talalelei e manaomia ai se naunautaiga ia avea ma soo i nofoaga faitele ma tulaga lautele. “Ma ai se tasi e ma ia te aʼu ma au upu i lenei tupulaga mulilulua ma le agasala; e ma foi le atalii o le tagata ia te ia, pe a sau o ia faatasi ma Ana agelu paia i le mamalu o Lona Tama” (Mareko 8:38; tagai foi i le Luka 9:26).
I se isi vaega i le Mataio, tatou te maua ai se faamatalaga fesootai:
“O lenei, ai se na te ta’uta’u au i luma o tagata, o au foi ou te tautau o ia i luma o lo’u Tama o i le lagi.
“Ai se faafiti foi ia te au i luma o tagata, ou te faafitia foi o ia i luma o lo’u Tama o i le Lagi” (Mataio 10:32–33).
O se tasi o uiga manino ma sili ona mamafa o le maumau o lou ola e ala i le ta’uta’u atu o Keriso o le maumau moni lava i le lagolagoina ma le puipuiga o lou talitonuga ia te Ia. Ua tatou masani i le mafaufau i lenei tulaga manaomia ogaoga e faatatau i le talafaasolopito ao tatou faitau e uiga i maturo o le taimi ua tuanai, e aofia ai le tele o Aposetolo anamua. O lenei ua tatou vaai, ae peitai, o se mea sa manaomia i le talafaasolopito ua manaomia foi i le taimi nei.2
Tatou te le mailoa le mea e oo mai i le lumanai, ae afai o soo se tasi o i tatou e tatau ona feagai ma le aafiaga o le maumau moni lava o lo tatou ola i le galuega a le Matai, ou te talitonu o le a tatou faaali atu le lototele ma le faamaoni.
O Peteru ma Ioane i le Faitotoa o le Malumalu, saunia e Rembrandt Van Rijn
E sili atu ona taatele (ma o nisi taimi sili atu ona faigata) le faaaogaina o le aoaoga a le Faaola, e ui i lea, e faatatau lava i le auala tatou te ola ai i lea aso ma lea aso. E faatatau i upu tatou te tautatala ai, le faataitaiga tatou te faia. O o tatou olaga e tatau ona avea ma se tautauina atu o Keriso ma, faatasi ai ma a tatou upu, molimau atu i lo tatou faatuatua ma le tuuto atu ia te Ia. Ma o lenei molimau e tatau ona puipuia ma le malosi pe a feagai ma le taufaifai, po o le taufaaleaga e i latou o e tetee ia te Ia “i lenei tupulaga mulilulua ma le agasala” (Mareko 8:38).
I se isi taimi, na faaopoopo mai ai e le Alii lenei faamatalaga ofoofogia e uiga i lo tatou faamaoni ia te Ia:
“Aua tou te manatunatu ua ou sau e avatu le filemu i [le] lalolagi: Ou te lei sau e avatu le filemu, ao le pelu.
“Aua ua ou sau e faamasesei le tagata ma lona tama, o le tama teine foi e faamasesei ma lona tina, o le ava foi e faamasesei ma le tina o lana tane.
“E fai foi le tagata ma fili o lona aiga.
“O le e tele lona alofa i lona tama po o lona tina ae itiiti ia te au, e le aoga lea ia te au: o le ua tele lona alofa i lona atalii po o lona afafine ae itiiti ia te au, e le aoga foi lea ia te au.
“O se e le ave lona satauro, ma mulimuli mai ia te au, e le aoga lea mo au” (Mataio 10:34–38).
O le fetalaiga e lei afio mai o Ia e aumai le filemu ae o le pelu e foliga mai i le uluai lagona e feteenai i mau e faatatau ia Keriso “O Le Alii o le Filemu” (Isaia 9:6), o le folafolaga i Lona soifua mai—“O le viiga i le Atua i mea aupitoaluga, ma le manuia i le lalolagi, ma le finagalo alofa i tagata” (Luka 2:14)—ma isi mau fesootai lauiloa, e pei o le “Ou te tuuina atu ia te outou le manuia, o lou manuia ou te avatu ia te outou” (Ioane 14:27).
“E moni na afio mai Keriso e aumai le filemu—filemu i le va o le tagata talitonu ma le Atua, ma le filemu i totonu o tagata. Ae o le taunuuga lemaalofia o le afio mai o Keriso e feteenai—i le va o Keriso ma le anetikeriso, i le va o le malamalama ma le pouliuli, i le va o fanau a Keriso ma fanau a le tiapolo. O lenei feteenaiga e mafai ona tupu e oo lava i le va o tagata o le aiga lava e tasi.”3
Ou te mautinoa o le toatele o outou ua teena ma tuliese e le tama ma le tina, uso ma tuafafine, a o e taliaina le talalelei a Iesu Keriso ma ulu atu i Ana feagaiga. I se auala se tasi po o le isi, e manaomia e lou alofa sili i le Keriso le ositaulaga o sootaga sa pele ia te oe, ma na maligi ou loimata e tele. Ae faatasi ai ma lou lava alofa e le faaitiitia, e te tumau mautu i lalo o le satauro, ma faaalia ia te oe lava le le maasiasi i le Alo o le Atua.
O Le Tau o le Avea ma Soo
I ni nai tausaga ua mavae sa faasoa atu ai se kopi o le Tusi a Mamona e se tagata o le Ekalesia i se uo Amisi i Ohaio, ISA. Sa amata ona faitau le tusi e le uo ma sa le mafai ona toe tuu i lalo. Na papatisoina o ia ma lona faletua, ma i totonu o le fitu masina na liliu mai nisi ulugalii Amisi se lua ma papatisoina o ni tagata o le Ekalesia. Sa papatisoina a latou fanau i ni nai masina mulimuli ane.
O nei aiga e tolu sa filifili e tumau i lo latou nuu ma faaauau pea lo latou olaga faaAmisi e ui lava ina ua latou tuua le faatuatuaga Amisi. Ae peitai, sa latou feagai ma le “teenaina” e o latou tuaoi vavalalata Amisi. O le teenaina o lona uiga e leai se tasi i lo latou lotoifale Amisi o le a talanoa atu ia i latou, galulue faatasi ma i latou, fai pisinisi faatasi ma i latou, pe fesootai ma i latou i soo se itu. O lenei mea na aofia ai e le na o uo, ae faapea foi tagata o le aiga.
I le amataga, o nei Au Paia Amisi na lagonaina le tuuatoatasi ma le faaesea e oo lava i a latou fanau sa teenaina ma sa tuliesea mai i a latou aoga Amisi. Sa onosaia e a latou fanau le teenaina mai matua matutua, tausoga, ma tuaoi vavalalata. E oo lava i nisi o tamaiti matutua atu o nei aiga Amisi, e lei taliaina le talalelei, e le toe talanoa atu pe faailoa atu o latou matua. O nei aiga na tauivi e onosaia taunuuga mai aafiaga faaagafesootai ma le tamaoaiga o le teenaina, ae ua faamanuiaina i latou.
Ua tumau le malosi o lo latou faatuatua. O le fili ma le faafeagai o le teenaina na mafua ai ona latou tutumau ma le le mafaagaeetia. I se tausaga talu ona papatiso, na faamauina aiga i le malumalu ma faaauau ai pea le faamaoni i le auai i le malumalu i vaiaso taitasi. Ua latou maua le malosi e ala i le mauaina o sauniga ma ulu atu ai ma faamamaluina feagaiga. O loo latou malolosi uma i la latou vaega o le Ekalesia ma faaauau pea ona saili mo auala e faasoa atu ai le malamalama ma le poto o le talalelei i o latou aiga lautele ma le nuu e ala i faatinoga o le agalelei ma le auauna atu.
Ioe, e matua maualuga le tau o le auai i Le Ekalesia a Iesu Keriso o le Au Paia o Aso e Gata Ai, ae o le apoapoaiga ina ia filifili Keriso nai lo isi tagata uma, e oo lava i tagata o o tatou aiga e sili ona latalata i ai, e faatatau foi i e atonu na fananau mai i le feagaiga. O le toatele o i tatou na avea ma tagata o le Ekalesia e aunoa ma le tetee, atonu o ni fanau laiti. O le luitau atonu tatou te feagai o le tumau le faamaoni i le Faaola ma Lana Ekalesia i le feagai ai ma matua, o aiga faaletulafono, o uso po o tuafafine, e oo lava i a tatou fanau i a latou amio, talitonuga, po o filifiliga ua le mafai ai ona lagolagoina o Ia ma i latou.
E le o se fesili o le alofa. E mafai ma e tatau ona tatou alolofa le tasi i le isi e pei ona alofa Iesu ia i tatou. E pei ona Ia aoao mai, “O le mea lea e iloa ai e tagata uma lava o o’u soo outou, pe afai ua outou fealofani” (Ioane 13:35). O lea e ui lava o loo faaauau pea le alofa faaleaiga, o sootaga e mafai ona faalavelaveina ma, e tusa ai ma tulaga, e oo lava i le lagolago po o le faapalepale e i ai taimi e mafai ai ona taofia mo lo tatou alofa e maualuga atu (tagai i le Mataio 10:37).
O le mea moni, o le auala sili e fesoasoani ai ia i latou tatou te alolofa i ai—le auala sili e alolofa ai ia i latou—o le faaauau pea ona faamuamua le Faaola. Afai tatou te tuli ese i tatou lava mai le Alii ona o le tigaalofa mo e pele ia i tatou o loo puapuagatia pe mafatia, ona tatou le maua lea o le auala e tatau ona tatou fesoasoani ai ia i latou. Afai, e ui i lea, tatou te mauaa ma le mausali i le faatuatua ia Keriso, ua tatou i ai i se tulaga e maua ai ma e ofoina atu le fesoasoani faalelagi.
Pe a oo mai le taimi e matuai manao ai se tagata o le aiga e pele ia liliu atu i le punavai moni ma le faavavau e tasi o le fesoasoani, o le a ia iloa po o ai e faalagolago i ai e avea ma se taiala ma se soa. I le taimi nei, faatasi ai ma le meaalofa o le Agaga Paia e taialaina ai, e mafai ona tatou faia se galuega tumau e faaitiitia ai le tiga o filifiliga le lelei ma fusifusi manua pe a faatagaina ai i tatou. I se isi itu, tatou te le auauna atu ia i latou tatou te alolofa i ai po o i tatou lava.
Faamatalaga mai le Iesu ua Faamaloloina le Ma‘i, saunia e Paul Gustave Dore
Tuu ese le Lalolagi
O le elemene lona tolu o le maumau o o tatou ola mo le Alii o loo maua i Ana upu: “Aua se a le aoga i le tagata, pe afai na te maua le lalolagi uma, ae maumau ai lona ola? se a foi se mea e avatu e le tagata e togiola a’i lona ola?” (Mataio 16:26). E pei ona tuuina mai i le Faaliliuga a Iosefa Samita, e faitauina Ana upu: “Aua o le a aoga i se tagata pe afai na te maua le lalolagi uma, ae na te le talia o ia le ua faauuina e le Atua, ae maumau ai lona ola, ma avea o ia lava ma se tagata ese?” (Luka 9:25 [i le faaopoopoga o le Tusi Paia]).
O le faapea e tuu ese le lalolagi ina ia mauaina o “ia … le ua faauuina e le Atua” e feteenai ma tu a le lalolagi i le aso ma e mautinoa lava le iloa gofie. O mea e faamuamua ma e fiafia i ai tatou te masani lava ona vaai i ai o loo siomia ai i tatou (ma o nisi taimi o i tatou lava) o le faaalia o le matua manatu faapito lava: le naunau ia amanaiaina; o le manao pea lava pea ia faaaloalogia aia tatau a se tasi; se manao lasi mo tupe, o mea, ma le pule; se lagona o le aia tatau mo se olaga o le lagolelei ma fiafiaga; se sini e tuuitiitia tiutetauave ma aloese mai soo se osigataulaga patino mo le lelei o le isi—ua taua na o nai vaega.
O le o faapea e le tatau ona tatou saili le manuia, e oo lava i le faateleina, i taumafaiga lelei, e aofia ai aoaoga ma galuega faamamaluina. E moni lava, o mea aoga e ausia e tatau i ai le viiga. Ae afai tatou te faasaoina o tatou ola, e tatau ona tatou manatua pea o na mea ua ausia e le o le iuga lena ae o auala ia ausia ai se sini e maualuga atu. Faatasi ai ma lo tatou faatuatua ia Keriso, e tatau ona tatou vaai i tulaga faaupufai, faapisinisi, faaleaoaoga, ma ituaiga faapena o le manuia e le ina ia faamatalaina ai i tatou ae o le faiga e mafai ai la tatou auaunaga i le Atua ma uso a tagata—e amata atu i le aiga ma faalautele atu ai i le mea e gata mai ai i le lalolagi.
O le atiina ae o le tagata lava ia e i ai le tulaga faatauaina a o ia saofaga atu i le atiina ae o se uiga faa-Keriso. I le fuaina o le manuia, ua tatou iloa le upumoni loloto o le autu o isi mea uma lava—o tatou olaga e a le Atua ia, lo tatou Tama Faalelagi; ma ia Iesu Keriso, lo tatou Togiola. O le faamanuiaina o lona uiga o le ola e tusa ai ma lo La finagalo.
E ese mai le olaga fiafia o le tagata ia te ia lava, na tuuina mai e Peresitene Spencer W. Kimball (1895–1985) se faaupuga faigofie o le ala e silisili ona lelei:
“Afai tatou te galulue e auauna atu i o tatou uso a tagata, e le gata i le faia o o tatou tiute ma galuega e fesoasoani ai ia i latou, ae o le a fou ai foi sa tatou vaaiga i o tatou faafitauli. Afai o le a tatou popole tele i isi tagata ma o latou olaga, o lona uiga o le a itiiti foi le taimi o le a tatou popole ai mo i tatou lava! “I le totonugalemu o le vavega o le auauna atu, o loo i ai se folafolaga a Iesu e faapea o le tuuina atu o i tatou lava, o le a tatou toe maua ai i tatou lava! [Tagai Mataio 10:39.]
“E le gata o le a tatou “mauaina” i tatou lava i le amanaiaina o le taitaiga paia i o tatou olaga, ae o le tele lava o lo tatou auauna atu i o tatou uso a tagata i auala talafeagai, o le a faapea foi ona tele mea taua o le a oo mai i o tatou agaga. … O le a avea atili i tatou ma ni tagata taua a o tatou auauna atu i isi o le mea moni—e sili atu ona faigofie ona tatou “maua” i tatou lava aua foi e tele naua isi vaega o i tatou e tatau ona sailia!”4
Faamaumau Lou Ola i Lana Auaunaga
Sa ou aoaoina talu ai nei i se tuafafine talavou matua na filifili e auauna atu faamisiona. Na ia atiina ae se gafatia e fesootai ai ma faamasani i tagata mai le tele lava o talitonuga, manatu faaupufai, ma le atunuu, ma sa popole o ia o le faapipiiina o se igoa faafaifeautalai i le aso atoa, i aso uma, e ono avea ma se mea e faaleagaina ai lona tomai tulaga ese e fausia ai sootaga. I ni nai vaiaso i totonu o lana misiona, na ia tusi mai ai i le aiga e uiga i se aafiaga faigofie ae taua:
“Na ma uuina ma Sister Lee i le suauu lima e gugu o se tina matua—sa tofu maua ma le pito—a o matou saofafai i lona potu malolo. Sa ia le fia faalogo i soo se savali e talanoa ai, ae na faatagaina i maua e pepese, sa fiafia ma te pepese. Faafetai lava, pine lanu uliuli faafaifeautalai o igoa, mo le tuuina mai ia te au o se faatagaga e maua ai ni aafiaga vavalalata ma ni tagata ese e matuai le masani lava.”
E ala i mea sa puapuagatia ai o ia, o le Perofeta o Iosefa Samita na aoao e faamaumau lona ola i le galuega a lona Matai ma le Uo. Sa ia saunoa, “sa ou faia ai lenei ma au tulafono: Pe a faatonuina ai e le Alii, ia faia loa.”5
Ou te manatu o le a tatou naunau uma lava e fai e pei ona i ai le tulaga o le faatuatua o le Uso o Iosefa. E ui lava i lea, sa faamalosia o ia e puapuagatia i se taimi mo ni masina i le falepuipui i Lipereti, Misuri, na puapuaga faaletino ae masalo sa sili atu le faalelagona ma le faaleagaga aua na le mafai ona fesoasoani i lona faletua pele, lana fanau, ma le Au Paia a o sauaina ma faasalaina. O ana faaaliga ma taitaiga na aumaia i latou i Misuri e faatuina Siona, ma o lenei ua tutuliese i latou mai o latou fale, i le taumalulu, i le salafa o le setete atoa.
E ui lava i na mea uma, i na tulaga i lena falepuipui, sa ia fatuina se tusi musuia i le Ekalesia o ni upu aupito sili ona mataina ma faagaeetia loto, o ni vaega o loo maua nei i vaega e 121, 122, ma le 123 o le Mataupu Faavae ma Feagaiga, ae faaiu i upu nei: “Ia tatou faia ai ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai” (MF&F 123:17).
FAAMATALAGA MAI LE O IESU O LOO TATALO I LE FAATOAGA, SAUNIA E Gustave Doré
O le mea moni, o le ata sili o le laveaiina o le ola o se tasi e ala i le faamaumauina o lenei: “Lou Tama e, afai e le mafai ona aveese o lenei ipu ia te au seia ou inu ai, ia faia lou finagalo” (Mataio 26:42). I le tuuina atu o Lona soifua, na faaolaina e Keriso e le gata i Lona lava soifua ae faapea foi o tatou ola. Sa Ia faia mo i tatou e faafesuiai se olaga faaletino semanu e iu mo le ola e faavavau.
O le autu o le soifuaga o le Faaola o le “Ou te faia pea lava o mea e lelei i le [Tama]” (Ioane 8:29). Ou te tatalo o le a e faia lea ma autu o lou olaga. Afai e te faia, o le a e faasaoina lava lou ola.